Өмнөд хөрштэй хиллэдэг Өмнөговь аймгийн Ханбогд сум Монголынх эсэх эргэлзээтэй болжээ. Тэндхийн, монгол газар дамын наймааны бодит сурвалж, бай болсныг өчигдрийн Нүүрсний хянан шалгах түр хорооны сонсголоор харцгааж байна, бүх монголчууд. Газар эзэмших эрхгүй гадаадын иргэд эзэмшсэн нь бүртгэлээрээ тодорхой харагдах тавиад компанийг үзүүлэв. Өмнөговь аймаг, ерөөсөө Монголын бус, тусдаа бие даасан “улсын” түвшинд очжээ гэдэг дүгнэлтийг өчигдөр мөн хийв, монголчууд.
Үндсэн хуулийг зөрчсөн олон асуудал “Таван толгой”-д нүүрлэснийг бүгдээрээ үзлээ. Энэ асуудалд оройлох буруутай хүн бол “Ажнай”-н Д.Бат-Эрдэнэ болохыг ч харцгаалаа. Тус компанийн нийтлэг эрх ашгийг өөртөө, өөрсдийн хүрээлэлдээ зориулан, ТУЗ-ийг эрх ашгийн шуналд автсан,үүний төлөө юу ч хийж чадах улсаар бүрдүүлэн дураараа дургиж, дунд чөмгөөрөө жиргэснийг ард түмэн үзэн тольдов.
Д.Бат-Эрдэнэ Ардчилсан намын МҮДН фракцын хүмүүн. Энэ фракц Өмнөговьд хэрхэн туйлж, яаж хууль, ёс суртахууныг уланд гишгэснийг өчигдөр үзүүллээ. Самбуугийн Ламбаа охиноо, Нямжавын Батбаяр охиноо, Лувсаннямын Гантөмөр эхнэрээ, Ринчиннямын Амаржаргал охиноо, Цэвэлмаагийн Баярсайхан эхнэрээ тус тус "нүүрсэнд оруулан" хусчихаж.
Мөн Дондогдоржийн Эрдэнэбат, Д.Зоригт нар нийлээд компани байгуулаад л нүүрсдэж байж. МҮДН бол Ардчилсан намын суурь болсон фракц, нэр цэвэр гэгддэг улс төрчид, хамгийн чухал албан тушаалуудыг авдаг байсан нөхөд.
Эд нар л ийм үйлдэл сэтгэхүйтэй, тэгээд үр хүүхдүүдээ оруулаад ингэж туйлахаар юу ч гэхэв дээ, хэлэх үггүй байна бус уу.
Нөгөө сүрхий Р.Амаржаргал, нөгөө сүрхий С.Ламбаа тэргүүт ингэхээр монголчууд хэрхэн юу гэх нь ойлгомжтой. Нүүрс тээвэрлэлт, худалдан авах ажиллагааны бүх эрх ашиг ингэж “Ажнай”-г тойрч, Ардчилсан намын тэргүүт, мөн Өмнөговь аймгийн ИТХ гэдэг илжирсэн байгууллагынхныг нөмрөн, утга замбараагаа алджээ.
Өмнөговь аймаг, жижиг “Тавантолгой”-г тойрсон энэ байдал ингэж, улс орны аюулгүй байдалд улаан гэрэл нэгэнт асаасныг Б.Энхбаярын ахалсан сонсгол ил болгов.
Б.Энхбаярыг бүх мэдээллээ өөртөө аваад, бусдадаа өгөхгүй байгаа гэж Наянтайн Ганибал гишүүн хэлжээ. Ингэж болохгүй л дээ. Б.Энхбаяр гэдэг эзэрхэг ч гэмээр, ил шулуун нь зөв ч гэмээр байдал юутай ч дарьтай авлига тонуулыг дэлбэлж л байна. Гэхдээ нөхөдтэйгээ, зэрэгцээ суугаа хүмүүстээ мэдээллээ өгөх нь зөв дөө. Б.Энхбаяр ирэх сонсголоор, тодруулбал том “Таван толгой” буюу “Эрдэнэс таван толгой”-г ярихад манай намынхан илүү гомдоно гэсэн. Үнэн. Чухам үнэн. Б.Ганхуягаас эхлээд хэлэхээ жимбийтэл бэлдээд сууж байгаа. Б.Энхбаярын хэлсэн жинхэнэ нүүрсний хулгайч чухам тэр “Эрдэнэс таван толгой”-ыг дэлгэх сонсголоор ил болно гэж ард түмэн хүлээж байна.
Жижиг таван толгой дээр ингэсэн улс, том толгой дээр яаж буйлсныг Б.Энхбаяр минь яруу тод харуулаарай. Намынхнаа гомдоох юу ч биш ээ, ард түмэн түмэн чинь голдоо ортол гомдоод, хэлэх үгээ олж ядаж байна, жижиг “Таван толгой”-н асуудлыг хараад л. Жижиг таван толгойн сонсгол багагүй мэдээлэл дуулгаж байгаа бол удахгүй хийгдэх "Том таван толгой, Эрдэнэс таван толгой”-н сонсголоос их юм гарна. Ойлгомжтой. Ээ дээ, Б.Энхбаяр сайд аа, энэ эрчээ бүү алдаарай, их хулгайч нарыг, 44 их наядын хулгайчдыг “элэгдэн элэгдэн” илчлээрэй.
Т.Доржханд их туслах байх. Тэр 44 их наяд гэдэг гаргалгаагаа, үгээ улайтал нэхэх байх. Удахгүй Ардын нам хэнээр, ямар дарга нараар нүүрсэнд гар дүрснийг үзэцгээе, ард түмээн!
З.БАЯР
Амлалт.мн
