Засгийн газар өөрийн биет ул мөрийг үлдээдэг. Тэр нь сайн, муу байхаасаа шалтгаалан хэтэд үргэлж яригддаг.
Л.Оюун-Эрдэнийн, энэ Засгийн газрын үлдээж байгаа нэг сайн өв бий. Тун их биет. Энэ бол авлига, ашиг сонирхолтой тэмцсэн нь юм. Т.Бадамжунай гэдэг хүнийг Сэбү арлаас баривчлаад л ирсэн. Өмнө нь өмнөд хөршийн үнэг ажиллагаа тэргүүтийг хараад, ингэх л учиртай юм гэж суусан нийгэм өнөөдөр түүнийг өөрсдийн нийгэм дээрээ бодитоор харсан.
Шударга бустай, авлигатай тэмцье гэвэл ингэж үзүүлж, харуулж, бодитой тэмцэн ялж болдгийг энэ мэт жишээгээр Л.Оюун-Эрдэнийн Засгийн газар харуулсан уу гэвэл, харуулсан л даа.
Ашиг сонирхлыг зохицуулах хуулийг баталсан. Ургийн мод гэгч зүйл зураад улсаараа шоолж суусан болохоос , угаас нь, зарчмаас нь шийдлийг нь эрээд засахгүй л байсан шүү дээ.
Л. Оюун-Эрдэнэ, энэ засгийн өнгөн дээр зассан, хуулийг баталсан. Эхнэрээ, дүүгээ, ах дүүгээ энэ улсын өөдтэй өнгөтэй бүхэн дээр манай дарга нар залсан байгаад удсан. Энийг болиулсан.
Нэг айлаас нэг л хүн төрийн өндөр дээд албан тушаалыг хашдаг болохоор хуульчилсан, шударга ёсыг хуульчилж чадсан нь гарцаагүй завшаан. Ө.Энхтүвшин, Ц.Нямдорж, Н.Энхболд, М. Энхболд, Ч.Хүрэлбаатарын нь эхнэр, хүүхдүүд Монгол банкны дарга, яамдын дэд сайд, төрийн нарийнаар дархлагдсан, үе залгамжлан улсын алба унахыг уг нь засчихсан даа.
Энэ бол өдгөө Засгийн газар оройлж, УИХ-аар батлуулсан сайн жишиг байлаа. Нүүрсний хулгайн, Хөгжлийн банкны сонсгол хийлээ. Өмнө нь ингэж болохгүй зүйлийг гэдэс дотортой нь ярьж байл уу даа.
Сонсголуудаар шүүх, хуулийнхныг авлигадаад амь гэтэлгэгчдийг, мартагддагийг, нийгмийн үнэн санамжид авчирч, үнэндээ юу болсныг ард түмний оюун санааны шүүхэд аваачаад, хэлэлцүүллээ, шүүлээ.
Энэ ард түмэн хэн хулгайчийг мэддэг болчихлоо. Юу улсаа хорлож байгааг бүр сайн мэддэг боллоо. Энэ бол маш том ололт. Шүүхээр л шийдэгдэнэ, би хулгайч биш гэж мянга орилон үнэнийг далдлагчдыг үнэн мөнөөр нь бүрмөсөн ойлголоо.
Л.Оюун-Эрдэнэ гэдэг Ерөнхий сайд шударга ёсонд гэрэл асаасаан, асаасан. Энэ бамбарыг нам засгийг толгойлогчид хэн ч байлаа цаашид үргэлжлүүлэх учиртай. Монгол улс нүүрээ угааж, нүдээ нээмээр л байгаа шүү дээ.
Утаагаа арилгаж, гудамжиндаа гацдаггүй, эрчим хүчээр дутагддаггүй болмоор л байна шүү дээ. Энэ бүхнийг шийдэхийн өмнө, энэ бүх түгжрэл болсон асуудлын учрыг шийдэж, угийг цэвэрлэх нь нэн чухал юм. Үүнийг нь энэ Засгийн газар бодитой хийж, замыг гаргаж байгаа.
Б.ДОРНО
Amlalt.mn
