2020 оны УИХ-ын сонгуульд МАН-ын дэвшүүлсэн мөрийн хөтөлбөрийн 5.1-д “Амьдралын таатай орчин бүхий ногоон хот” бүлгийн 5.1.1-д “Улаанбаатар хотын дүүрэг бүрт иргэдийн амарч тухлах, чөлөөт цагаа өнгөрөөх ногоон байгууламж бүхий цэцэрлэгт хүрэээлэнгийн хүртээмжийг хоёр дахин нэмэгдүүлнэ” гэж заасан.
Энэ мөрийн хөтөлбөрийг хэрэгжүүлэх хугацаа дуусахад жил хүрэхгүй хугацаа үлдлээ. Одоогоор дүүрэг бүрт нэмэгдэхүйц хэмжээний иргэдийн чөлөө цагаа өнгөрүүлдэг газар хэд байгуулагдсаныг хэлж чадахгүй байна.
Дүүрэг бүрт шинээр байгуулж чаддаггүй юмаа гэхэд нийслэлчүүдийн ганц очдог, гэр бүлээрээ зугаалдаг, агаар салхинд гардаг цорын ганц ногоон байгууламж бүхий Үндэсний цэцэрлэгт хүрээлэнгээ ч бид тордож чадахгүй байна.
Тус хүрээлэнгийн газрын ихэнх нь Улаанбаатарчуудын ундны цэвэр усны нөөц газарт харьяалагддаг атал зүүн талаас нь хашааг нь тулгаад орон сууцны барилга барьчихсан, өмнө талаас нь Туул голын ард төвийн шугамтай татаж холбогдсон амралт сувилалын цогцолбор баригдаад дуусчихсан, голд нь хашаалаад авчихсан олон жил болж байгаа нэг газар байдаг бөгөөд тэр нь нэг сайдын аавын гэх юм гэнэ.
Дээр нь хүчний байгууллагуудын хөшөөгөөр дүүрч, мод тарьсан газар бүрт тэрнийгээ “нотлосон байгууллагуудын нэр хаягыг дурьдсан” элдэв пайз бүхий талийгаачийн толгойн хөшөө шиг босоо чулуунууд, эвдэрч хэмхэрсэн ТҮЦ, тасарч, жайжийсан хашаа гээд эзэнгүй мэт дүр зураг угтах.
“Үндэсний цэцэрлэгт хүрээлэн” ОНӨҮГ-ийн даргаар НИТХ-ын төлөөлөгч, Ү.Оюунзул ажиллаж байгаа. Гэвч мань дарга байгууллагынхаа үйл ажиллагаандаа эзний сэтгэлээр ханддаггүй нэгэн бололтой.
Тус хүрээлэнгийн газрыг нь урд, зүүн талас нь шахан “авсаар” байгаа энэ үйлдэлд Ү.Оюунзул дарга та бодитой тайлбар өгнө бизээ. Тэгээд ч нийслэлчүүдийн ундны цэвэр усны нөөц газраас хумсална гэдэг бол Үндэсний аюулгүй байдалд заналхийлж байгаа гэмт хэргийн шинжтэй үйлдэл.
Хотын даргаар шинээр томилогдсон Х.Нямбаатар та нийслэд бугшсан авлига, албан тушаалын гэмт хэргийг таслан зогсоохоо илэрхийлсэн. Тиймээс нэн тэргүүнд амралтын өдрүүдэээр нийслэлчүүдийн зорин очдог ҮЦХ-ийн үйл ажиллагаанд хяналт тавьж, даргыг нь шалгахад гэмгүй л болов уу?
А.Галт
Amlalt.mn
