Батын Батбаатар туйлбартай хүн юм. Тэртээ 2004-2008 онд УИХ-ын гишүүнээр нэгэнтээ ажилласан. Яагаав, тээр жил, МАН-ыг аанай л тарвалзан олонхлож явахад, дэд спикер Ж.Бямбадоржийг “тавьж” гарч ирж байсан даа.
Харин түүнээс хойш гудамд алхлаа, гэхдээ улс төрийн үйл ажиллагаагаа ер тасалдуулаагүй. Сонгууль болгоноор нэр дэвшсэн. Ардчилсан намын болохгүйтэй, болдоггүй дарга нартай үзээд л, ганцаардасхийгээд явчих шиг болсон.
Ер нь Монголд зөв нь ганцаардаж, буруу нь зөвөө дийлээд удаж байгаа л даа. Б.Батбаатар эдүгээ Иргэний зориг, ногоон намын дарга.
Тэрбээр МАН, АН-аас бусад бүх улс төрийн намуудыг нэгдэж эвсье гээд байгаа. Гэхдээ иргэн Батын Батбаатарын нэрийн өмнөөс гээд тодотгоод байгаа. Тун зөв юм шиг. Иргэн л төр байгуулдаг л даа. Б.Батбаатарын энэ саналыг лав арваад нам дэмжиж байгаа бололтой байна. Үүнд урамшаад мань эр, маргааш бүх улс төрийн намуудын, гучин дөрөв таван даргыг урьжээ, дугуй ширээний ярилцлагад.
Улс төрийн намууд сонгуульд ялж, төр барих гагц зарчим чиглэлтэй. Энэ үүднээс үзвэл гучийн гучин хэдэн нам сонгуульд үзэх бүртээ МАН, АН-ын дор ялагдан, байгаа байхгүй нь мэдэгддэггүй ч амь торгоон сонгуулиас сонгуультай залгадаг. Дахиад л ялагддаг, хөөрхийлөлтэй. Энэ учраас одоо иргэн Батын Батбаатар, Иргэний зориг ногоон намын даргын уриалгад чинхүү хүсэл зорилгоо нийтгэн нэгдэж болохгүй гэх газаргүй юм.
Ногоон нам эвслийн Н.Номтойбаяр нар хэрхэн хариу өгөх сонин байна. Батын Батбаатар одоо нэг зүйлийг л ойлгочих хэрэгтэй.
Маргааш урьсан уулзалтдаа МАН, АН-ын сонгуулийн мөрийн хөтөлбөрийн биелэлтийг ярь. Сүүлийн найман жил эрх барьж, дөчин дөрвөн их наядын нүүрсний хулгайтай МАН-ын урд хилээр гардаг нүүрсний машины дараалал шиг сунагар сунагар амлалттай мөрийн хөтөлбөрийн нь биелэлтийг асуу.
Нэгдэн эвсэхээр урьсан намын дарга нартаа, удирдах хүмүүст нь ердөө л МАН-ын сүүлийн найман жилийн мөрийн хөтөлбөрийг ширхэгчлэн тараагаад өг. Тэгээд намын дарга тус бүр чиглэл чиглэлээрээ мөрийн хөтөлбөрийг нь хэрхэн биелснийг тагт нь тултал яваад дүгнэлт гаргах хэрэгтэй юм.
Ингээд дүн багцааг нь гаргаад ирэхээр намуудын дарга нар чинь аяндаа нэгтгэгдээд ирнэ.
МАН-ын мөрийн хөтөлбөр биелсэн нь тун тааруу, бараг биелээгүй байгаа. Ганц станц бариагүй дээ. Газрын тосны бадраар өвөлжин монголчууд шатахуун түгээгүүрийн дараалалд зутарсан даа, наанадаж л.
Арван зургаан оны амлалтыг хорин оныхтой бүү холь, бүү ярь гэдэг олонхын бүлгийн ахлагч Т.Тогтохсүрэнгийн үгнээс дүн багцаа нь тодорхой юм.
Батын Батбаатар аа, гучин таван намаараа МАН-ын амлалтыг нэх, биелэлтийг тооц! Үүний ажил хэрэгч үр дүн та нарыг аяндаа нэгтгээд өгнөө.
Харин та бүхэн хариуцлагатай, нэн шамдан ажилламаар. Мөрийн хөтөлбөрөө гаргах цаг дөхөж байна, намуудын. Б.Батбаатарын нэгдье гээд байгаа намууд МАН-ын биелээгүй мөрийн хөтөлбөрийг жиргэж мөчлөөд яриад эхлэхээр та бүхний мөрийн хөтөлбөр аяндаа яг таг боловсроод ирнэ, бас иргэд ойлгоод дэмжээд эхэлнэ.
Б.ДОРНО
Amlalt.mn
