Амралтын өдрөөр цэрэг, цагдаа, онцгойгийн 35 залуу офицер нэгэн зураг хуримлахдаа олон хар машнинаар авто замын хөдөлгөөн хааж, Сүхбаатарын талбай дээр машинаа эгнүүлэн байршуулж, үлээвэр хөгжмийн аялгуунд төрийн хүндэт харуул жагсаан, Чингис хааны хөшөөнд хүндэтгэл үзүүлсэн дүр зураг ажиглагдав.
Цэрэг, цагдаа зэрэг хүчний байгууллагуудын нийтийн хуримын ийм үйл явдал анхных биш бөгөөд сүүлийнч нь бас биш байх. Үе үе ийм үйл явдал өрнөдөг болсныг олон нийт мэддэг болсон.
Юуны өмнө эл хуримын үйл явдалд оролцон, амьдралынхаа тэмдэглэлт үйл явдлыг тусгай хөтөлбөрөөр эхлүүлж байгаа залуу хосуудад баяр хүргэе. Дор бичигдэх нийтлэл тэднийг огт буруутгаагүй гэдгийг онцлон хэлье. Мөн энд хуримлагсадад атаархсан, аз жаргалтай мөчийг нь харлуулах гэсэн утга агуулга огт байхгүй гэдгийг илэрхийлье.
Хүчний байгууллагын офицеруудын хуримыг төрөөс ингэж зохион байгуулж байгаагийн цаад шалтгааныг дараах хэдэн үндэслэлээр тодруулья.
- Үзэл сурталжуулалт – Социалист нийгэмд бүх зүйлийг адилтгахыг эрхэмлэдэг хуарангийн сэтгэлгээтэй бөгөөд нийтийн хэв загварт бусдыг хүчээр “шахдаг”. Магадгүй эдгээр залуусын зарим нь хуримаа гэр бүлийнхэнтэйгээ хийх, үндэсний хувцасаа өмсөх, хөдөө орон нутагт хийх, бүр хурим хийхгүй байх хүсэл сонирхол байсан байх. Гэвч төрийн хүчний байгууллагад ажиллаж байгаа бол энд оролцож хуримаа хийх загварт тэднийг оруулжээ. Ийм үзэл суртлын хэв загвар нь алсаасаа социалист нийгмийг санагалзаж байгаагийн илэрхийлэл.
- Дабль стандарт - Хэрэв хүчний байгууллагынхан олноороо хуримаа хийхдээ төрийн хүндэт харуулыг залж, Чингис хааны хөшөөний дэргэд зургаа авахуулж, төрийн байгууллагын үлээвэр найрал хөгжим тоглуулж, Сүхбаатарын талбай руу автомашин оруулан зогсоож, замын хөдөлгөөнийг хааж болдог юм бол Төрийн бус байгууллагууд ч гэсэн олон залуусын хуримтыг нэгтгэн зохион байгуулахдаа энэ стандартыг хэрэгжүүлж болох биш үү?
- ПИАР - Төрийн цэргийн байгууллагын офицеруудад хуримлахад нь төрөөс ийм боломж үзүүлж байгаа нь цаашлаад төрөөс “та нарт талбай дээр ёслол хүндэтгэлтэй хуримыг чинь хийж өгсөн шүү, цаашдаа төрийнхөө төлөө зүтгэцгээх ёстой шүү гэсэн агуулгаар “өөртөө үнэнчээр ажиллуулах” гэсэн пиарын ажил.
- Өр нэхэл – Тэдний цалин бага, ажил их байдагч гэсэн “төр та нарын хуримыг зохион байгуулж өгсөн” гэх өр нэхсэн сэтгэлгээг эдгээр залууст бий болгосон гэж ойлгож болно.
Төгсгөлд нь хэлэхэд 35 офицерийн хурим гэдэг зүгээр нийгэм дэх нэг үзэгдэл бөгөөд үүний цаана үл үзэгдэм байдлаар дабль стандарт үүсгэн төр үзэл суртал, пиараа явуулж, эдгээр залуусыг төрийн төлөө туйлбартай зүтгэ гэсэн “ял, өр” бий болгож байгааг нь энд илэрхийлэхийг зорьсон болно. Мөн энэхүү үйл явдалд төрийн өмчийг /авто машиныг/ зориулалтын бусаар ашигласан, төрийн хэмнэлтийн хууль зөрчсөн, замын хөдлөгөөний дүрэм зөрчсөн, төрийн хүндэт харуулыг зориулалтын бусаар ашигласан зэрэг эрх зүйн зөрчил мөн агуулагдаж байгаа юм.
Ц.Мөнх
Amlalt.mn
