Нямтайширын Номтойбаяр Монголын улс төрд шинэ гал ноцоох нь. Ноцоох юу байхав, бүр “шатаах” нөхцөл байдал үүсгэх нь нот байна.
Монголын ногоон намын залуур түүнд ирж, мөн түүнчлэн Монголын Үндэсний Ардчилсан намтай эвсэл байгуулан сонгуульд орох нийлэмж өнөө энүүхэндээ бүрдэх нь шиг байна. Н.Номтойбаяр бол уг нь МАН-аас гишүүн, сайд болж явсан хүн.
МАН засаглан, түрж явах үед шахагдан, хилсээр эрх чөлөөгөө хориулан түгжигдээд гарч ирсэн. Үнэндээ Н.Номтойбаярт хийсэн хэрэг байгаагүй нь нотлогдсон бөгөөд гагцхүү том дарга нарын үгэнд ороогүй гэх ноцтой шалтгаан бий гэдэг.
Сөрөн тэмцэж цоролзсоны тул тийнхүү шоронд хорьж улс төрийн замналаа хэсэгтээ хаагдуулсан. Гэвч Н. Номтойбаяр зүгээр нэг улцгар биш, өнөөгийн улс төрийнхнийх шиг хөгийн ямар нэг зүйлээр барьцаалагдаагүй аавын хүү, цөс зориг, шар хор ихтэйн тул улс төрд нэн шинээр, ихээхэн хүчирхгээр ирэх нь шиг байна.
АН, МАН-ын бодит хэцүү, амаргүй даваа Н.Номтойбаяр эвслийн дарга боллоо гэгдэж байгаа нь нэмэр хачиргүй үнэн.
Н.Номтойбаяр үргэлж нэг зүйлийг хэлдэг. Тэр нь улсын сан, тендер, бусад олон зүйлтэй ямар ч сэжмээр холбогддоггүй, эрх ашиг байдаггүй, тэгэх ч огтын шаардлагагүй гэдэг нь юм. Үнэхээр ч тийм. Манай улс төрийн олигархууд бараг бүгд л улсаа тонож, тендер түүж баяжицгаасан гэхэд хилсдэхгүй.
Энэ нь МАН , АН-гүй өндөр түгээмэл болохыг ойрмог болсон нүүрсний хэргийн сонсголуудаар Монголын ард түмэн тод томруун, гоц төгөлдөр ойлгоцгоосон.
Монголын ард түмэнд өнөөдөр үнэт хөдөлмөр, ариун капитал, ажил олгогч, аюулгүй, эрүүл саруул амьдрахын баталгаа үлэмж үгүйлэгдэж байгаа.
МАН нам сүүлийн найман жил засагласны гавьяа дөчин дөрвөн их наядын нүүрсний хулгай л гэхгүй юм бол өөрөөр гялайх зүйл нэн бага байна. Адаглаад ганц станц барьсангүй.
Гаднын хөрөнгө оруулагчдыг татаж улсаа хөгжүүлье гээд Засгаасаа бариад байгаа хөрөнгө оруулалтын хуулийг Засгийн газрын гишүүдийн тал нь шахуу эсэргүүцээд зогсож байна. Ийм байхад энэ улс орон хөгжих үү.
Эдүгээ засаглагчид нэгэнт дүнгээ тавиулсан. Ийм үед Ногоон нам тэргүүт эвслийг толгойлон сонгуульд оролцох Н.Номтойбаярт ард түмэн, нийгмийн оюун санаат олонх шууд дэмжлэг үзүүлэх нь гарцаагүй байна.
Энэ бол улсын, үндэстний эрх ашиг болжээ. Түүнд стратегич М.Энхсайхан, Б.Цогтгэрэл тэргүүтэн тулах нь. Эдийн засгийн бодлого, улс хөгжүүлэх дорвитой төлөвлөгөөг эдний нэгдэл гаргах нь тодорхой.
Н.Номтойбаярт одоо өөлөгдөх зүйл алга. Хилсээр түгжигдээд гараад ирсэн. Одоо алдах, алдааны бай болох аливаа өнцөгдөл байж болохгүйг тэр бүрнээ ухаарсан. Эр зоригтойхон байж эх орноо өөд татах Н.Номтойбаярыг ард түмэн дэмжинэ ээ.
Улс орныг гарцаагүй өөд татах түмэн шалтгаан байна. Шатахуун түгээгүүрийн дараалалд хонож, цахилгаанаа хязгаарлуулж, өвөлдөө мөсөн зам дээр өнжиж, зундаа үер усанд автсан, авлигажсан эдийн засагтай, хавтгайрсан халамжаар түмнээ угжиж үнэгүйдүүлсэн атлаа өр нь өдөр өдрөөр нэмэгдсэн, хөрөнгө оруулалтыг ноцсон ийм нийгэм Монголыг хэзээ ч гоё харагдуулахгүй.
Н.Номтойбаяр энэ бүхэнд ээлж дараатай цэг тавина гэдэгт иргэд итгэж байна.
Б. ДОРНО
Amlalt.mn
