Наймын найман жил төрийн эрх барьсан Ардын намаас ард түмэн амлалтыг нь нэхэж, биелэлтийг нь тооцож байж л сонгуульд саналаа өгөх ёстой юм.
Биелдэггүй баахан юм амладаг нам, биелүүлдэггүй гишүүн, нэр дэвшигчийг дахин сонгох ямар ч утга учиргүй. Цэцэрлэгийн хүүхдийн нойлыг бүрмөсөн өөрчилнө гэсэн.
Дархан тэргүүт аймаг суурингуудад үйлдвэр технологийн парк барина гэсэн. Цалин тэтгэврийг нэмнээ гэсэн. Хамгийн наанадаж л эдгээр амлалтаа эрх баригчид биелүүлсэнгүй.
Сургууль цэцэрлэгүүд модон жорлонтойгоо, монгол малын түүхий эдүүд эцсийн бүтээгдэхүүн болох нь битгий хэл жалга судагт хог болсоор. Өнөөдөр монголчууд цахилгааны хязгаарлалттай, ээлж дараалан цахилгаан тасалдалгаатай л аж төрж байна.
Эрчим хүч гэдэг бол чухамдаа хөгжлийн эхний шан болдог. МАН энэ жилүүдэд нэг эрчим хүчний эх үүсвэр барьсангүй. МАН-ынхан УИХ, Засагт олонх болсноороо бол уулыг нурааж, усыг зогсоох хүч чадлыг олсон.
Гэвч Үндсэн хуульд удаа дараа өөрчлөлт оруулж, өөрсдийн эрх мэдлийг нэмснээс өөрийг эх оронд нэмсэнгүй. Газрын тосны үйлдвэрийн ашиглалтад орох хугацаа хойшилсоор, одоо бараг 2027 гэж яригддаг болсон. Уул уурхайн сайд Ж.Ганбаатар нь энэ бүтээн байгуулалтын ажлыг ял адил үзэж, бултаж, арагш суусаар, эдүгээ энэ бүтээн байгуулалт С.Наранцогтын ахалдаг “Эрдэнэс Монгол”-д очсон.
Үр дүн нь цаашилсаар, монголчууд өвөлжин шатахууны дараалалд өглөө, өдөр, шөнөгүй зогссоор. Ийм арчаагүйтэл гэж байх уу.
Газрын тос нь Мэнэнгийн талаар дүүрэн ч боловсруулж ашигладаггүй, яачихсан улс орон гэж ийм байдаг юм. Ингэж улс орныг удирдана гэдгийг хэрхэн хэлэх билээ.
Эсрэгээрээ албан тушаалтнуудын нь идэж уусан, улсаа тоносон нь хэдэн их наядаар, дөчин дөрвөн их наядаар хэмжигдэж байгаа. Ерөнхий сайд, Хууль зүйн сайд нь тэмцээд л байгаа ч, дэргэдээс нь хулгайчууд байнга яригдсаар.
Б.Энхбаяр сайд хэлээд байгаа, Засгийнхаа хэрэг эрхлэхийн даргатай олиггүй байгаагаа, тэр нь Бор тээг гэдэг уурхайтай холбоотой асуудлаар, улмаар Төрийн нарийн бичгийн даргаа ч томилуулж чадахгүй бүтэн улирал давж байгаагаа шогширч байна лээ. Ийм засаглал гэж юу байх билээ дээ.
Ингэж засаглагсдаас амлалт нэхэх бололцоо байна уу. МАН нам одоо энэ сонгууль болтол бүх амлалтаа нэг бүрчлэн ярьж тайлагнах хэрэгтэй. Угаас Улс төрийн намуудын тухай хуульд намыг төрөөс санхүүжүүлэхээр болсон.
Төрөөс санхүүжихийн тулд төрийг баригч ард түмэнд өмнө хийснээ, амласнаа тайлагнах ёстой. МАН тайлангаа тавь, амлалтаа тооц. Чухам үүний дараа төрийг язгуур баригч ард түмэн санал өгөх эсэхээ шийдэг.
Б.БАЯP
Amlalt.mn
