Нямтайширын Номтойбаяр бүгдээрээ, нийтээрээ баяжъя уриаг дэвшүүлж, сонгуульд орох нь.
Ардын намын анхны дарга Солийн Данзан аль тэртээ 100 жилийн өмнө л ингэж уриалж, Швейцар лугаа адил хөгжье хэмээсэн ч үүнийгээ бодит ажил болгож чадаагүй бол Ерөнхий сайд Пэлжидийн Гэндэн 1932 онд ард түмэндээ хандан "Баяжигтун" хэмээн уриалж, тодорхой амжилт олж, Зөвлөлт Оросын дургүйг хүргэж байсан удаатай.
Түүнээс хойш Ардын нам нийт зоноороо баяжъя гэхээс илүү нэгдэл коммун гэж явсаар он жил үдэж, эдүгээ ард түмэндээ аар саархан халамж хүртээсээр бэдэрч яваа. Гэвч ардчилсан хувьсгалаас хойш тэд хорь гаруй жилийг хол давж засагласан ч улс орон хөгжиж, ард олны амьдрал дэвжсэнгүй явсаар л байгаа.
Ногоон нам, эвслийн тэргүүн Н.Номтойбаяр капитал гэдгийг ойлгосон хүн. Үндэстэн баяжъя хэмээвэл иргэн бүр баян байх учиртайг нэгмөсөн доторлосон хүн. Хэлмэгдэж, түгжигдэж ч үзлээ.
Одоо харин нийтээрээ баяжъя гэж байна. Энэ тун чухал. Төрийн ордноосоо мянган метрт нүхэн жорлонтой, дал наян сая малтай атлаа мах нь магнаг болсон эх оронтой улс бид.
Нүүрс алт нь жалга судгаараа нэг авч, дөчин дөрвөн их наядаар нь нам төр толгойлогсод тоночихсон улстай монголчууд даа бид.
Н.Номтойбаярт хүмүүс итгэл өгөх нь шиг байна. Н.Номтойбаяр харин шилэх хэрэгтэй юм. Нэгдмэл бүх үндэстнийг илэрхийлэх нийгмийн давхаргуудаас, нэр цэвэр, шинэ залуу, идэр оюун санаатнуудаас л нам эвслээ гоодож байж сонгуульд орох хэрэгтэй дээ.
Нам намын мухардагсад, өвдөл цөвдөл Номтод хэрэггүй. М.Энхболд, Сү.Батболд мэтийн үзэл бодол нэг чигч явсан, тулхтай хүмүүс бол өөр хэрэг. Ер нь л Н.Номтойбаярт ном үзсэн, улс хөгжихийг ухсан, нэр цэвэр, ёс зүйн зарчим өндөр хүмүүс л хэрэгтэй.
Н.Номтойбаяр итгэж дэмжих хүмүүстээ ийм багаар бэлэг барьж, итгэл найдварыг нь авах ёстой.
Дурын олныг дунд чөмгөөр нь жиргүүлэх хэрэггүй. Ялангуяа намыг мөнгө, эрх мэдэл, өмч гэж хардаг хүмүүст Н.Номтойбаярын нийтээрээ баяжъя гэдэг нь хариу өгч байгаа байх.
Хоёр том намд ард түмэн итгэхээ байж. Чансаа нь арван хувь хүрэхгүй байгаа мэдээтэй. Аргагүй дээ. Хоногийн хоолтой, дэвжих эх үүсвэргүй, ядмаг амьдралаар энэ ард түмнийг хэчнээн додомдох билээ.
Монголчууд дэлхийн хүний амьдралын чанартай жишгээр стандарт амьдрах учиртай, ёстой. Үүнийг л Н.Номтойбаяр ард түмэнд ойлгуулж, үүнд тусалж чадахыгаа л төгс ойлгуулж, сонгуульд ялна. Амжилт гаргана. МАН , АН ингэж ард түмнийг дэвжээгээгүй болохоор л ард түмэн АН, МАН хоёрт итгэхээ байсан, цөхөрсөн. Цөхөрсөн итгэлийг Н.Номтойбаяр сэхээнээс гаргагтун.
Б.БАЯР
Amlalt.mn
