Ерөнхий сайд Л.Оюун-Эрдэнэ авлига, албан тушаалын гэмт хэрэгтнүүдтэй эвлэрэх ямар ч үндэслэлгүйг удаа дараа хэлсээр байгаа. Байр суурьтаа хатуу зогссоор байгаа. Зогсох ч ёстой.
Харин үүнийг нь сулруулах гэсэн, санаатайгаар идэвхгүйжүүлэх оролдлого гарсаар байгааг ард түмэн анзаарч мэдэж л байгаа. Эрүүгийн хуульд орох өөрчлөлтөөр, авлига, албан тушаалын гэмт хэрэгтнүүдийг өршөөлд хамруулахгүй, магадлангаар суллахгүй байхаар хуульчлах юм. Гэтэл үүнийг эс үйлдэхүй, үйлдэхүйгээрээ эсэргүүцэгчид байгаа учраас өнгөрөгч долоо хоногт МАН-ын дарга, Ерөнхий сайд Л. Оюун-Эрдэнэ эдгээр мэт санаархал үүсгэгчдийг намаас хөөх, өчиггүй шийтгэхийг хатуу санууулсаныг олон нийт таатай хүлээж авч байх шиг байна.
Аргагүй юм даа, улс орон авлига, хээл хахуулд идэгдэж, нийтийн амьдрал дээшлэхгүй байгаад авлигачид, шударга бусыг идээ бээржүүлэгчид бүрэн буруутай.
Асар том том мөнгөний тоотой авлигын хэргүүд гардаг. С.Батдөл мэтийн жараахайнуудыг л ачаад, яллаад явуулдаг. Жинхэнэ авлигын мастерууд ажлаа үргэлжлүүлэн хийж, авлига, албан тушаалын гажгийг үргэлжлүүлсээр суугаад байгаад л хамаг хэрэг оршдог нь тодорхой үнэн.
УИХ-д хүртэл, Эрүүгийн хуульд хатуу нөхцөл зүйлчлэл оруулахгүй байх санаархагчид бодитой байна гэдэг чинь тэдгээрийн дотор ирээдүйн ялаа “бэлдэн” суугаа нөхөд байна аа гэдэг логикийг шууд илэрхийлнэ.
Энэ УИХ өөрөө үүнийг илэрхийлчихсэн, угаасаа. Саяхны автобусны хэргээс эхлээд маш олон авлига, албан тушаалын “хэрэгтнүүд” УИХ-д байгаа. Сая төсөв батлахад ирц нь 72 байх ёстойгоос гээд санал хураагдаж байна.
Ё.Баатарбилэг энэ далан хоёр дотор нь байгаа бололтой. Хөгжлийн банкны хэргээр шүүхээс зургаан жилийн хорих ял оногуулчихсан түүнд. УИХ дээр түүний асуудлыг нэг тийш болгох эсэх хүлээгдээстэй байгаа.
Ж.Мөнхбат, Д.Бат-Эрдэнэ, Т.Аюурсайхан гэдэг хүмүүс гэмт хэрэг хийсний улмаас шалгуулж, зарим нь нэгэнт шүүхийн танхимд зогсоод удаж байна.
Х.Нямбаатар гэдэг хүн УИХ-ын гишүүнээ болиод, Хотын захирагч болоод явчихсан. Одоо Ё.Баатарбилэг нөгөө яллагдсан газар руугаа явбал УИХ далан нэгэн гишүүнтэй болно.
Эндээс бид төрийн эрх барих дээд байгууллагаа харахад л, үнэхээр авлига, албан тушаалын гэмт хэрэгтнүүдтэй маш том эрэмбийн эгнээ болж харагдах.
Энэ учраас л Эрүүгийн хуульд өөрчлөлт оруулахад өршөөл, магадланг яагаад байлгах гээд байгааг мэдэж ядах зүйлгүй.
Чухам ийм учраас Ерөнхий сайд Л. Оюун-Эрдэнэ амаргүй нөхцөлд, энэ нам, энэ улсыг удирдаж байгаа нь мөн үнэн. Түүний ард түмнээсээ дэм авна, хамтарч тэмцэнэ гээд байгаа нь ийм л учиртай.
Авлигажсан төр, системийг цэвэрлэж байж л урагшилна. Ингэхийн тулд хатуу чанга байхаас аргагүй. Гэхдээ, Б.Энхбаяр сайд аа!, айраг уугаад багаж үлээж "яллагдах иргэдээс илүүтэй" авлигач улс төрчдөө, мөр зэрэгцэн суугаа "ангийнхнаа" хэрхэн яллахаа эхлээд бодох нь цаанадаж улс орны ирээдүйд, сонгуульд, наанадаж таны хувийн карьерт нэмэртэй гэдгийг эрхбиш бодно буй за.
Монголчууд бид ёс зүй, сахилга баттай байж, чанартай амьдралын төлөөх эрмэлзлээр нийгмийн болж бүтэхгүйг ялах учиртай.
Үүний тулд л Ерөнхий сайд Л. Оюун-Эрдэнэ тэмцэл хийгээд байгааг дэмжихээс аргагүй !
Б.ДОРНО
Amlalt.mn
