Зам, тээврийн яам, Монгол Улсын сайд, нийслэл Улаанбаатар хотын авто замын түгжрэлийг бууруулах Үндэсний хороо, Авто тээврийн үндэсний төв, Нийслэлийн авто замын газар, Нийтийн тээврийн газар, Замын хөдөлгөөний удирдлагын төв, нийслэл Улаанбаатар хотын авто замын түгжрэлийг бууруулах төслийн нэгж зэрэг авто зам, нийтийн тээврийн чиглэлээр үйл ажиллагаа явуулах эрх бүхий байгууллагууд байсаар атал үүнтэй зэрэгцэн Улаанбаатар хотын тулгамдсан асуудал болсон авто замын түгжрэлийг бууруулах, замын хөдөлгөөний аюулгүй байдлыг сайжруулах, нийтийн тээврийг шинэчлэх, шат дараатай арга хэмжээнүүдийг хэрэгжүүлэх эрх үүрэг бүхий “УЛААНБААТАР ХОТЫН ТОГТВОРТОЙ АВТО ЗАМ ТЭЭВЭР ТӨСӨЛ”-ийн нэгж байх.
Тус төслийн нэгж нь Дэлхийн банкны Олон улсын сэргээн босголт, хөгжлийн банкнаас 100 сая ам.долларын 30 жилийн хугацаатай хөнгөлөлттэй зээллэгээр 30 санхүүждэг бөгөөд Төслийн хүрээнд Улаанбаатар хотын зам, тээврийн хөдөлгөөнд оролцогч талуудын аюулгүй байдлыг хангах, сонгогдсон гудамж замуудын одоо байгаа сүлжээг засварлах, шинэчлэх, шинээр авто зам барих, замын хөдөлгөөний удирдлагын төвийг шинэчлэж нэгдсэн системийг бий болгох замаар түгжрэлийг бууруулах, хөдөлгөөний аюулгүй байдлыг нэмэгдүүлэх, хотын зам, тээврийн стратегийн судалгаа, чадавх бэхжүүлэх арга хэмжээнүүдийг хэрэгжүүлэх зэрэг ажлыг хийж гүйцэтгэх аж.
Олон улсын сэргээн босголт, хөгжлийн банкны зээлээр санхүүждэг тус төслийн үйл ажиллагаа нь зарим талаар дээр дурьдагдсан зам тээврийн яам, нийтийн тээвэр, түгжрэлийн төслийн нэгж, замын хөдөлгөөний удирдлагын төв зэрэг байгууллагын үйл ажиллагаатай давхцаж байна гэж хэлж болох. Тус төслийн нэгжийн үйл ажиллагаатай ЭНД ДАРЖ танилцана уу?
Гэсэн хэдий ч 14 хүний бүрэлдэхүүнтэй “УЛААНБААТАР ХОТЫН ТОГТВОРТОЙ АВТО ЗАМ ТЭЭВЭР ТӨСӨЛ”-ийн нэгж байгууллагын шилэн дансны мэдээллийг нь харахад хэд хэдэн удаа 1-5 тэрбум гаруй төгрөгөөр зөвлөх үйлчилгээний тендер (ажил үйлчилгээ биш зөвхөн зөвлөх үйлчилгээ) удаа дараа зарласан байхаас гадна оффиссын тавилга, түрээсийн төлбөр, гэрээний урьдчилгаа төлбөр, зөвлөх үйлчилгээний гэрээний явцын төлбөр зэрэгт хэдэн арваас хэдэн зуун саяар нь зарлагын гүйлгээ хийсэн байна.
Гадаадын банкнаас 30 жилийн хугацаатай зээлж байгаа энэ мөнгийг хожим нь бидний үр хүүхдүүд төлөх учраас төгрөг бүр үр дүнтэй, зөв зүйлд зарцуулагдах ёстой. Түүнээс биш зөвлөх үйлчилгээ үзүүлж байгаа нэрээр гадаадын компаниуд, тэдний төлөөний газрын дансруу валютаар мөнгө шилжүүлж байж таарахгүй.
Тиймээс “УЛААНБААТАР ХОТЫН ТОГТВОРТОЙ АВТО ЗАМ ТЭЭВЭР ТӨСӨЛ”-ийн нэгж гэх эл байгууллагын үйл ажиллагааны давхардлыг арилгах, шаардлагагүй гэж үзвэл тус төслийн нэгжийг татан буулгах, үйл ажиллагааг нь адил төстэй байгууллагууд руу шилжүүлэх хэрэгтэй.
Эс бөгөөс төсвийн нэрээр ирээдүйд үр хойчис маань төлөх зээлийг үр дүнгүй зарцуулж таарахгүй.
Мөн эийм төслийн нэгж байгууллагуудын зарлагын гүйлгээг АТГ-аас нягтлан шалгах зайлшгүй шаардлагатай.
А.Галт
Amlalt.mn
