“Албан тасалгааны цонхоор амьдрал сайхан харагдана” гэдэг шиг нам төрийн өндөр албан тушаал хашиж байгаа хүнд бүх зүйл болж бүтэж байгаа мэт, МАН сонгуулийн амлалтаа хэрэгжүүлээд дуусаж байгаа мэт харагддаг бололтой.
Ингэж хэлэхийн учир нь өчигдөр МАН-ын ЕНБД бөгөөд ЗГХЭГ-ын дарга Д.Амарбаясгалан гэдэг хүн хэвлэлд өгсөн мэдээлэлдээ “МАН 2020 оны УИХ-ын сонгуульд оролцсон мөрийн хөтөлбөрөө 70-80 хувьтай биелүүлсэн” гээд хэлчихлээ.
Гэтэл бодит байдал дээр бол МАН-ын сонгуулийн мөрийн хөтөлбөр 10-20 хувьтай л биелсэн гэж хэлэх хэмжээнд байгаа. /Та ЭНД ДАРЖ 2020 оны УИХ-ын сонгуульд МАН-ын дэвшүүлсэн мөрийн хөтөлбөрийг үзнэ үү/
Мань хүн үүнийг хэлье гэж хэлсэн нь үү, хэл нь хальтираад 70-80 хувь биелээгүй гэж хэлэх гэснээ андуураад хэлчихэв үү гэж иргэд олон нийт хэлэлцэж байна. Эсвэл доор нь байгаа албан тушаалтнууд нь МАН-ын мөрийн хөтөлбөр ийм хувьтай биелсэн гээд тайлан танилцуулга өгчихсөнийг генсек шууд уншчихав уу бүү мэд.
Хэрэв МАН-ын мөрийн хөтөлбөр 70-80 хувьтай биелсэн бол авто замын түгжрэл буурч, тэгш сондгойгоор явахгүй, Иргэдийн цалин имфляцитай уялдаад нэмэгдчихсэн, Ядуурал хоёр дахин биш гэхэд нэг дахин буурчихсан, Шинээр баригдаж буй орон сууцны хороолол дунд сургууль, цэцэрлэг, ногоон байгууламж, усан сан, биеийн тамирын талбай бүхий орчин бүрдээд эхэлчихсэн, улсын хэмжээнд ЕБС-ийн 80-аас доошгүй хувийг 1 ээлжтэй биш гэхэд 3 ээлжээр хичээллэдэг байдал арилчихсан, нүхэн жорлонтой сургууль цэцэрлэгийн тоо эрс цөөрчихсөн, гадаадад ажиллаж амьдарч байсан залуус эх нутагтаа эргэн ирж ажиллаж хөдөлмөрлөх, бизнес эрхлэхэд нь төрийн дарамт биш дэмжлэг авдаг болчихсон, Шүүх, Прокурор, Авлигатай тэмцэх газар авлига, албан тушаалын гэмт хэргийг шуурхай шийтгээд гэмт хэрэгтнүүдийг ялгалгүй хариуцлага хүлээлгээд эхэлчихсэн, Гэр хорооллын айл өрхүүдийг бохирын нэгдсэн инженерийн байгууламжид холбох ажил хийгдээд эхэлсэн, дагуул хотуудын дэд бүтцийн ажлууд нь хийгдсэн байх байлаа..
Энд МАН-ын мөрийн хөтөлбөрт дурьдсан цөөн хэдэн ажлаас онцлон 100 хувь биш 50 хувь биелэхэд ийм хэмжээний ажлууд хийгдэх байлаа гэдгийг дурьдсаныг уншигч та анзаарсан бизээ.
Гэтэл яаж харахаараа МАН-ын генсек Д.Амарбаясгалан гэдэг хүн МАН-ын мөрийн хөтөлбөр 70-80 хувь биелэлттэй байгаа гэж хэлж чаддаг юм бол.
Манай амлалт.мн сайт МАН-ын мөрийн хөтөлбөрийг үргэлж сануулж, амлалтаа хэрэгжүүлэхийг албан тушаалтнуудаас шаардаж ажиллаж ирсэн. Албан тушаалтнууд ард түмнийг санах ойгүй, мартчихсан байгаа, 1-2 хийсэн ажлаараа “нүүр тахална” гэж бодож байгаа бол тэдэнд уучлаарай гээд хэлчихье.
Дашрамд хэлэхэд нам төрийн хослон баригч төрийн өндөр албан тушаалтан Д.Амарбаясгалан гэдэг энэ хүн өөрөө мөн л олон амлалт өгсөн байдаг. Авлигатай тэмцэнэ, албан тушаалын хэрэгт холбогдсон МАН-ын нэр бүхий гишүүдэд хариуцлага тооцно, тэднийг сонгуульд дахин нэр дэвшүүлэхгүй, нүүрсний хулгайн эздийг олж хариуцлага хүлээлгэнэ гэх зэргээр... Гэвч түүний өгсөн амлалт усанд хаясан чулуу мэт сарниад алга болчихдог гэмтэй.
Амлалт.мн сайт сонгуульт албан тушаалтнуудаас амлалтыг нь нэхнэ, амыг нь асууна.
Ц.Мөнх
Amlalt.mn
