Засгийн газрын гишүүн, Сангийн сайд Болдын Жавхлан өчигдөр Хөгжлийн банкны таван зуун сая долларын бондын өрийг төлснөө мэдэгдлээ. Амжилттай гэсэн тодотгол дагалдаж байх шиг байна. Бас хэний тавьсан өрийг хэн төлж байна, хэний Засгийн газар бас төлж байна, анзаараарай гэсэн шиг утгатай мэдэгдэл хийнэ билээ.
Арга ч үгүй биз. Ардчилсан намынхны арван зургаан оны өмнө засаглахдаа, арван зургаан оноос хойших засаглалд ч тавьсан өрийг энэ Засгийн газар төлж байна шүү гэсэн Сангийн сайдын үг нэмэр хачиргүй үнэн болой.
Мань Б.Жавхлан ойрмог эдийн засагтаа тун харам байгаа. Аргагүй юм. НӨАТ-ын буцаан олголт дээр ч эсрэг муна шиг байгаад байгаа. Судас нь цохилоод, зээлжих зэрэглэлээ түвшинд нь хадгалах ногоон гэрэл бүүдийлгүй асаад ирж байхад, улсын сан хариуцсан хүн харам байх нь аргагүй ээ.
За, энэ нэг хэрэг. Ойрд төрийн эрх барих дээд байгууллага нь нэг шийд чиг гаргах биз. Ганзоригийн Тэмүүлэн судлах ажлын хэсэг ахалсан бололтой байна лээ. Эрдэнэтийн мөнгийг эвгүй зардаг эртийн уламжлалаас өөр тооцоо гаргана биз.
Өчигдөр Б.Жавхлангийн төлснөө мэдэгдсэн бонд бол таван жилийн хугацаатай, 7.25 хувийн хүүтэй олон улсын зах зээлээс босгосон хөрөнгө байсан. Өр төлсөн нь сайн хэрэг. Энэ Засгийн газар, Ерөнхий сайд Л.Оюун-Эрдэнэ энэ улсын санхүүгийн сахилга батыг сайжруулах гээд хичээн зүтгэж байгаа. Амаргүй байна гээд зүтгээд байгаа. “Эрдэнэт” үйлдвэрээс эхлээд, энэ улсад ямархуу өрөм сүү өгч болохыг, Таван толгойг дөчин дөрвөн их наядын хулгайчуудаас аврах замаар гээд, энэ улсад байгаа их өвгөдийн үлдээсний хишгийг арвижуулаад байх боломж байгааг харуулж л байна.
Эцгийнхээ олон жил зүтгэж хураасан, олсныг эрх хүүхдүүд нь увайгүй зардаг, үрдэг гэмшилт явдлууд байдаг. Манай улсад үүсгэсэн өрүүд бол яг ийм үлгэрээр хийгдсэн лай ланчгууд байдаг.
Үр дүнд нь мөнгөний ханш унадаг, валют ховорддог, эдийн засгийн эрсдэлүүд ээлж дараагаар ирдэг, зээлжих зэрэглэл паг болж, олон улсад Монгол улаан гэрлийн анивчаанаар аваарын байдлаар харагддаг.
Дампуурах эрсдэл, Дэлхийн банк, Олон улсын валютын сангийн сануулга, санхүүгийн сахилга батын шийтгэл гээд юм юм болдог доо, хөөрхий.
Эдүгээн Засгийн газар үүний эсрэг бодитой тэмцэл явуулж, Монгол улсын төсвийн орлого урьд өмнөх онуудаас байгаагүйгээр нэмэгдсээн гээд хэлээд байна.
Ч.Хүрэлбаатар гэхэд өчнөөн төчнөөн удаа сангийн сайд хийсэн хүн. Эдүгээ тэр хүн их тийм санхүүгээ өрөвдсөн, энхрийлсэн хүнээр харагдаад байх. Зовлонг нь доторлох хүний хувиар, эрх биш улсаа бодох сэтгэл төрдөг биз.
Энэ засгийн газар хэд хэдэн ч бондын өрийн эргэн төлөлтийг өр тавилгүйгээр, өөрийн бэлээр төллөө. Өмнө яадаг билээ дээ, бид мэднэ шүү дээ. Өрийг өрөөр төлдөг, хорыг хороорын агуулга явдаг байсан биз дээ. Улс төрд байсан “Гэнэтийн олз” нар иймэрхүүг ярьдаг байсан.
Одоо бол харин эрүүл эдийн засгийн, бэлжиж байгаа, сэргэж байгаа, өнгөтэй өөдтэй явахын үүдтэй хаалганаас өрийг барагдуулж байна.
Болдын Жавхлан, Засгийн газар бас ч гэж болоо ш тээ, ингэх хэрэгтэй. Эрхбиш олон түмэн анзаарч байгаа биз. Юмыг углуургаар нь сайн хийчихвэл угаас сайн байдаг жамтай.
Засгийн газар углуургаас нь юмаа төлөвлөөд, хариуцлагатай сахилга баттай хийчихвэл амаргүй зүйлүүд аятай болоод байх нь дамжиггүй л. Хөгжлийн банк саяхан, ямар байв даа, бүрэн тоногдсон байсан аа даа, одоо бол өрөө төлчхөж байна.
Б. ДОРНО
Amlalt.mn
