Маргаашийн шүүх хурлаас маш их өөрчлөлт ирнэ гэж ард түмэн харж байна. Монголын цагаан захтнууд, авлига, албан тушаалын гэмт хэрэгтнүүдийг шүүх асуудал нийгэмд эхлээд маш цуурай, том өнгөнөөс илэрхийлэгддэг ч, мөн чанартаа тэгсгээд мартагддаг, гэмтнүүд ял завшдаг байдал тогтоод удлаа.
Прокурорын дэргэд дэх Мөрдөн байцаах албыг үгүй болгосноор энэ асуудал улам бүүр гаарч, цагдаагийн хурандаа нар өөрсдөө гэмт хэрэгтэнтэй "хуйвалддаг" болж, алтан бөгжтэй прокурорууд олширч асуудлыг эрх мэдэлтний талд шийдвэрлэдэг "шүүгчид" гаарлаа.
Хэдэн ишигний "гэмт хэрэгтэн" ардууд эрх чөлөөгөө хасуулж байхад, эх орноо цөлмөгсөд улам бүр тарвалздаг болоод удаж байгаа. Эрх мэдэлтнүүд, авлигачдыг шүүх асуудал арван жилээр хойшлогдож, улмаар сарнин замхардаг.
Маргааш Эрдэнэт үйлдвэрийн 49 хувь, Хөтөл цемент, Дарханы төмөрлөгийн үйлдвэрүүдэд гарсан, шамшигдуулан залилж, улс эх оронд онц хохирол учруулсан хэргийг хянан хэлэлцэх шүүх хурал болох юм.
Энэ хурлын үр дүнг үнэхээр гараасай, үнэн зөв шийдэгдээсэй гэдгийг ард түмэн үнэхээр харж байна. Энэ шүүх хурал л үнэхээр шударгаар шийдэгдэж, гэмт хэрэгтнүүд учруулсан хохирол, шударга бус, авлигач, идээч уугаач бирдийн шуналдаа таарсан ял зэмээ авах нь Монголын ард түмний хувь заяа, шударга ёсны эрх чөлөө, үнэлэмжид туйлын чухал болох юм.
Монголд хэдэн тэрбумаар нь, их наядаар нь идэж хулгайлж, улс төр, шүүх , намыг, гишүүдийг хүртэл авлигадан хүссэнээ хийдэг, хийлгэдэг байдал маргаашийн шүүх хурлаар эцэс болох ёстой.
Ингэж төрөөсөө, улсаасаа, эх орноосоо, ард түмнээсээ дээгүүр эрэмбэ эдлэн цөлмөгсдийг хойшид ингэж болохгүй юм аа гэдэгт маргаашийн шүүх хурал хариу хэлэх ёстой.
Сахал Д.Эрдэнэбилэгийн толгойлсон гэх энэ хэрэгт сайд асан Д.Эрдэнэбат, Б.Болор, Н.Батбаяр, Үндсэн Хуулийн Цэцийн гишүүн асан Ц.Нанзаддорж, Д.Сугар нарын өндөр тушаал хашиж байсан хүмүүс, Худалдаа хөгжлийн банкны захирал О.Орхон, Д.Эрдэнэбилэгийн шадрууд болох Э.Шижир, Ц.Пүрэвтүвшин нарын хорь гаруй хүний яллагдах асуудал яригдах юм.
Монголд шүүх гэж байгаа бол, үнэн зөв ажиллаж эхлэх гэж байгаа бол, үнэн зөв ажиллах бол маргаашийн шүүх хурлаас бүгд харагдана.
Ард түмэн үүнийг маш тодорхой ажиглан анзаарч байна. Лавтайяа зургаан жил хойшилсон шүүх хурал шүү дээ. Эрх мэдэлтнүүд, албан тушаалтнуудыг шүүх асуудал Шүүхийн байгууллага дээр сарнин замхардгийн сүүлч маргаашаар хязгаарлагдаасай, шүүх шинэчлэгдээсэй, олон нийт харж л суугаа шүү.
Т.ГАРЬД
Amlalt.mn
