Ерөнхий сайд Л.Оюун-Эрдэнэ хулгай, шамшигдуулал, энэ улсыг муухай харагдуулж буй бүхэнтэй үнэндээ сарвайтал тэмцэж л байна. Ард түмэн ойлгож мэдрээд, ерөнхийдөө сайн дүнг түүнд тавиад, амьхандаа урамшаад л байгаа.
Гэтэл сайны хажуугаар саар үргэлж залагдаастай. Хулгайтай тэмцэж байна, гэтэл хаанаа гацдаг юм, хаанаасах ч юу байх вэ дээ, дунд доод шатандаа ирээд л асуудал явахгүй байх шиг. Цагдаагийн даргыг хүртэл сольж үзсэн ч тусыг эс олж байх шиг байна.
Т.Сүхболд гэдэг хүнд их л итгэл найдлага овоолж, Цагдаагийн даргаар тавих шиг үзэгдсэн. Энэ дарга хэр мэтгэж, ямар дэвшлийг авчирч байгааг одоогоор үзэхгүй л байна, ард түмэн. Тогоо, Очир гээд л орлогчуудтай, тэд нар нь ч гэсэн дээ, ямархуу шид үзүүлж, улс оронд нэмэр болж, худал хулгайтай тэмцэж урагшилж байгаа эсэхийг ард түмэн анзаарч л байгаа.
АТГ-ийн З.Дашдаваа гэхэд ажиллаад л байгаа шиг байдаг. Гэхдээ, бас яг тулаад хийж байна уу гэхээр, эргэлзмээр зүйлүүд байгаад л байдаг. Тагнуулын газар сайн ажиллаж байгаа юм уу, муу ажиллаж байгаа юм уу, ойлгогдсонгүй, Ц.Хуланг давж заалдахад нь нэг жилээр ялыг нь бууруулсан, хам хэрэгтэн гэх Б.Отгонбаатар гэгч ламд найман жил ноогдуулсан байсныг бүр цайруулан сулласан шүүхийн шийдвэр гарч мэдээлэгдлээ.
Үүнийг нийгэм гайхширан харж л байна. Тагнуулын газрын дуулиантайгаар баривчилсан хоёр хүн ийм ялгаатай байдлаар шүүхэд дэнслэгдэх. Нийгэм хараад л байна.
Төмөр замын хэрэг гэж айхтар юм болсон оо доо. С.Батдөл гэдэг хүний гэрээс тэрбум тэрбумаар мөнгө хурааж авсан, хүчний байгууллагынхан. Авлигын овоолго байсан л даа. Хэдэн тэрбумаар нь шүү. Т.Батдөлийг яллаад суулгачихсан. С.Батдөлөөс өөр “амьтан” яллагдсангүйеэ дээ, энэ хэргээр. Энэ л маш сонин.
С.Батдөл шиг залуу ганцаараа тэр хэмжээний авлигын уурхайг бүтээхгүй, загварчлал болгож үл чадна аа гэдгийг эрхбиш энэ ард түмэн мэдээд, хараад байна бус уу. Яагаад түүний цаад нуугдаж байгаа эздийг нь, жинхэнэ авлигачдыг олохгүй байна вэ хэмээн ард түмэн, шударга ёс нэхсэн олон нийт гайхан бухимдаж байна. Хэргийг ингэж илж, цаад эзэн, жинхэнэ авлигачийг олохгүй даамжруулаад байгаагаас л улс улдаад, хөгжил саатаад байгаа юм.
Төмөр замын дарга Х.Хэрлэн гэдэг хүн С.Батдөлтэй холбоотой ганц үг ган хийгээгүй. Адаглаад удирдсан салбарт маань авлигын ийм муухай жишээ үзэгдлээ, уучлаарай ард түмээн гэж хэлэхгүй байна, тэр хүн. Төмөр замын салбартаа авлигын эрсдэлийг ингэж бууруулж, ингэж сайжруулж ажиллаж байна гэж ч нэг албан мэдээ тэр хүн гаргахгүй байна.
Энэ байдал бүхэн л жинхэнэ авлига, нийгмийг муухай харагдуулж байгаа бүхнийг өөхшүүлсээр байгааг хэн хүнгүй мэдэж байгаа. С.Батдөлийн цаад эзнийг баараггүй олж байж л авлигын буглаа арилна. С.Батдөл дарга нарын дохио зааваргүйгээр вагон явах зөвшөөрөл өгөхгүй нь бас хэн бүхэнд ойлгомжтой. Харин үүнийг нь АТГ, Улсын мөрдөнгийнхөн "ойлгохгүй" өнгөрүүлж байх шиг байна.
Ингэж мөрдөж чадахгүй, тэгж илрүүлж барахгүй болохоор ард түмэн АТГ, Цагдаа, ТЕГ-ынханд гомдоод байх шиг. Шүүх, прокурорынхон алтан бөгж ээмгээрээ гангараад байхаас, авлигажсан нийгмийн язгуурын хатгитай ер тэмцэхгүй, АПУ-гийн даргын арын өрөөнд байгаад байна гэж босоо Ганбаа хэлээд байгаа үнэн шүү дээ.
Улс орны хөгжлийг хойш татаж байгаа авлигын хэргийг илрүүлж, нийгмийг цэвэрлэх ажлыг хийгээч, хууль хүчнийхээн.
Эс тэгвэл олон авлигачин "Батдөлүүд" дахин дахин төрсөөр,тэд дангаараа хэргээ үүрч шоронд суугаад, жинхэнэ эзэн-авлигачид нийгмээ ялзруулсаар, улс орны хөгжлийг гацаасаар л байх болно шүү дээ.
Т.ГАРЬД
Amlalt.mn
