Шинэ оны босгон дээр улиран өнгөрч буй оны эхэнд улс төрчид, албан тушаалтнуудын амласан амлалт, хэлсэн үгний талаар 5 биелсэн, 5 биелээгүй амлалтыг ТАНИЛЦУУЛЪЯ.

ХЭРЭГЖСЭН 5:

1. Ерөнхий сайд Л.Оюун-Эрдэнэ: Өнгөрөгч оны 12 сард Сүхбаатарын талбай дээр болсон Нүүрсний хулгайг эсэргүүцсэн олон нийтийг хамарсан жагсаалын “Миний бие Засгийн газар, УИХ, Монгол Улсын Ерөнхийлөгчтэй хамтарч нүүрсний хулгайн асуудлыг гаргаж, ард нь гарах болно” гэсэн. Ямартай ч УИХ дээр Хууль зүйн сайд Б.Энхбаярын ахалсан Нүүрсний сонсгол болж, Их бага Таван толгойгоос нүүрс хэрхэн “хулгайлдаг” тухай мэдээллийг иргэд нийтээрээ сонслоо. Энэ амлалт тодорхой хэмжээгээр хэрэгжсэн боловч шүүхээс нүүрсний хулгайд холбогдогчдыг шалгах, хариуцлага оногдуулах асуудал удаашралтай байна.

2. УИХ-ын дарга Г.Занданшатар өнгөрсөн 5 сард Баянзүрх дүүргийн иргэдтэй уулзах үеэрээ “Ирэх намрын чуулган бүхэлдээ авлигын эсрэг чуулган болно” гэж хэлсэн. Түүний даргалж байгаа парламент авлигатай холбоотой гэмт хэрэгт ялын бодлогыг чангатгах тухай зохицуулалтыг Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд тусгасны зэрэгцээ, Нүүрсний сонсголын хэдийгээр улс төрчдийг байлцуулж чадаагүй боловч зохион байгуулж чадсанаараа Г.Занданшатарыг хэлсэн амлалтдаа хүрсэн гэж дүгнэж болохоор байна.

3. Цахим хөгжил, харилцаа холбооны сайд Н.Учрал 8 дугаар сард “Наймдугаар сарын 1 гэхэд төрийн үйлчилгээг 100 хувь цахимжуулж дуусгана” гэж хэлж байсанчлан энэ жил 100 хувь биш ч гэсэн төрөөс авах иргэний олон үйлчилгээ Е-Mongolia платфорд орж чадсан нь түүний эхлүүлсэн ажил үр дүнтэй болж, хэлсэн үгэндээ хүрч байгаагийн илэрхийлэл гэж үзэж болохоор байна.

4. Хотын дарга Х.Нямбаатар: 12 сарын 29-ны өдөр нийтийн тээврийн шинэчлэлийн хүрээнд шинэ автобусыг нийслэлд оруулж ирж, үйлчилгээнд гаргана гэсэн. Өчигдрийн байдлаар 35 автобус Замын-Үүдийн гаалиар нэвтэрч өнөөдөр Улаанбаатар хотноо ирж, шинэ оны эхнээс нийтийн тээврийн үйлчилгээнд гарах нь бололтой. Тэгэхлээр Хотын дарга Х.Нямбаатарын 11 сард амласан энэ амлалт хэрэгжсэн гэж хэлж болохоор байна.

5. 2020 оны УИХ-ын сонгуульд МАН-ын дэвшүүлсэн мөрийн хөтөлбөрт “Ардчилсан намын эрх барьж байх үеэс эхлэлтэй Мазаалай бондын 500 сая, Чингис бондын 1 тэрбум, Гэрэгэ бондын 800 сая, Хуралдай бондын 600 сая ам.долларын тулгамдсан өрийн дарамтаас гарна” гэсэн заалт бий. Тэгвэл Засгийн газрын тэргүүн Л.Оюун-Эрдэнийн Засгийн газар өмнөх газрын газрын тавьсан бондын өр болох 13.3 их наяд төгрөгийн зээлийг өргөн төлсөн нь МАН мөрийн хөтөлбөртөө тусгасан нэг амлалтыг биелүүлсэн хэрэг боллоо.

ХЭРЭГЖЭЭГҮЙ 5:

1. Эрчим хүчний сайд Б.Чойжилсүрэн өнгөрсөн 8 сард хэлэхдээ: Нийслэлийн агаарын бохирдлыг бууруулахын тулд 177 тэрбум төгрөгөөр БНХАУ-аас хагас коксжих нүүрс авах асуудлыг ЭХЯ-аас оруулж ирнэ. Хагас коксжих нүүрсээр шахмал түлшний мидлингийг орлуулснаар агаарын бохирдлыг бодитой бууруулна. Оруулж ирсэн түлшээр 12 дугаар сарын 15-ны өдрөөс 2024 он 02 дугаар сарын 01-ийг хүртэл Нисэх, Яармаг, Налайх Багануур дүүрэг, Дархан-Уул аймагт туршина гэсэн. Гэвч Б.Чойжилсүрэн сайдын тооцоо судалгаагүй хэлсэн энэ нь олон нийтийн эсэргүүцэлтэй тулгарч хэрэгжээгүй.

2. Өнгөрсөн зуны 7 сард орсон борооны улмаас Сэлбэ гол нарийн хэсгээрээ үерлэж, олон арван иргэд, айл өрх, ААН-үүд хохирсон. Үүнтэй холбогдуулан Хотын дарга Д.Сумъяабазар 8 дугаар сард Сэлбэ голын үеийн далангийн гольдролыг өөрчилж барьсан Авлига хороолол гэж нэрлэгдэх болсон Aqua Garden төслийн хоёр блокыг, мөн S.Outlet дэлгүүрийг буулгана гэсэн амлалт өгсөн ч хэрэгжээгүй төдийгүй мань дарга өөрөө огцорсон.

3.Ногоон автобусны дуулиантай зэрэгцэн ЗГХЭГ-ын дарга Д.Амарбаясгалан “Ногоон автобусны асуудалд Дарханаас сонгогдож байсан өмнөх гишүүд холбоотой” гэж хэвлэл мэдээллийн хэрэгсэлд хандан хэлсэн ч тэр нь хэн байсан, яагаад хариуцлага тооцоогүй, хэрэв худал хэлсэн бол яагаад үүнийгээ залруулаагүй нь тодорхойгүй хэвээр үлдэв. Тиймээс түүний энэ хэлсэн үг хэрэгжээгүй амлалтын тоонд зүй ёсоор орно.

4. 12 сарын эхээр бензин шатахуун тасарч, жолооч нар ШТС-руу бензинд хэдэн цагаар дугаарлав. Энэ үеэр Уул уурхай, хүнд үйлдвэрийн сайд Ж:Ганбаатар: Шатахуун тасалдаж, иргэдэд хүндрэл учруулж байгаад хүлцэл өчье. Удахгүй 3-5 хоногт багтаж шатахууны түгээлт хэвийн болно гэж амласан ч түүний хэлсэн үг худал болох нь тодорхой болж, лавтай 14 хоног иргэд шатахуунд дугаарладаг хэвээр байв. Тиймээс түүний энэ амлалтыг хэрэгжээгүй амлалтад оруулж байна.

5.Боловсролын зээлийн сангийн будилаан, зээлийн эргэн төлөлт хийгддэггүй, дарга сайд нарын хүүхдүүд зээлд хамрагддаг гэх зэрэг суудлын хүрээнд БШС-ны сайд Л.Энх-Амгалан Засгийн газрын хуралдааны дараа хэвлэлд өгсөн мэдээлэлдээ “Боловсролын зээлийн сангаас авсан мөнгөө эргүүлэн төлөөгүй байгаа иргэдийг АТГ-т өгч шалгуулж байгаа” гэж хэлсэн боловч ч дараа нь хэн хэнийг АТГ-аас шалгасан, хэн хэн буцааж зээлээ төлсөн, хэдэн хүн төлөөгүй байгаа талаар мэдээллийг өгөөгүй юм. Иймээс түүнийг амлалт, хэлсэн үгэндээ хүрч чадаагүй улс төрчийн тоонд оруулав.

Амлалт.мн сайтын редакци