Гуравхан хоногийн дараа шинэ он гарна. Ирэх 2024 онд монголчууд нэн ухамсартай, сахилга баттай, хариуцлагатай сонголтыг өөрсдийнхөө төлөө хийх хэрэгтэй байна.
Зургадугаар сарын 26 гэдэг өдрийг өдөр бүр санаад, эрх баригчдын амлалтыг санан санаж, биелэлтийг нь тооцон тооцож саналаа өгөхөд бэлдэх л хамгийн чухал.
Эс тэгвэл худал амлалтад нь хууртсаар, дахин дахин эрх бариулсаар утаан дундаа сууж, угаартаж эндсээр, эрчим хүчний хязгаарлалттай, шатахуун түлшний бадар бариатай, дугаарлал сааталтай амьдарсаар байх болно.
Монголчуудад, одоо нэг ч өдөр, алдах эрхгүй ухаарал л хэрэгтэй байна. Бид жинхэнэ улс төрчийг, энэ улсаа удирдах зохист хүнийг л олж сонгох явдал бидний аврал. Арван зургаан оны амлалтыг хорин оныхтой хольж нэхэх хэрэггүй гэж байгаа эрх баригч намын УИХ дахь Бүлгийн дарга Д.Тогтохсүрэнтэйгээ байгаад байх юм уу.
Энэ хүн нүүрсний хэргийн явдал дөнгөж эхэлж байхад л манай намд нүүрсчин байхгүй ээ гээд мэлзээд зогсож байсан. Эрх баригч намын бүлгийн дарга нь ийм байхаар бид хэндээ итгэх вэ.
Сарын өмнө Түгжрэлийн сайд Б.Дэлгэрсайхан энэ арванхоёрдугаар сард багтаагаад метроны ТЭЗҮ-г хийгээд, олон улсын тендер зарлана гэж байв. Өчигдөр Х.Нямбаатар нь ирэх сард гээд он давуулж байна. Ингэж л худлаа хэлэх нь өдөр болгон болсон удирдагчидтай, бид.
Э.Бат-Үүл гэдэг дарга энэ метрог тэртээ арван долоон онд байгуулчихсан байна гэж зарлаж байв. Ингээд, ингээд л худлаа хуурмаг нь он жилүүдийг дараад байхаар ард түмэн дороос нь босохоо байж, хоногийн хоол төдийтэй шар хоног, бор өдрийг өнгөрөөсөөр.
Улсаа тоноод, нүүрсний дөчин их наядын хулгай хийснийг бид ард түмнээрээ харлаа. Нүүрсний хулгайг хэн хийснийг маш сайн мэдэх гол гэрчээ Нүүрсний сонсголд оруулахгүй. Маш олон гол гэрч нь гадаадад дүрвэсэн. Хариуцлагын асуудал нь далан бутархай хэвээр байна.
Гэхдээ л, юутай ч гэсэн сонсголоо хийж, өмхийгөө ярьж байгаа нь дэвшил. УИХ-ын гишүүдийн маш олон нь хэрэг түвэгтэй холбоо хамааралтай нь ил болсон. Бас цөөнгүй гишүүн гэмт хэргийн улмаас суудлаасаа бууж одсон.
Нэг үгээр хэлбэл, дээдсийн нь хулгай, худал энэ улс орныг гүн өвчлүүлжээ. Тийм учраас л бид ирэх оныг нэн хариуцлагатай шинэ сонголтын жил болгох хэрэгтэй. Утаа, угаартаа умбан манантсан монголчууд минь ээ, сэр ээ, сэрцгээ. Тэртээ хориод жилийн өмнө Нацагийн Багабанди сонгуулийн өмнө шинэ жилээр нэн хариуцлагатай шинэ сонголтын жил байг ээ гэж зарлаж байсан.
Тэгэхэд эдүгээ эзэн суугаа МАН мөн засаглаж байсан. Н.Багабанди мөн намын хүн атлаа тэгж хэлж байв. Эдүгээ ч МАН-аас сонгогдсон хүн Ерөнхийлөгчөөр ажиллаж байна. Тэр хүнд ч ийн хэлэх сэдэл санаа төрж байх магадтай.
Монголчууд аа, 2024 оныг нэн хариуцлагатай шинэ сонголтын жил болгоё!
Б.ДОРНО
Amlalt.mn
