Доктор Болдбаатарын Гүнбилэг “Г.Занданшатар тэргүүтэй УИХ Үндсэн хуулийн эсрэг үйл ажиллагаа явуулж байна” хэмээн ярьжээ. Гэтэл өнөөдөр “Зууны мэдээ сонин” “Танихгүйгээ дугуйлаарай, тэр бурхан байж мэднэ” хэмээн нийтлэл бичжээ.

Эдгээр ярилцлага, нийтлэл бол сонгуулийн тэгш бус гараа, бололцоогүй шахуу боломжийг л шүүмжилж байгаа юм. Энэ нэн тодорхой байгаа. Сонгогчдод, сонгуулагсдад нэн тэгш бус, нэн шударга бус сонголтыг тулгаж байгаа юм. Сонгуулийн сурталчилгаа хуулиараа цөөн хоногт багтах ёстой.

Ийм цөөхөн хоногт, 3-4 аймаг дамнасан томсгосон тойрогт ямар ч шинэ нэр дэвшигч өөрийгөө таниулах боломжгүй. Ямар ч супер хүн өөрийгөө таниулж, үзэл бодол, үйлдэл төлөвлөгөөгөө ойлгуулах боломжгүй.

Ийм “боломжгүй боломж”-ийг одоогийн сонгуулийн хууль нэр дэвшигчид тулгаж байна. Энэ бол Үндсэн хуулиар олгогдсон тэгш эрхийн боломжийг сууриар нь утгагүй болгож байгаа гэж доктор Б.Гүнбилэг нэн тодорхой хэлсэн байна билээ.

Тийм учраас тэрбээр Г.Занданшатар тэргүүлэн УИХ Үндсэн хуулийнхаа эсрэг хуульчлал хийгээд байна аа гэж хэлж байгаа юм. Аргаа барсан нийтлэлч “Танихгүйгээ дугуйлаарай, бурхан байж мэднэ” гэж бичих вэ дээ.

Танихгүй, танигдаагүй хүн гэдэг чинь адаглаад нүүрсний хулгайд холбогдоогүй хүн байж таарна гэж бичсэн байна лээ.

Иймдээ хүртэл ард түмнийг, нийтийн эрх ашгийг хөсөрдүүлсэн тэгш бус боломжийг илэрхийлсэн сонгуулийн хууль тулгажээ. Үнэхээр таньдаг гишүүн, улс төрч бүхэн ямар нэг бусармагтай холбогдон, шүүхээр шийдэгдээгүй бол гэмт хэрэгтэн бус гэж үзнэ гэсэн ганцхан үгтэй, ард түмнээ дарлан дээрэлхэж, идэж уусаар нүүрсний дөчин дөрвөн их наядын хулгай хийгээд, түүнийгээ шүүхээр одоо болтол шийдэж чадаагүй байгаа юм. Үнэн байдал ийм л байгаа.

Дээр нь УИХ-ын сонгуулийн тухай хуулийн 44.6-д “Энэ хуульд заасан нэр дэвшүүлэх ажиллагаа эхлэхээс өмнө Улсын Их Хурлын гишүүн хийсэн ажлын тайлангаа танилцуулах зорилгоор сонгогчидтой хийсэн уулзалт болон энэ хуулиар хориглоогүй арга хэмжээ нь сонгогчдын санал татах зорилгоор явуулж байгаа үйл ажиллагаанд хамаарахгүй” хэмээсэн нь шинээр нэр дэвшигчдэд хориотой уулзалт арга хэмжээ, УИХ-ын гишүүдэд “тайлангаа танилцуулах” нэрээр нээлттэй болсон.

Сонгуулийн жил эхэлсэн энэ цаг үед нэр дэвшигчдэд хуулиар оноосон хоёрхон долоо хоногийн сурталчилгааны боломж олгочхоод, 4-20 жил УИХ-д суугсдад сонгууль болтол УИХ-ын гишүүний тайлан гээд тэвэр тэвэр сэтгүүл, товхимол тараахыг, өөрийгөө ингэж “сурталчилж” болохыг хуулиар зөвшөөрчихсөн.

Энэ чинь ямар шударга ёс, тэгш гараа вэ?

Тийм учраас Д. Гүнбилэгийн Г.Занданшатар нар Үндсэн хуулийн эсрэг давшиж байна гэж бухимдан уурсаад байгаа нь гарцаагүй зөв юм.

Та бүхэн бод доо, дааганы уралдаанд, бүдүүн морийг гарааны зурхайгаас километрийн наана эргүүлүүлж түрүүлүүлээд, дааганы уралдаанд түрүүлэв гэж цоллох дүр зургийг, ингэж л өөрсдөдөө давуу байдал бий болгосон хуулийг ард түмэн, сонгогч, шинээр сонгогдохоор горилогсдод УИХ-ынхан тулгажээ.

Тиймээс л “Дааганы уралдаанд бүдүүн морь түрүүлбэл, дааганд тооцож барианд оруулах уу, Г.Занданшатар дарга аа, Үндсэн Хуулийн ЦЭЦИЙНХЭЭН!” гэж бид асуугаад байгаа юм.

Б. ДОРНО

amlalt.mn