Нийгмийн даатгалын ерөнхий хуулийн шинэчилсэн найруулгыг өнгөрсөн хавар УИХ-аар баталж, ирэх оны нэгдүгээр 1-нээс хэрэгжүүлэхээр болсон билээ. Эл хуулийн чухал нэгэн зохицуулалт нь тэтгэврийн хуваарилалтын тогтолцоог хуримтлал руу үе шаттай шилжүүлж эхлэхээр тэтгэврийн нөөц сантай байхаар хуульчилсан. Тэтгэврийн нөөц санд даатгуулагчийн НДШ-ийн 2 хувийг (ажилтнаас нэг, байгууллагаас нэг) төвлөрүүлэх юм. Сайн дурын даатгуулагчийн шимтгэлээс хоёр хувийг мөн нөөц санд хуваарилна. Ингэхдээ орлогыг даатгуулагч бүрээр хуваарилж, сангийн дансанд байршуулах юм. Өөрөөр хэлбэл, даатгуулагч НДШ-ийнхээ хоёр хувийг хуримтлал хэлбэрээр хадгалуулна гэсэн үг.
Тэгвэл энэ хуримтлалыг хэрхэн зарцуулж болохыг Нийгмийн даатгалын ерөнхий хуульд ингэж хуульчилсан байна. Хуримтлалыг даатгуулагчийн саналд үндэслэн санхүүгийн хэрэгсэлд, эрүүл мэнд, боловсрол, орон сууцны ипотекийн санхүүжилтэд хөрөнгө оруулж болохоор тусгажээ. Тодруулбал,
29.5.Тэтгэврийн нөөц санд байршуулсан даатгуулагчийн мөнгөжүүлсэн орлогыг түүний саналд үндэслэн доор дурдсанаар хөрөнгө оруулж болно:
29.5.1.энэ хуулийн 13.1-д заасан санхүүгийн хэрэгсэлд;
29.5.2.тухайлсан хуулиар зохицуулсан эрүүл мэнд, боловсрол, орон сууцны ипотекийн санхүүжилтэд.
Энэ хуулийн 13.1-т ингэж заажээ.
13.1. Нийгмийн даатгалын сангийн чөлөөт үлдэгдлийг найдвартай, үр өгөөжтэй, хариуцлагатай, ил тод, хараат бус байх зарчмыг баримтлан дараах санхүүгийн хэрэгсэлд хөрөнгө оруулж болно:
13.1.1.Засгийн газрын үнэт цаас;
13.1.2.Монголбанкны үнэт цаас;
13.1.3.Төрийн сангийн нэгдсэн дансанд байршуулах мөнгөн хадгаламж;
13.1.4.Банкны тухай хуулийн 3.1.20-д заасан арилжааны банк /цаашид "арилжааны банк" гэх/-нд байршуулах мөнгөн хадгаламж.
Харин нас барсан даатгуулагчийн хуримтлалыг хууль ёсны өв залгамжлагчид өвлүүлэх юм. Гэхдээ даатгуулагчийн гэр бүлийн гишүүд тэжээгчээ алдсаны тэтгэмж тогтоолгох бол нэрийн дансны мөнгөжүүлсэн орлого, тэжээгчээ алдсаны тэтгэвэрт зарцуулах нийт хөрөнгийн хэмжээг тооцож, үлдэгдлийг өвлүүлэх аж.
29.6.Даатгуулагч нас барвал түүний мөнгөжүүлсэн орлогыг хууль ёсны өв залгамжлагчид нь өвлүүлнэ.
29.7.Нас барсан даатгуулагчийн гэр бүлийн гишүүнд Нийгмийн даатгалын сангаас олгох тэтгэврийн тухай хуульд заасны дагуу тэжээгчээ алдсаны тэтгэвэр тогтоолгох эрх үүсэхээр бол нэрийн дансны мөнгөжүүлсэн орлого, тэжээгчээ алдсаны тэтгэвэрт зарцуулах нийт хөрөнгийн хэмжээг тооцож, үлдэгдлийг энэ хуулийн 29.8-д заасан журмын дагуу өвлүүлнэ.
29.8.Тэтгэврийн нөөц санд хөрөнгө төвлөрүүлэх, бүртгэх, хуваарилах, байршуулах, мэдээлэх, хөрөнгө оруулах, өвлүүлэх, хяналт тавихтай холбогдсон харилцааг зохицуулсан журмыг санхүү, төсвийн, хөдөлмөр, нийгмийн хамгааллын асуудал эрхэлсэн төрийн захиргааны төв байгууллага болон Нийгмийн даатгалын үндэсний зөвлөлийн саналыг үндэслэн Засгийн газар батална.
Түүнчлэн 2024 оны төсвийн төсөлд тэтгэврийн даатгалын сангийн 1995 оноос өмнө тэтгэвэр тогтоолгосон иргэдийн тэтгэвэр, цэргийн албан хаагчдын тэтгэвэр, зарим иргэний тэтгэврийн хэмжээг нэмэгдүүлэх тухай хууль, тэтгэврийн нөөц сангийн мөнгөжүүлэх арга хэмжээнд нийт 1.1 их наяд төгрөгийн санхүүжилт олгохоор тусгажээ.
Эх сурвалж: Eagle.mn
