Монгол төрийн томоохон албан тушаалуудад УИХ-ын гишүүд, яам агентлагийн дарга нар эхнэр нөхөр, үр хүүхдүүд, хамаарал бүхий этгээдүүд томилон ажиллуулж, тухайн салбарын төсөл хөтөлбөр, тендер, зээл, төрөөс олгох хөнгөлөлт зэргийг хуу хамаад авдаг байдлыг таслан зогсоохын тулд Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд нэмэлт өөрчлөлт оруулсан.
Товчхондоо эл хуулиар дээрх байдлыг таслан зогсоосон.
Гэтэл улс төрчид нийслэлийн зарим албан тушаалд “үе улируулан” өөрийн хүнээ томилох “тусгай эрх” хувьчилж авчихсан болсон мэт аашилдаг болжээ.
Тодруулбал, нийслэл хот нь хувьцаат компани мэт болчихсон, улстөрчид нь хувьцаа эзэмшигчид шиг өөрсдийн хүнээ дуртай албан тушаал дээрээ томилдог, ингэж өөрийн “хүнээрээ дамжуулан” нийслэлийн бодлогод оролцдог байдал байсаар байна.
Үүний нэг тод жишээ бол шинэ Хотын дарга Х.Нямбаатар, Нийслэлийн Засаг даргын нийгмийн хөгжил, боловсрол, эрүүл мэндийн асуудал хариуцсан орлогч, өмнө нь УИХ-ын дарга Г.Занданшатарын зөвлөхөөр ажиллаж байсан З.Төмөртөмөөг чөлөөлж, түүний оронд мөн л УИХ-ын даргын зөвлөх байсан хуульч О.Номинчимэгийг томилсон байна.
Эндээс харахад ерөөс нийслэлийн нэг орлогч даргын томилгоо нь УИХ-ын даргын “квот” бөгөөд мань эр түүндээ хэнийгээ томилохоо шийддэг бололтой.
Тиймгүйсэн бол Хотын дарга өөрийн багийн хүнээ томилох байсан биз. Хотын дарга хэзээ бие дааж, хараат бусаар томилгоогоо хийдэг болох вэ?
А.Галт
Amlalt.mn
