Аравдугаар Богдын маань өлмий бат оршиж, гэгээн тоолол нь эхэллээ. Итали язгуурт, Аргентины иргэн, Католик шашны тэргүүн, Гэгээн ширээт лам Францис Монголд өлмий тавилаа. Өнөөдөр есдүгээр сарын нэгэн.
Өнөөдрийн энэ өдөр, тооллын энэ цаг хугацаа дэлхийн эв нэгдэл, оюун санааны нягтралын өдрөөр ойлгогдож байна. Шашин бол эцсийн бүлэгтээ эв нэгдэл, энх тайванч оюун санааны бүрэлдэл юм. Монгол өнөөдөр дэлхийд энх тайван, эв нэгдлийн агуулгаар харагдаж сурталчлагдаж байгаа энэ үйл явцыг Ерөнхийлөгч У.Хүрэлсүх зохионгуйлан эрхшээж байгааг талархан сайшаах нь зүйд нийцнэ.
Монгол орон өөдлөн дэвжих, ертөнцөд сурталчилагдах, ардчилал, эрх чөлөөний бодит индэр болж байгаа энэ үйл явцыг эртний ерөөл гэж үзэх нь зохино. Гүюг хаанаас эхтэй “урилга” хэмээн бид зуныг үдэж, намрыг эхлүүлэн ярив даа. Зөвхөн энэ наргианийг хөхиүлэн бадраахад л Монголчууд бид нэгэн цагт ерөөл бэлгийг хураасан,, ертөнцийг эзэгнэсэн түүхтэй ард түмэн гэдгээрээ бахархах. Аравдугаар Богд мандан, Гэгээн ширээт айлчлан буй энэ цаг дор, монголчууд оюун санааныхаа хувьд нэгдэн, эх оронд буй элдэв түйтгэрийг дарах оюун санааны нэгдлээр эрчимжих учиртай юм.
Хариуцлага, сахилга бат, ёс зүй, эрх тэгш байдал, засаглалын сайн тогтолцоогоор дэвжин, нэн шинээр нийгмээ хянан тохиолдуулж, нийт цугаар зөв амьдрахуйн олон талыг эрхшээх шаардлагыг бий болгон мөрдөх хэрэгтэй юм. Хэдийгээр нийгэмд хулгай зэлгий, эрхтэн мяндагтнуудын завхрал, материаллаг болоод оюун санааны ядуурал нөржсөн ч, бас сайн үзэгдэл үлгэрлэлүүд гараад л байна. Хөгжлийн банкны асуудлыг шийдэж чадсан.
Шүүх ажилласан, ямар нэг байдлаар дэвшитгэх хөдөлгөөнөөр. Хүмүүс төрд өр зээлээ төлж байна. Хариуцлагажиж байна. Ц.Гарамжав, М.Билэгт нарын төрийн түшээ явсан, авьяаслаг бизнесменүүд хэдэн зуун тэрбумаар нийгмийн дэвшилттэй маш чухал үйлдвэрлэлийн төслүүдийг босгоод, бүтээгээд, зээлээ нэр төртэй, үнэн сайнаар төлөн нийгэмдээ манлайлал үзүүлж байна.
Ерөнхий сайд адлуулан, зэмлүүлээд хариуцлагыг шаардсаар. Х.Нямбаатар гэдэг хүн нүүрсний сонсголыг явуулахаар ажиллаж байна. Чармайж байна. Нүүрсний хулгайд холбогдогсдыг юутай ч шүүхийн танхимд оруулж ирж байна. Шүүх ажиллаж байна, шүүгдэгсэд ч үнэнээ ярих нь шиг байна. Х.Нямбаатар хэлж байна лээ. Энэ намар, ерөөс мөдхөн Төрийн өмчит компаниудыг цэгцэлнэ, урьд өмнө хийж байсан бүх гэрээ, хэлцлийг гаргаж нийгэмд нээлттэй болгоно гэж байна лээ. Энэ нь хэрэг дээрээ Цахим хөгжлийн сайд Н.Учралын хийгээд байгаа ажил.
Төрийг үнэгүйдүүлсэн, төрийг харалган харагдуулдаг олон шалтгаан бол ил тод бус байдал, хаалттай мэдээлэл. Үүнийг залуу сайд Ням-Осорын Учрал тун дориун оношлож, аливаа бүх бусармагийг илэрхийлэх мэдээллийг, нэг үгээр хэлбэл явж ирсэн түүхийг гаргаж, санах ойг, хариуцлагын агаарыг цэнгэг болгож байгаа гэж харагдаж байгаа.
Үерийн бүсэд хэн байшин барив, ямар зөвшөөрлөөр, ямар хийдлээр хэний гараар, хэний үзгээр эрх олж, хориглогдсон газруудад хэнд газар олговоос авахуулаад нийгмийн санах ойг шилэн болгож, ил мэдээлэл дээр иргэн дүгнэлтээ хийж, нийгмийн болох бүтэхгүйг оношлох боломжийг Цахим яам олгож байгаа.
Ингэж ил мэдээлэл дээр эрүүл дүгнэлт гараад эхлэх нь л нийгмийг илааршуулах, чухамдаа хариуцлагын оюун санааны нэгдэл эрчимжиж байгаа юм. Энэ учраас Ням-Осорын Учралын үйлс нийгмээ гэрэлтүүлэх талаасаа Аравдугаар Богдын мандал, Гэгээн ширээт ламын айлчлалтай агуулга адил гэхнээ нь хилс үл болно. Есдүгээр сарын нэгэн. Боловсрол соёлын үүд нээгдэж байгаа өдөр. Улс оронд болж бүтэж байгаа юмс бас байнаа байна, үргэлж эвэр хошуулж болохгүй.
З.БАЯР
Амлалт.мн
