Гурав дахь Ерөнхийлөгч Н.Энхбаярын хөвүүн. УИХ-ын сонгуульд удаа дараа өрсөлдсөн. МАХН-аас, МАН-аас ч мөн. Сүүлдээ МАН- аас дэвшин сонгогдож, Д.Сумъяабазарыг хотын дарга болоод явсны дараа УИХ-д орж ирсэн.
МАН, МАХН хоёрын эвсэн нэгдсэний бүтээл. Монгол банкны дэд ерөнхийлөгч бас хийгээд амжсан. Айлын танхил хөвүүн, эцэг нь улс төр дэх шар хор, мацаасынхаа тайлал, бах ханалт болгон УИХ-д оруулж ирсэн хүн л дээ.
Намбаярын Энхбаяр Батшугарыгаа УИХ-д оруулж ирсний улмаас эдүгээ хэдэн сарын дараа болох сонгуульд Р.Гончигдоржийн, Ө.Энхтүвшиний, Н.Батбаярын хөвүүд охид Э.Батшугараасаа юундаа дутах билээ гээд олноороо сүрэглэн УИХ-д суухаар зүтгэж байгаа мэдээлэл байнга бичигдэж байна.
Э.Батшугар гишүүн ийм улбаа замыг УИХ-ын тийш тавьсныг эрүүл гэж ойлгох уу, хэрхэн үзэхээ ард түмэн тунгааж л байгаа. Үе дамжсан улс төр үргэлжлэх төлөвийг л үлгэрлээд л.
Э.Батшугар нарын эцгүүд төрийн эрхийг хорь гучин жил барилаа. Улсыг хөгжүүлсэн нь алга. Улс өртэйгөө, утаатайгаа, авлига хээл хахуултайгаа мацаж байгаа. Н.Энхбаяр нар хүүхдүүдээ гишүүн, дэд сайд, НҮБ-д суух Элчин дарга нар л болгох ажлаа сайн хийж байгаа болохоос эх орноо өөд татсан нь алга л байна шүү дээ.
Э.Батшугар даруу төлөв залуу харагддаг. Эдийн засгийн мэдлэг ч муу биш байх. Ярихдаа хүрвэл дориун л ярих төлөвтэй юм билээ. Сонгино-Хайрханы ард түмэн сонгоод УИХ-д оруулсан, яалтай билээ, олны сонголтыг. Гэхдээ л Э. Батшугарыг Энхбаярын хөвүүн, үе дамжсан улс төрч, улс төрийн өгөө авааны ул суурь, гаргалгаа байц гэж хараад дурамжхан шиг байдгийг нийтээрээ л хэлэлцдэг.
Э.Батшугар гишүүн болоод гурван он дамнав. Э.Батшугарын гэх улс төрчийн өв, байр суурь, далайц үзүүлсэнгүй. Гишүүн хүн гэдэг гишүүн шиг гишүүн байж л дараагийн сонгуульдаа дэвших эрхтэй болдог байх. Э.Батшугарыгаа л дэвшүүлэхгүй бол болохгүй гэх үндэслэл, зайлшгүй шаардлага МАН-ынханд байна уу. Байгаа гэвэл тэр нь яг юу гэхээр ололт төдийлөн үзэгддсэнгүй. Бодит байдал ийм байгаа. Б.ДОРНО
Amlalt.mn
