Парисын Версаль дуурийн театр, Сиднейн театр, Шанхайн “Jaguar symphony Hall”-д Морин хуурын чуулга өнгөрөгч онд утга төгөлдөр эгшиглэлээ. Таван мянга дөрвөн зуун хүн урам аялгуу сонсож, Монголыг бахаджээ.
Монгол соёлын охь аялгуу болсон энэ чуулга Монголын нэрийг үлэмж дархалж ирсэн. Нэрийн хуудас байснаа нэр төртэй үргэлжлүүлж байна. Өдгөө илүү өндөр агуулгаар дуурсаж, манай соёлын ололт, гадаад дах дэвшлүүд нэн шинээр илүү өргөн хэлбэр тавилаар цуурайлах болсон нь Соёлын яамны үйл ажиллагаанаас харагдаж байгаа юм.
Улс орны хөгжсөний, хөлгөн түүхтэйн сонгодог илэрхийлэл бол ердөө соёлын хэмжүүр гэхэд хилсгүй. Лондонд бид “Монгол хан” жүжгээ тоглуулж чадлаа. Үзэгч дүүрэн шүү, олон өдөр. Дөчин мянган үзэгч гэдэг Англид огт чамлагдахааргүй тоо шүү.
Олон улсын мэргэжлийн уралдаан наадмуудад АНУ, БНЧУ, БНХАУ, ХБНГУ, АНЭУ, Швейцар, Монако, Япон, БНИУ, БНФУ, ОХУ зэрэг 10 гаруй улсад нийт 100 гаруй уран бүтээлч ур чадвараараа манлайлан, эх орноо сурталчилжээ.
Монгол Улсын Засгийн газрын 2023 оны 103 дугаар тогтоолоор “Монгол Улсын олон улс дахь сурталчилгаа, мэдээллийн Үндэсний хороо”-г Соёлын сайд Ч.Номингоор ахлуулан шинээр байгуулсан нь ийнхүү системтэй сурталчилгаа, Монголыг даянд гэгээн үзэгдэх боломжуудыг илүү өргөнөөр түрж байгааг сайшаахаас аргагүй.
Аялал жуулчлалын өндөр үзүүлэлтүүд, Зам тээврийн эерэг дэвшлүүд энэ бүхэн чинь соёлын үйл ажиллагааны л үр дүн гэдгийг бид ойлгох хэрэгтэй. Монгол соёлын цолгорол, нандин сайханаа өргөн цогцоор илүү өргөн сурталчилж, улсаа өөрөөр харагдуулах ажил энэ Засгийн өнгөн дээр тун чимэглэг дэвжиж, илүү ч ололт дагуулах бололтой.
Соёлын яам гадаад харилцаа, мэдээлэл сурталчилгааны нэгж, Ажлын албатай болж өргөжин олон улсын хэвлэл мэдээллийн CNN, Netflix, HBO, Warner Bros, Paramount Pictures, Discovery, National Geography, Living Films, Tik Tok зэрэг дэлхийн томоохон байгууллагуудтай хамтын ажиллагааг эхлүүлж,бодит үр дүн үзүүлснийг цохох ёстой.
Монголын талаарх эерэг ойлголт 38 хувиар өссөн нь, мөнөөх зунжин цахимаар сурталчилсан Солонгос охид, залуус тэргүүтэй нөлөөлөгчдийн л ач тус. Ингэж байж л улс орон соёлоороо, аялал жуулчлалаараа дамжин эдийн засгаа тэлэх нэн ач тустай.
Дэлхийн шилдэг контент бүтээгч, хөрөнгө оруулагчдын “Nas Summit-2023” арга хэмжээг Улаанбаатар хотноо 2023 оны 8 дугаар сард зохион байгуулж, тус арга хэмжээнд цахим нийгмийн сүлжээнд олон сая дагагчтай 10 орны 19 нөлөөлөгчид Монгол Улсаар аялж, “Нүүдэлчин” дэлхийн соёлын фестивалийг нүдээр харж, Монголын тухай олон сонирхолтой контент хийж олон нийтийн цахим сүлжээгээр түгээн тархаасан бөгөөд Instagram, facebook, tiktok, youtube зэрэг цахим сүлжээнүүдээр нийтдээ 40 контентыг нийтэлж 155 сая орчим хүнд хүргэж чадсан нь хэзээ ч байгаагүй үйл ажиллагаа болсон аж.
Энэ арга хэмжээг жил бүр илүү нягт, илүү хариуцлагатай, илүү бүтээлч зохион байгуулаад л байвал бидэнд асар их боломж байгааг харуулав.
Засгийн газрын соёлын салбарт хэрэгжүүлж байгаа үйл ажиллагаанууд ийнхүү бодит үр дүнгээ өгч байгаад маргах аргагүй. Өвлийн аялал жуулчлал ч илэрхий сэргэх төлөв үзэгдэж байгаа.
Чинбатын Номин өөрөө төдийлөн их реклам сурталчилгаа хийхгүй ч, энэ мэт эерэг сайн үзүүлэлтэй, цаашид дэмжих ажлуудыг хийж чадсан нь Засгийн газрын бодлогоос гадна, өөрийн нь тодорхой ур чадвар буйг зөвшөөрч сайшаах нь шударга ёсонд нийцэх биз.
Чинбатын Номин сайд аа, Соёлын салбараа ингээд л тэтгээд бай. Үр дүн илүү л өндөр болох нь дамжиггүй.
Б. БАЯР
Amlalt.mn
