Хишигдэмбэрэлийн Тэмүүжин жиргэсэн байна билээ. “Нүүрсний сонсгол хийж цаашаа алаад өгөх юм байх гэсэн байдаггүй. Араас нь зааж хулгайчаа харуулсан болчхоод нөгөө хулгайчдаа ордон дотроо дарамтлуулна. Тэгсэн атлаа гудамж руу гараад нэг жаахан сэтгүүлч охиныг төрийн дайсан болгож дүүжилж алах шахна” гээд .
Үүнээс үнэн юм ч үгүй боллоо л доо. Дөчин их наядын нүүрсний хулгайчид наранд ханхалзаж, нийгмийн болохгүйтэй тэмцэж үгээ хэлэгсэд нөгөө газарт ээлж дараалан хоригдсоор. Өнөөдөр нэр бүхий сайтад “Ардчилсан намын “авлигачин” өвгөчүүдэд авах юм байлаа, адаглаад тэд хэвлэлийн эрх чөлөөг дээдэлдэг байсан юм гээд” Ц.Элбэгдорж, Н.Алтанхуяг, Э.Бат-Үүл , Ч.Сайханбилэг, С.Баярцогт, Х.Баттулга нарын зургийг тавиад нийтэлж. Худлаа юм алга. Тэд үнэхээр тийм. Яаж ч шүүмжлүүлсэн бай, хэвлэлээс авахаа аваад, гээхээ гээгээд шорон гяндандаа тулалгүй ажилладаг, ардчилсан нийгмийнхээ тэнхлэгийг барьдаг.
Гэтэл одоо Ардын намын өнгөн дээрээ маш олон сэтгүүлч хууль шүүх, цагдаа дээр ээрэгдэн байцаагдаж байна. Дандаа Ардын намын эрх мэдэлтнүүд, УИХ-ын гишүүдийн гомдлоор. Зарим сайдууд нь шүүхэд өгнө, хараарай гээд дарамталдаг болцгоосон.
Дөчин дөрвөн их наядын нүүрсний хулгайчдаа шийтгэхгүй, ганцхан хүн хориод, шүүх хурал нь таван удаа хойшлоод, нүүрсний сонсголдоо нөгөө ганц хорьсон хүн нь би оръё оо, хүний эрхээр минь хангаж өгөөч гэсээр атал оруулахгүй л байгаа эрх баригчид даа.
Тэгсэн атлаа шүүмжлэл болгоны араас шүүх цагдаад гомдол хөврүүлээд л. Эрээгээ алдаж дууссан. Ардчилалгүй, шүүмжлэлийг хүлээж авдаггүй болсон болохоор л дөчин их наядын хулгайтай болж байгаа юм л даа. Эрх мэдэлтнүүд нь тэгтлээ сагасан.
Х.Тэмүүжин бас бичсэн. Б.Энхбаярыг хоёр дахь Ц.Нямдорж, Д.Амарбаясгаланг хоёр дахь Т.Бадамжунай гээд. Ардын нам ард түмнээсээ, ардчиллаас ухраад л байж байна даа. Олон нитийн судалгаануудаар Ардын нам Улаанбаатар хотод ер суудал авахгүй үр дүнтэй тухай мэдээлэгдээд эхлэх нь. Бодитой нь тийм байгаа бололтой.
Ардчилал үгүйн дор яаж ч ард түмэн үнэлгээ өгөх вэ дээ. Одоо гишүүн болохоор янз бүрийн авир Ардын намынхан л гаргаж байна. Бүр байж ядаад л.
Ирээдүйд өөрийн болон бусдын эд хөрөнгөөр мөнгө, эд бараа өгөхөөр гэрээ байгуулах, хэлцэл хийх нь хууль бусыг мэдсээр атлаа зөрчих улаан ногоон даашинзтай хүмүүс олшрох, бэлгийн хур буулгагсад замаа алдах шинжтэй.
Ингэж төр барьж болохгүй байх аа. Ард түмэн дүнгээ тавина биз дээ. Энэ улс орон үнэндээ хөгжихгүй байна шүү дээ. Энэ өвлийг яаж давж байгаагаа сана, цахилгааны хязгаарлалттай, шатахууны дугаарлалттай л зутруухан нэг өвлийн адаг сард ирж байна.
Ингээд л байгаад байх юм байх даа, ингээд л байлгаад байх юм байх даа , энэ ард түмнийг. Г.Занданшатар дарга Ардын нам дотор арай ардчилалтай, ардчиллын учрыг арай сэнхрэхтэйгээ хүн. Зөвлөлдөх ардчилал гээд л яриад байдаг.
Ардын нам дотроо хууль хяналт, шүүхэд хандан хэвлэл мэдээлэлд гомдсон өргөдөлч гишүүдийнхээ авир ааш, төлөвийг нэг сайхан зөвлөлдөн ардчилалдаасай.
Б.ДОРНО
Amlalt.mn
