Гарцаагүй ингэж хэлэгдэхээр нөхцөл байдал үүсэж байна. Хишгээгийн Нямбаатар нүүрсний хулгайн асуудлыг шийтгэн, нэг тийш болгох Түр хороог өчигдөр ахалж байгаа юм байна. Сонсголыг хийнэ гэж байна. Хил гааль дээр ажиллана, судалгаа сайн хийнэ гэж байна. Юутай ч энэ асуудал хөдлөх бололтой. Маш их оройтож байгаа юм даа.
Дөчин дөрвөн их наядын хулгайн эзэд Ардын намыг засагласан он жилд хамаарах учир, ард түмний уураг тархинд тэртээ тэргүй дөчин дөрвөн их наядын хулгай Ардын намын бүтээгдэхүүн болсон. Энэ агуулгаараа Ардын нам сэхэх аргагүй байж мэдэх учир шалтгаанцлалаар сонгогч олны дунд ойлгогдсон.
Дөчин дөрвөн их наядынхаа хулгайг нэгмөсөн үзүүрийг нь олж, энэ олон түмэндээ ярихаас нааш, хулгайчийг цээрлүүлж, өр данс, авлига, шамшигдууллыг сампин дуусгаж байж Ардын нам ард түмэнд хэлэх үгтэй болно.
Энэ л учир Х.Нямбаатарын амлан авсан түр хорооны үйлдэл, үйлс Ардын намыг сэхэх эсэхийг шийднэ. Сэхэх байдал маш муу харагдаж байгаа. Энэ нь эх орны, түмний төлөө агуулгаар тэмцэн буй Л.Оюун-Эрдэнэ, Х.Нямбаатар нарын нэр хүндийн рейтингээр ойлгогдож байгаа.
Ардчилсан намыг арван таван дэд даргатай боллоо гэх яах вэ, Ардын намын шимэгч хорин хоёр сайдыг л яриа гэдэг чинь аргагүй үг шүү дээ. Их наядаар хотын түгжрэлийг бууруулна гээд төсөвлүүлж зарцуулсан Түгжрэлийн ажлын хэсгийг удирдагч Д.Батзориг, Түгжрэлийн сайд Ж.Сүхбаатар нартай хариуцлага ярих нь зүйд нийцнэ. Мөн тэд татвар төлөгчдийн 840 тэрбум төгрөгийг юунд, яаж, ямар хэрхэн зарцуулсныг хөндлөнгийн аудитаар шалгах нь зүйтэй.
Үнэндээ энэ их мөнгөөр тэгш сондгойн зарчим л үйлчлүүлж байгаа нь өнөөдрийн үнэн мөн. Тийм ч учраас Ардын намынхан Нийслэлийн намын хороогоо аварга бөхөөс “Орано” яриад байгаа Х.Нямбаатарт шилжүүлэх нь шиг байна. Энэ нь ч Ардын намын сэхэх эсэхийн асуудал мөн.
Ардчилсан нам арван таван дэд даргатай болсныг тэргүүн дэд Сангажавын Баярцогт ахлах нь шиг байна. Аавынд сууж, тугал хариулсан тэрбээр тугаа барих ажлаа одоо л эхлүүлж байх шиг байна. Тэр арван тав нь Д.Амарбаясгалантай аль нь ч заамдалцахаар залуус харагдах. Зөв байх. Үеэ сольж байх шиг байна, энэ нам.
Алийн болгон Со үсчиж, Үүл сүүмийх вэ дээ, энэ чинь. Энэ арван тавыг С.Баярцогт тун дориун удирдах нигууртай. Арван тавуулангаар нь, Ардын намын нүүрсний сонсголын асуудлыг нэг нэг өнцгөөр яриулж, хяналт тавьж, сөрөг хүчин байлгах ажлыг С.Баярцогт хийж дөнгөнө. Ардчилсан нам одоогоор генсекгүй байна.
Гэвч Ардчилсан намын генсек гэдэг чинь аль ч агуулгаараа С.Баярцогт л юм. Түүнд тэгж сэлэх мэдлэг ухаан, сүйхээ самбаа бий. Сүүлийн хэдэн жил хэлмэгдэл болоод хийсэн үйлийн оодон тугал сүүлдэж ханасан, одоо Ардчилсан намынхаа тугийн гилбэрийг өнгөлж зүлгээд, арван тавтайгаа, аль болох л шүүмжлүүлээд, өөлүүлээд байгаа Л.Гантөмөрийнхөө магнайг өтгөрүүлээд явчихад Ардчилсан нам босох байх, өөдлөх байх.
Ийм учраас л Сангажавын Баярцогт Ардчилсан намын өөдлөхийн дохио, өгсөхийн шатыг тавих болов уу. Босоо хэмээх С.Ганбаатарыг ялж Х.Нямбаатар Түр хорооны дарга болж, С.Баярцогт мөн шороодуулж тэргүүн дэд болов гэж ойлгох агуулга хэвлэл мэдээллээр гарлаа. Тийм ч шиг байна. Босоо Ганбаа нэгэн цагт Ерөнхийлөгч болно гэж хэлсэн хүн. Өнөөдрийн ойчилтууд тэр цагийн нь өмнөх уналтууд юм болов уу.
Х.Нямбаатар Их хурлын дарга болж, С.Баярцогт Ерөнхий сайд болж, С.Ганбаатар Ерөнхийлөгч болж мэдэх л хорвоо доо. Эд чинь үе дамжин төр барихаар шунаж байгаа хун тайж нар ч биш л дээ.
Б.БАЯР
Амлалт.мн
