“Х.Баттулгын улс төр улсаа хорлов” нэртэй нийтлэл “Ньюс.мн”-д гарчээ. Шатахуун, эрчим хүчний хомсдолыг хамааруулан хэлж байх шиг байна. Спикер Г.Занданшатар хэлэх юм. Үл үзэгдэгч нэгэн л Монголыг муухай харагдуулах, муу болгон тамирдуулахыг хийдэг гэсэн утгатай үг хэллээ. Үл үзэгдэгчийг өөрөө мэдээд байгаа шиг байна. Шууд хэлэх хэрэгтэй юм даа. Монгол үнэхээр туйлдаж байна. Эх оронч улс төрчид, энэ орны эрх мэдлийн дээр суугсдынхаа зоолол дор ард түмэн турж, гундаж гүйцлээ.
Ерөнхий сайд асан Санжийн Баяр Барилга хот байгуулалтын сайд эдүгээ, Эрчим хүчний сайд явсан Ц.Даваасүрэнгээс Монголд хөрөнгө оруулалтаар баригдах гэж байсан тодорхой нэг эрчим хүчний төсөл яасан бэ гэж асуугаад тав зургаан жилийн нүүр үзэж байна аа гэсэн байна лээ.
Угаасаа гацсан бус, гацаасан төслүүд гээд сунагар жагсаалт цахимаар нэг явж байгаа. Таван толгой, Тэлмэн гээд. Энэ бүхнийг С.Баяр шиг Ц.Даваасүрэн, Л.Гүндалай, Ц.Сэдваанчиг гээд зартай улс төрчдөөс нэг бүрчлэн асуух ёстой юм даа. Хариулт нь нэн тодорхой гунигтай.
Эрчим хүчний гуйланчлал, хомсдол, ард түмний үгүйрэл, хөгжлийн гүн хоцрогдол. Мөн ч “гавьяатай” эх орончидтой улс даа.
Нийтлэлч Баабар өгүүлжээ. Монгол бол үнэмлэхүй их импортын орон билээ гэж. Гэтэл Хөдөө аж ахуйн сайд Хаянгаагийн Болорчулуун импортын гол нэрийн бүтээгдэхүүнүүдэд татвар нэмнээ гээд яваад байх шиг байна. Нийгэм бараг ухаан алдах нь. Үнэмлэхүй импортын бүтээгдэхүүнүүддээ татвар нэмэх гэх нь сүхээр балбаж байгаагаас ер өөрцгүй нь ойлгомжтой.
Улаанбаатар, улс орон чигтээ гантиглажээ, мөсөн хучлагад. Улс төр мөн гантиглажээ, хор хордлогын мөстлөгт.
“Эргэлт.мн” сайтад өнөөдөр нэг нийтлэл гарчээ. Уншаарай. “Колонктой нүүрсчид буюу тэд шатахууны хомсдол үүсгэсэн үү” гарчигтай. Монголыг Монголын улс төрчид хорлож байна, тэдэнд яагаад энэ орон үзэн ядагдах болов гэдэг агуулга тэндээс уншигдаж байна. Яагаад , яагаад, яагаад. Монголын ард түмэн УИХ-д байгсдыг төрийг төр шиг авч явж, Үндсэн хуулиар олгогдсон хүний амьдрах, амьд явах язгуур эрх, эрх чөлөө, эрх ашгаар хангаж хууль тогтоохыг хүсэн сонгож төрд илгээсэн.
Гэтэл тэд нь эрх мэдэл, боломжийг өгсөн бүгд рүүгээ нулимж байна. Даан ч дээ. Нүүрсний дөчин их наядын сонсгол гурав хоногийн дараа болно. Бүх асуудлыг мэдэх Б.Ганхуяг хэмээх ганцхан хоригдогчоо гаргаж сонсголд оруулна, оруулахгүй гээд жил тойрч байна. Шүүхээс бололцоогүй гэсэн үгтэй. Монголд ер нь болж байгаа юм байна уу. Үнэн гутам. Энэ эх орон, ард түмэн улс төрчдөд өргүй, тэр тусмаа ингэж доромжлуулан дээрэлхүүлэх ямар үйлийн үртэй болоод энэ вэ.
Б.ДОРНО
Амлалт.мн
