102 жилийн түүхтэй МАН боловсон хүчний хомсдолд орчихоо юу гэж бодогдмоор томилгоонууд ойрын өдрүүдэд хийгдэж байна.
Төрийн захиргааны байгууллага, агентлагуудад хэдхэн хүн эргэн сэлгэгдэх байдлаар томилогдох болсны зэрэгцээ төрийн цэргийн байгууллагын нэг болох цагдаагийн байгууллагын хурандаа нар төрийн захиргааны байгууллага, агентлагуудын даргаар томилогддог хандлага газар авлаа.
Цагдаагийн байгууллага бол гүйцэтгэх байгууллага. Тэнд ажиллаж байгаа алба хаагчид дээд тушаалтны өгсөн үүрэг даалгаврыг хэрэгжүүлдэг, гүйцэтгэдэг. Түүнээс биш тэд бие даан шийдвэр гаргадаг, асуудлын олон талаас нь нарийн судалж тооцоолдог менежерүүд биш.
Тийм атал цагдаа нарыг томоохон албануудад томилж байгааг тухайн байгууллагын үйл ажиллагааг сайжруулах гэхээсээ илүүтэй хулгай худал, авлигыг нь илрүүлүүлэх гэсэн агуулгаар “харж байна”.
Гэвч тэд үнэхээр хууль дүрмийг сахиулж, авлига хулгайтай тэмцэж чадаж байна уу гэдэг нь эргэлзээтэй. Нийслэлийн нийтийн тээврийн газрын даргаар томилогдон ажиллаж байсан, чөлөөндөө гарсан хурандаа С.Ж гэгч ногоон автобусны хэрэгт холбогдоод шалгагдах үеэрээ амиа егүүтгэхийг завдсан тохиолдол гарсан. Гаалийн байгууллагыг удирдахаар цагдаагийн хурандаа очсон. Тэнд авлигын сүлжээ схем арилаагүй байгаа тухай мэдээлэл гарах боллоо.
Цаашдаа эрх барьж буй МАН “цагдаа суурьтай” төрийн тусгай албанаас төрийн захиргааны томилгоог үргэлжлүүлэн хийсээр байх юм бол нэг талаас төрийн албыг зохицуулдаг Төрийн албаны зөвлөл гэж тусгай институци байх шаардлагатай юу, нөгөө талаас төрийн албанд мерит зарчмын дагуу үнэнчээр ажиллаж, төрийн захиргааны удирдах албан тушаалд томилогдох ёстой жирийн албан хаагчид юунд итгэж найдаж төрд зүтгэх вэ? гэдэг асуулт хариултгүй үлдэж байна.
МАН-д цагдаагийн байгууллагад ажиллаж байсан, байгаа хүмүүсээс илүү мэдлэг боловсролтой, чадвартай, сайн менежерүүд хийх залуус цөөнгүй гэдэгт итгэж байна. Гэтэл дарга нар нь тэдэнд итгэж ажил алба даатгахын оронд цагдаагийн алба хаагчидад илүү итгэж байгаа нь тухайн салбарын үйл ажиллагааг шууд дээрээс нь удирдан чиглүүлж, үүрэг даалгавар өгч, түүнийгээ биелүүлүүлэх зарчмаар удирдахыг чухалчилжсан хэрэг гэж ойлгож болохоор байна.
Мөн нийслэлийн газар хэлтсийн нэлээд хэдэн дарга өмнө нь мөн л цагдаагийн байгууллагад ажиллаж байсан хүмүүс байсан, тэд хэрхэн ажилласныг нийслэлчүүд мэдэхтэйгээ болсон атал өдгөө нийслэлийн шинэ Засаг дарга Х.Нямбаатар мөн л цагдаагийн хурандаа нарыг татан авч захиргааны байгууллагын удирдуулахаар томилж байгаа нь анхаарал татууштай хэрэг юм.
Цаашдаа иргэний, захиргааны байгууллагад цагдаагийн хурандаа нар хэр үр дүнтэй ажиллахыг иргэд та бид хамтдаа харах л үлдлээ.
А.Галт
Амлалт.мн
