Төрд нүүрлэсэн авлига, хулгай, худлын эсрэг Ерөнхий сайд, МАН-ын дарга Л.Оюун-Эрдэнэ хатуу тэмцэхээ илэрхийлсэн.
Гэвч сүүлийн 7 жил Монголын төрийг МАН дангаар засаглаж ирсэн. Энэ хугацаанд ЖДҮ, Хөгжлийн сан, Газар тариаланг дэмжих сан, Боловсролыг дэмжих сан, Нүүрсний хэрэг гээд төсвийн хөрөнгө, газрын баялагаас ээлж дараалан “хуйлгайлсан” авлига албан тушаалын гэмт хэргийн шинжтэй үйлдлүүд ээлж дараалан гарсан.
Энэ бүхнийг таслан зогсоож төрөөс, түмний баялагаас дахиж ийм увайгүй, улаан цайм хулгай дээрмийн хэргийг “гаргахгүйн” төлөө Засгийн газар ажиллаж байгаа бололтой.
Өнгөрсөн 7 хоногт Хууль зүй дотоод хэргийн сайдаар шинээр томилогдсон Б.Энхбаяр олон нийтэд хандан мэдээлэл хийх үеэрээ “Засгийн газраас санаачлан авлига албан тушаалын гэмт хэрэгт оногдуулах ял шийтгэлийн бодлогыг чангатгах асуудлаар өнгөрсөн оны сүүлчээр УИХ-д нэн яаралтай горимоор хуулийн төсөл оруулж хэлэлцэн батлуулсан. Ингэснээр улс төрд нөлөө бүхий этгээдийн авлига албан тушаалын гэмт хэргийг хялбаршуулсан журмаар шийдэхгүй, тэнсэн харгалзахгүй болсон. Одоо оруулах Эрүүгийн хуулийн нэмэлт өөрчлөлтийн төсөлд улс төрд нөлөө бүхий этгээд хээл хахууль авсан тохиолдолд бүх насаар нь хорих ял шийтгэнэ, ийм төрлийн гэмт хэрэгт өршөөл үзүүлэхгүй байхаар тусгасан” гэв.
Эндээс дүгнэж үзвэл Засгийн газраас нэгэнт авлига албан тушаалын гэмт хэрэгтэй эвлэрэхгүй гэдгээ зарлаж, авлигын гэмт хэрэгтэн, төрөөс хулгай хийсэн албан тушаалтнуудыг бүх насаар нь хорих ялаар шийтгэх зүйл ангийг Эрүүгийн хуульд нэмэлт өөрчлөлтөөр оруулан УИХ-аар батлуулахаар төлөвлөж байгаа аж. Ингэснээр эрх мэдэл, албан тушаалаараа түрий барьж нийтийн баялагаас хулгайлдаг явдал эрс багасч, нийгэм жаахан ч гэсэн цэвэршинэ гэж харж байна.
Ямартай ч Хууль зүйн шинэ сайд Б.Энхбаяр энэ асуудлыг эргэлт буцалтгүй “зүтгүүлж” байгаа нь сайшаалтай. Бид ингэж байж улс орноо авлига, албан тушаалтнуудын гэмт хэргээс “цэвэрлэж” чадна.
Хэрэв энэ хууль батлагдвал Нүүрсний хулгайд нэр холбогдож, яллагдагчаар татагдаад байгаа УИХ-ын гишүүн асан Ж.Мөнхбат, Т.Аюурсайхан нар болон “Эрдэнэс Таван Толгой” ХК-ийн гүйцэтгэх захирал асан Х.Ганхуяг нар эхний “золиос” болох аж.
Нэгэн цагт журмын нөхөд явсан МАН-ынхан ийнхүү өөрсдийн “дундаасаа төрсөн авлигач”-уудаа бүх насаар нь хорих ялаар шийтгэх бололтой.
Нэгэнт асуудал иймдээ тулж байгаа бол Ж.Мөнхбат, Т.Аюурсайхан, Х.Ганхуяг нар нүүрсний хулгайтай холбогдуулан өөрсдийн нэрээ цэвэрлэж, бусадтай холбоотой бүх мэдээллээ УИХ-ын нээлттэй сонсголд оролцон хэлэх хэрэгтэй.
Цаашдаа төрөөс хулгайлагсад, авлига албан тушаалын гэмт хэрэгт холбогдогсод, төсөв тендер будлиантуулагчид, төрийн ажлыг гүйцэтгэсэнийхээ төлөө бусдаас шан харамж, хахууль, хувь нэхэгсэд бүх насаараа шоронд хоригдох ял авах нь дээ.
Ийм нөхцөлд Монголын шорон эрх баригч МАН-ын цагаан захтай “хулгайч”-уудаар дүүрэх бий гэсэн бодол төрж байна.
А.Галт
Амлалт.мн
