Хууль зүйн сайд болуутаа шүү. Ингэхдээ сэтгүүлчидтэй, мэдээллийн эх сурвалжтай ноцолдоод эхэлнэ гэж үнэндээ нийгэм бодоогүй. Гэтэл мань эр Эрүүгийн хуульд өөрчлөлт оруулах асуудлууд дотроо мөрдөн шалгах ажиллагааг задруулахгүй байх нэрийн дор нэн ноцтой асуудлыг “хор хутгасан”-ыг нийгэм шууд шүүмжлээд эхэллээ.
Аргагүй шүү дээ. Нийгмээрээ нэг булхайтай, дөчин их наядын хулгайн хэргээ илрүүлж чадахгүй байж хэвлэн нийтлэгч, мэдээлэл ологч, шүгэл үлээгч, нийгмийг муу муухайгаас сэрэмжлүүлэн мэдээлэл түгээгч болгоныг мөнхүү хуулийн өөрчлөлтөөр дарж авахаар далайсан нь үнэхээр харамсам.
Сэтгүүлч мэдээллийг хаанаас ч олж авч болно. Ер ямарваа иргэн үг хэл, үзэл бодлоо илэрхийлэх Үндсэн хуулиар олгогдсон эрх чөлөөтэй. Мэдээлэл задруулахгүй байх гэдэг агуулга явж байна. Мэдээллийг нээж, буглааг олж нийгмээрээ хагалахгүйгээр аль ч нийгэм урагшлаагүй. Тийм ч учраас бүх цаг үед хүн төрөлхтөн мэдээлэл дээр бүх суурь дүгнэлт, судалгаагаа хийж урагшилж ирсэн.
Сэтгүүлч мэдээлэл олж, түүнийхээ үнэн зөвийг хариуцан нийгэмд цацсанаараа хэзээ ч буруутах үндэслэл бүрдэхгүй. Ардчилсан нийгмийн амин заалт энэ. Б.Энхбаяр сайд тийм л юм бол энэ олон илрэхгүй байгаа хэргүүд, С.Зоригийн, нүүрсний дөчин их наядын гээд захаас аваад ажиллах хэргүүд дээрээ анхаарч, анхны байгаа болгосон бол онох байлаа.
Нүүрсний дөчин их наядын хулгайд чинь гэхэд хууль хүчнийхэн нь оролцоотой гэж дүгнэлт гарчихсан шүү дээ. Х.Нямбаатар сайн мэдэж байгаа. Үүнээсээ ажлаа эхлэх ёстой байлаа.
Хууль хүчнийхэн буюу тусгай субъектүүдээ хянадаг механизмаа бүрдүүл. Тэгээд энэ их хулгай луйврыг хаацайлдаг, мартуулдаг, нэг мэдэхэд хэрэгсэхгүй болгодог хууль хүчнийхэнтэйгээ тэмц л дээ, Б.Энхбаяр аа. Прокурорын дэргэд дэх Мөрдөн байцаах албаа сэргээн тохинуул.
Энэ албаараа нийгмийн шударга бус нь үер далай болсон байдалдаа хууль хүчнийхэн нь яагаад ажиллаж , ахиц гаргаж чадахгүй байгааг оношил л доо. Б. Галдаа шиг хүн олж тавиад энэ олон хэргийн ээдрээ учгийг сунгаж, хэрэг гэдэг нь байхгүй болдог тогтолцооны нэгэн маш том эд анги болсон тусгай субъектүүдээ хянадаг байгууллагаа хууль эрх зүйн агуулгаар нь сэргээн ажиллуулах л Баттөмөрийн Энхбаяр гэдэг сайдын тэргүүн зэргийн асуудал мөнийг нийгэм бараг зуун хувь дэмжинэ. Санал асуулга аваад үзээрэй л дээ.
Юун мэдээлэл олж авах эрхийн эсрэг үйл ажиллагаа вэ. Үнэндээ унаж байна, Энхбаяр та өөрөө. Монголд бизнес эрхлэгчид яаж зовж байна. Зээлээ төлөлгүй нэг хоноход хар жагсаалтад оруулдаг. Тэгээд мөнөөх зээлдэгчид дахин хаана ч зээл авах боломжгүй болгодог.
Тавин саяас дээш төгрөгийн өртэй хэнд ч өрөө төлж амжилгүй бяцхан азнахад л шууд гадагш гарах эрхийг нь хаадаг. Зэс, алт, нүүрснээс л орлоготой улсын аж ахуй эрхлэгч нар хил давж, наймаа арилжаа хийж байж, бизнес гэрээ хэлцэл л хийж байж өрөө төлнө биз дээ. Гэтэл ингүүлдэггүй.
Бүгдийг хорьсон, хаасан, боосон байдалтай лаахайдан суусаар энэ ард түмэн гасалж байна. Б.Энхбаяраа энийг засахаас ажлаа эхэл л дээ. Тэр Ч.Хүрэлбаатартайгаа нийлээд энийгээ хий л дээ. Түүнээс бус мэдээлэл олж авах эрхийг боомилох байдлаар ажлаа явуулбал, бүх эрх чөлөөний эсрэг халдлага хийж байна гэдгийг ард түмэн хэлээд өгнө өө.
Б.Энхбаяр сайд аа, ажлаа шударга ёсыг сахиулах, баялаг бүтээгчдээ хамгаалах, энэ мэтээс эхэл, харин өнөөдрийн явуулж буй ажлын чинь арга хэлбэр “төлгөн коммунист” төдий л харагдуулж эхэллээ. Ардын нам энэ янзаараа ард түмнээс ирэх жил санал авахгүй. Сайныг бодож, саарыг халуулахын үүднээс л чингэж хэлж байна.
З.БАЯР
Amlalt.mn
