Ардчилсан нам үнэхээр лойжээ. Лувсаннямын Гантөмөр гэдэг нөхрийг даргаараа тавьсан. Тавигдсанаасаа хойш өөдлөхгүй, нэг их сайхан жийтэл татаад өндийхгүй хүн юм. Ард түмэн ямар сайндаа Ардын намын БЭТ гээд байна шүү дээ. Муухай доромж шүү.
Нэг хэсэг нөхөд ирэх сонгуульд Ардын намд ялагдахаар тохироо хийсэн гээд л шүүмжилж байна. Нам нь ерөөсөө л нэг өөдтэй болохгүй юм. Лидер гэдэг ойлголт энэ намаас арчигдаж. Уг нь энэ намын хамгийн гол хүч, эдүгээ тулгуурлах бамбар нь УИХ дахь бүлэг нь юм л даа.
Гэтэл Одонгийн Цогтгэрэл гэдэг дарга нь нэг тийм хэвийн боовны бэмбий шиг “амьтан” байгаад байх юм. Овоо юм уу гэсэн чинь үнэндээ овоолсон нэг нөхөр л яваад байна.
Ардын намын бүлгийг бүлтэлзтэл шахаад, энэ олон авлигын хэргийг нь яриад, нүүрсний сонсголыг нь одоо хийгээдэх гээд шахаж байх ёстой бус уу. Энэ их алдагдалтай төсвийг ийм ийм юманд эд нар ингэж зарцуулах гээд зүтгүүлж байна гээд самбарт цэрдээр бичээд ярьж байх ёстой хүн бол О.Цогтгэрэл. Нүүрсний сонсгол хийх түр хороонд энэ хүн байж л байгаа. Гэтэл өөрөө нүүрсний хэрэгт хутгалдчихсан юм уу даа гэмээр өлбөгөр байдалтай суугаад байх юм.
Дөчийн дөчин дөрвөн их наядыг улс тонуулчхаад байна, Ардын намын тэргүүтэй нөхдүүдэд.
Ерөнхий сайд нь үүнтэйгээ тэмцээд дийлэхгүй байна шүү дээ. Үгүй ээ, энэ дээр нь, шархан дээр нь давс үрэхийн үлгэрээр О.Цогтгэрэл ханцуй шамлаад дэмнээд, үзэж тарж байх ёстой биш үү. Байдаггүй ээ. Халуудсан тэмээ шиг л яваад байх. Намын бүлгийн дарга гэж ямархуу нөхөд байдаг байв гээд үз л дээ.
Ч.Сайханбилэг бүлэг ахалж байсан. Мах мөлждөг тонгорог шиг л байсан. Ардын намын С.Бямбацогт Ардчилсан намыг чинь засаглаж байхад Бүлгийн дарга хийж л байсан. Онгичсоноо олоод шидчихдэг зээтүү шиг л улс төр хийдэг байлаа шүү дээ.
Тэднээс суралц л даа. Эдийн засгийн хэлээ мэддэг гэж ойлгогддог. Эдийн засгаар чинь дүүрэн асуудал байна бус уу. Тэрбумтнууд, Ж.Оджаргал, Ц.Баатарсайхан, П.Батсайхан, Ш.Баярсайхан нар үндэсний хэмжээний бизнес, банк эрхэлцгээх атлаа банк бусаар ард түмнээ тоноод байгааг хэвлэл мэдээллүүд бичээд л байна шүү дээ.
Үүнийг ядахдаа зааглаад банкны эзэн нь банкаа л эрхэлдэг, толгой шийр , ууц чанаж, банк бусаар иргэдээ шулдаггүй байлгахаас эхлээд эрх зүйн хувьд шинээр зохицуулах ихээхэн юм харагдахгүй байна гэж үү дээ, Одонгийн Цогтгэрэл ээ.
Хүний эрх гэдэг юм хөсөр унаад удлаа. Даваагийн Мөнх-Эрдэнийг чинь галуун цуваанд оруулж дэглээд байна гээд бичээд байна шүү дээ, өөрөө ч хэлээд байна. Очиж эргэсэн бололтой байсан, ер нь тэр Д.Мөнх-Эрдэнэ чинь нүүрсний дөчин их наядын хулгайчдын дэргэд ариун “амьтан” биз дээ.
Түүнийгээ суллуулаач ээ. Энэ улсаар дүүрэн туршилт хийнэ гээд байгаа тэр Б.Чойжилсүрэнгийн асуудлыг ярь л даа. Иргэддээ туршилт хийнэ гээд хүний эрхийн бүдүүлэг, байж болшгүй зөрчилтэй үг хэлээд зогсож байгаа Б.Чойжилсүрэнд Ардчилсан намын бүлгийн дарга нөхөр О.Цогтгэрэл зарчмын хувьд ямар нэг шүүмжлэл хэлэв үү, ард түмэн сонсов уу.
Сонсогдохгүй байгаа биз дээ. Одонгийн Цогтгэрэлийн сураг Увсад л их гарах юм. Тойргоо л нэг их тойрч гүйсэн хүн. Тойрог яах вэ, том тойрогтоо, улсдаа улс төрөө хий л дээ, О.Цогтгэрэл ээ. Аймаг чинь гэхэд Хүрлээ Чойжоо хоёрын хөлд үрэгдээд алаг эрээн засаг төр байгаа биз дээ.
Ч.Чимид гэдэг цагдаагаас уяатай даргатай. Ц.Батболд гэдэг Чойжоогийн “нислэгчинтэй” л танай аймаг бэдчиж байгаа.
Одонгийн Цогтгэрэл ээ, олигтой бай л даа. Овоо юм уу гэж огт харагдахааргүй , тэрүүхэндээ өөрийгөө болгосон тиймхэн товариш бэдчээд байх чинь Ардчилсан намын бүлгийн дарга бус харагдаж байна. Арчаагүй харагдаж байна.
Т.ГАРЬД
Amlalt.mn
