Засгийн газрын ээлжит хуралдаан болж хуралдаанаар хэлэлцсэн асуудлын талаар холбогдох сайд нар мэдээлэл хийлээ. Хэвлэлийн хуралд Эдийн засаг хөгжлийн сайд Ч.Хүрэлбаатар, Сангийн сайд Б.Жавхлан, Уул уурхай хүнд үйлдвэрийн сайд Ж.Ганбаатар нар оролцлоо.
АИ92 дараах долоон компанийн 200 гаруй ШТС-аар зарж байна
Уул уурхай хүнд үйлдвэрийн сайд Ж.Ганбаатар “Энэ сард Роснефть компаниас 51, бусад компаниас 15, нийт 71 мянган тонн АИ92-ыг ОХУ-д захиалсан. Өнөөдрийн байдлаар 54 мянган тонн АИ92 орж ирсэн байна. ОХУ-д 253 мянган вагон Монголд орж ирэхээр ачигдаад явж байна. Энэ шатахуун ороод ирсэн тохиолдолд манай дундаж хэрэглээнээс 10 мянган тонноор илүү орж ирнэ. АИ92 шатахууны үнэ нэмэгдэхгүй. Евро5 АИ92 бас борлуулагдаж байгаа.
Дизель түлшний хэрэглгээ сүүлийн гурван сард эрс нэмэгдсэн. Роснефть компаниас 72, бусад компаниас 40 мянган тонн, БНХАУ-аас 31500 тонн дизель түлш захиалсан. Үүнээс өчигдрийн байдлаар 115921 тонн нь орж ирсэн байна. Дахин 14480 тонн буюу нийт хэрэглээнээс 25 мянган тонн илүү түлш энэ сард орж ирэхээр байна. Түлшний үнэ өсөхгүй.
Улаанбаатар хотод АИ92 шатахууны хомсдол үүсээд удсан. Өнөөдөр Шунхлай, Петровис, Тэс петролум, Сод Монгол, Монсуль, Газ ойл, Синчи ойл, Магнай трейд гэсэн долоон компанийн 200 орчим шатахуун түгээх станцуудаар АИ92 борлуулагдаж байна. Бусад салбар багатай, шатахуун түгээх станцууд дээр АИ92 зарагдахгүй байгаа. АИ92 хангалттай байгаа, сандрах зүйл байхгүй. Өчигдрөөс улсын хэрэглээ хэвийн болсон. Хэрэглээ олон зүйлээс болж нэмэгдэж байна. Нийлүүлэлт тогтвортой байгаа ч хэрэглээ нэмэгдсэн нь нөөцийг бууруулж байна” гэлээ.
Хөгжлийн банкийг экспорт, импортыг дэмжих банк болгоно
Сангийн сайд Б.Жавхлан: Төр хувийн хэвшлийн түншлэлийн тухай хууль ирэх оны нэгдүгээр сарын 1-ээс хэрэгжиж эхэлнэ. Тиймээс хуулийн хэрэгжилтийг хангах үүднээс Засгийн газар 11 журам батлах ёстой. Эдийн засаг хөгжлийн яам 9-ийг нь батлуулсан бол өнөөдөр Сангийн яам хоёр журмыг оруулж батлууллаа.
Мөн Хөгжлийн банкин дээр сүүлийн хоёр жил авч хэрэгжүүлсэн арга хэмжээний хүрээнд чанаргүй зээлийн хэмжээ буурч Хөгжлийн банк өөрийн эх үүсвэрээрээ 500 сая ам.долларын евро бонд, 30 тэрбум иенийн Самуурай бондуудын эргэн төлөлтийг амжилттай хийлээ. Цаашдаа банкны засаглалыг сайжруулж, сонгодог экспорт, импортын санхүүжилтийг хийдэг банк болгохоор эрх зүйн шинэчлэлийг өнөөдөр танилцууллаа. Ойрын хугацаанд УИХ-д хуулийн шинэчилсэн найруулгыг өргөн барина.
Эдийн засаг хөгжлийн сайд Ч.Хүрэлбаатар: Засгийн газар 2024 оныг бүсчилсэн хөгжлийн дэмжих жил болгон зарлах шийдвэр гаргалаа. 2001 онд баталсан Бүсчилсэн хөгжлийн үзэл баримтлалаас хойш 22 жил өнгөрсөн байна. Бүсчилсэн хөгжил гэж ярьдаг ч үүнтэй холбоотой ямар нэгэн арга хэмжээ хийгддэггүй байсан. Монгол Улсыг бүсчилсэн хөгжлөөр явуулбал илүү хурдтай хөгжинө гэж үзэж Засгийн газар ийм шийдвэр гаргалаа. Хүн амын 47 хувь нь Улаанбаатарт, 53 хувь нь хөдөө орон нутагт байдаг. Нийт худалдаа үйлчилгээний 80 хувь нь Улаанбаатарт байна. ДНБ-ний 63 хувь нь нийслэлд 37 хувь нь хөдөө орон нутагт байна. Нэг үгээр хэлбэл, зөвхөн Улаанбаатарт хөгжил явагдаад хөдөө орон нутаг хөгжихгүй байна. Тиймээс цаашдаа ард иргэдийнхээ амьжиргаа, орлогыг нэмэгдүүлэх, улсынхаа хөгжлийн түргэсэхийн тулд 2024 оныг бүсчилсэн хөгжлийн жил болгон зарлалаа.
Үндэсний орон сууцны санхүүжилтийн Корпорацийг байгуулж, эмзэг бүлгийн иргэдийг ипотекийн зээлд хамруулна
Барилга хот байгуулалтын сайд Ц.Даваасүрэн: Өнөөдрийн Засгийн газрын хуралдаанаар Үндэсний орон сууцны санхүүжилтийн корпорацийг байгуулахаар шийдвэрлэлээ. Ипотекийн зээлийг 2024 онд багтаан Монголбанкнаас Үндэсний орон сууцны санхүүжилтийн корпорацид шилжүүлнэ. Ингэхдээ одоо явж байгаа ипотекийн тогтолцооноос онцлог, багц хөтөлбөрүүдийг хэрэгжүүлнэ. Жишээлбэл, Миний анхны орон сууц гэж залууст зориулсан. Мөн төрийн албан хаагч, хөдөө орон нутагт ажиллаж амьдарч байгаа иргэдэд зориулсан хөтөлбөрийг хэрэгжүүлнэ. Орлого багатай иргэд ипотекийн зээлд хамардаж чадахгүй байна. Зээл авсан өрхүүдийг харахаар сарын орлого нь хоёр сая төгрөгөөс дээш байна. Тиймээс хоёр сая төгрөгөөс доош орлоготой иргэдийг ипотекийн зээлд хамруулна. Харин санхүүжилтийг төсвөөс юм уу, өөр газраас босгоно.
