Ардын нам, Ардчилсан намын залуус аа, Н.Мөнхбатыг хар, Ч. Отгочулууг хар!
Нүүрсний дөчин дөрвөн их наядаар авторлагдан суугаа Б.Ганхуягийг хар!
Хөгжлийн банкны хэргээр Н.Мөнхбат, Ч.Отгочулуу, Б.Шинэбаатар нарт 2-4 жилийн ял ноогдуулаад явуулчхаж.
Гүйцэтгэх захирал , ТУЗ-ийн гишүүн , дарга явсан нөхөд л дөө. Эрх мэдлээ хэрэгжүүлж байхдаа гүйцэтгэх захирал Н.Мөнхбат арай л байсан даа гэж тухайн үеийн нь зарим шударга ажилчид анхнаасаа нийгэмд мэдээлж байсан. Үнэн байсан.
Хөгжлийн банк хөсөр болчихсон байсан. Л.Оюун-Эрдэнэ Ерөнхий сайд энэ банкийг эргүүлээд банк болгох асуудлыг ингэж чиглүүлж байгааг нийгэм харж буй байх.
Хөгжлийн банкны эдгээр яллагдсан нөхдөөс нэг юмыг их тодорхой анзаарах хэрэгтэй.
Эдүгээ нийгэмд дарга дагаж, шүлс үсэргэж, цүнхийг барьж, болж бүтэхгүй загварчлал долоож явдаг намчин залуус их сайн ойлгож харах хэрэгтэй дээ.
Том дарга нарын улыг долоож, юу хий гэснийг нь хийж, дохиур мэт ажиллахаар ийм ирээдүй, ийм байдал л хүлээж байдаг байна.
Ардчилсан намын нөхдийг ялгаад хийчихлээ гэж байх шиг байна. Тэгж харагдаж байгаа байх. Гэхдээ Ардчилсан намын ах нарынхаа дохиураар л Н.Мөнхбат гэдэг залуу ажиллаад энд хүрч, хар гэр рүү ачигдаж байна. Гор нь ийм. Хор нь тэр.
Шалгагдаад лавтайяа хэдэн жил болсон эдгээр хүмүүс. Ёс зүйтэй, зарчимтай, нийгмийн шалгуурын үүднээс эдгээр хүмүүсийн амьдралын хэдэн жил шавар шавхай, нэр төрийн бүх уналтаар үргэлжилж, эдүгээ дахин үргэлжлүүлэн эрх чөлөөгөө хасуулах он жилүүдийг туулах болж.
Хүний эрхэнд жаргахаар өөрийн эрхэнд зов гэдэг дээ. Хүний эрхэнд албан тушаалд очиж, хүний гарын өмнөөс хүйтэн могой базахаар ийм байдалд хүрдгийг намчин залуус маш сайн ухаарах хэрэгтэй.
Төмөр замын С.Батдөл гэдэг нөхөр үүний сонгодог жишээ. Ингээд л ах нарынхаа, албан тушаалтнуудын өмнөөс золионд шидэгддэг.
Жинхэнэ суут хор найруулагч, цуут авлигачид хясааны үзүүрийн цүнхээлд үлдчихэж байгаа юм. Ийм жишиг Монголд тогтоод удлаа. Н.Мөнхбат гэхэд “Фортуна”-гийн л дуугүй албат байсан гэх.
“Фортуна” Н.Батбаяр түүнийг хамгаалж дуугарч байна уу , хар л даа та минь, үзэгдэхгүй байгаа биз дээ. Бодит байдал ийм л байна шүү дээ.
Монгол Ардын нам сүүлийн долоо найман жил төр барьж байна. Ардын намын "Мөнхтбатууд" их бий. Цаг нь ирэхээр Н.Мөнхбатын замаар орох болзлыг хангасан маш олон этгээд байгаа.
Монголын нийгэм бүгдийг харж, хэн нь хаана юуг зувчуулж, нийгмийг идээ бээр болгосныг нэгмөсөн харж байгаа.
Ардын намын залуус аа, Н.Мөнхбатыг хар, Ч. Отгочулууг хар! Нүүрсний дөчин дөрвөн их наядаар авторлагдан суугаа Б.Ганхуягийг хар!
Эрх мэдэл албан тушаалын төлөө ямар ч вирус, өмхийг долоох хэл, хэзээ мөдгүй дэлбэрэх дарьтай албан тушаал, авлигын бялттай цүнх бариад явахаар ийм ангалд ах нар чинь, намын дарга нар чинь ингэж шидээд орхидог юм.
Улс төрчид, том ах нар чинь та нарт тушаал өгдөг болохоос гарын үсэг зурдаггүй. Тэд дээгүүрээ нам дотроо, өөр хоорондоо, хууль шүүхтэй тохиролцож "уснаас хуурай гарч", гагцхүү чамайг хууль руу, ял руу, шорон руу "шидэж" өгнө.
ЖДҮ, Боловсролын зээлийн сан, Хөгжлийн банкны хэрэг, Нүүрсний хулгай, Автобусны хэргээс ямар улс төрч ял зэм хүртэв?
Дарга нар чинь та нарын гараар "могой бариулаад" өөрсдөө ард нь үлдэхвий.
Тиймээс л дарга дагаж далдайгсдад бид сануулаад байгаа юм.
Ийм учраас нийгэмд баялаг бүтээсэн, эрх чөлөөлөг, өөртөө итгэлтэй, оюун санаалаг, гол нь зарчмын эрүүл амьдралаар л амьдрахыг бодоцгоо, нам дагасан залуус аа!
Б.БАЯР
Amlalt.mn
