Улсын Их Хурал дээр “гоё” юм их болж байна. Гишүүн Гочоогийн Ганболд гурван тэрбумын асуудал ярилаа. Ийм мөнгийг УИХ-ын гишүүдэд ээлчилэх замаар төсөв батлуулахад дуугүй байх, мөрөөр нь явуулуулахад зориулагдсан эрх мэдлийн авлига маягийн зүйл бийг илэрхийлчихлээ.
Д.Тогтохсүрэн нь даруйхан гарч ирж, тийм зүйл байхгүй гэлээ. Тийм зүйл байгааг Г.Ганболд эрхбиш мэдээд хэлсэн байлгүй дээ. Нүүрсний сонсгол хийх түр хороог ахлаад, ажил нь явахгүй, явуулахгүй өчнөөн юм болоод, одоо тэр ажлаа өгчихсөн Г.Ганболд яг ажил дээр, асуудал ярих дээр ямархуу төвөгтэй байдгийг ихэд ойлгосон хүн, учрыг нь доторлож л ярьсан байж таараа.
Нэгэнтээ Г. Занданшатар даргадаа, дуугүй яваад байхаар дээрэлхэх юм гээд сонсголын асуудлаар гомдоллож байсан л даа. Өчигдөр харин УИХ-ын дарга Г. Занданшатар маань өөрөө гомдоллоод хурлаа орхиод гарч одох юм. Хууль зөрчсөн санал хураалт би явуулж чадахгүй гээд дэд дарга Л.Мөнхбаатартаа сэнтийгээ өгөөд гарсан.
Би үхэхээр чи үх, би зөрчсөнөөс чи зөрч гэснийг хуульч Лхагваагийн Мөнхбаатар биелүүлчхэв үү дээ, янз нь.
Хууль зөрчсөнийг засуулах , зөрчсөн зүйлийг УИХ дээр оруулж ирүүлэхгүй байх нь өөрөө УИХ-ын даргын үүрэг зарчим байх ёстой л доо. Төрийн эрх барих дээд байгууллагын дарга шүү дээ. Ингэж хөнгөдөж болохгүй байх аа. НӨАТ-ын буцаан олголтыг таван хувьд хүргэх асуудлыг ярьж, санал авч УИХ дээр ирүүлсэн хүн Г. Занданшатар өөрөө.
Гэтэл энэ асуудал нь явсангүй, ажил хэрэг болсонгүй. Болдын Жавхлан, Чимэдийн Хүрэлбаатар хоёр ханалан нэгдэж, жадлан эсэргүүцсээр, түүн дээр бүлгийн нь дарга Д.Тогтохсүрэн нь ч хамжаарга болох шиг боллоо. НӨАТ-ын буцаан олголтыг таван хувьд хүргэх асуудал лөөлөө болов.
УИХ-ыг, төрийн эрх барих дээд байгууллагыг удирдаж байгаа дарга эв нэгдлийг хангаж ажиллах ёстой. УИХ дахь Бүлгийн дарга нарыг өрөөндөө дуудаад, Байнгын хороодын дарга нартайгаа сууж байгаад асуудлыг угаас нь, язгуураас нь хөөж яриад, цул нэгтэйгээр УИХ-ынхаа танхимд баталж, шийдэл тодорхой байх ёстой юм.
Гэтэл ингээд өөрөө хурлаа орхин гарах дээр хүрэх хэмжээнд байна гэдгийг хэрхэн ойлгох вэ. Товчхондоо бодлогогүй байна, зарчимгүй байна л гэж дүгнэгдэх. Иргэдэд, олон нийтэд бол Г. Занданшатарын үйлдэл таалагдаж болох юм. Иргэдийнхээ төлөө байсан, ёс зүйг эрхэмлэн сахиулж байгаа мэтээр эерэг харагдах байх.
Гэвч УИХ-ын дарга өөрөө ганцаардаж байгаа мэт, үйл хэрэг нь дэмжигдэхгүй байгаа мэт, олгогдсон эрх мэдлээ хэрэгжүүлж чадахгүй байгаа мэт харагдах энэ бүхэн чинь Монголын төрийн дархлааны үнэлгээ болж харагдах юм. Ийм учраас Г.Занданшатар дарга, УИХ-ын даргынхаа сэнтийгээс бууж одох эрхгүй юм.
Тулсан асуудал болгоныг зөв шийдэж, шийдэлд бэлэн байхын тулд л таныг төрийн эрх барих дээд байгууллагын даргаар УИХ-д олонх МАН сонгосон. Ингэж үзвэл та МАН болоод сонгогч олон түмний эрх ашгийг хөсөрдүүлж байна.
Алдаагаа түргэн зас, Г.Занданшатар дарга аа! Эс тэгвэл та УИХ-ын дарга байхын хэрэг байна уу.
Б.ДОРНО
Amlalt.mn
