Сонгууль хаяанд ирчихэж. Ганц сарын дараа гэхэд нэр дэвшигчид урьдчилсан байдлаар бараг тодорчихно доо. МАН өөрөө ч, өрөөлөөр ч судалгаа хийлгээд тун хэцүүхэн дүр зурагтай байгааг хэвлэлүүд бичээд байна.

Нэн ялангуяа, хотод суудал авахад нэн хүнд болсон, энэ нам. Сонгино-Хайрхан дүүрэг гэхэд маш хэцүү байгаа юм билээ.

Х.Нямбаатар нь хотын дарга болоод Д.Сумъяабазарыг сайн ажиллаж байсан юм шиг бодогдтол муу ажиллаж байна гэж иргэд шүүмжилж байгаа юм.

Д.Сумъяабазар нь болохоор ногоон автобус тэргүүт асуудлаас үүдэж ажлаа өгөөд, Д.Амарбаясгалан дарга л ийм юм хийлгэсэн гэж мэдэгдсэн. Харин хууль хяналтын байгууллагынхан ногоон автобусны асуудлыг өдгөө Ж.Сүхбаатарт тохож байгаагаар мэдээлэгдэх.

Ингэж Сонгино-Хайрханыхан өөрсдийгөө төлөөлүүлэхээр илгээсэн Д.Сумъяабазар, Х.Нямбаатар нар нь УИХ-аас сайн дураар татгалзаж, хотын дарга болоод, эдүгээ муу нэрт, луу данстууд болцгоочихож.

Ядахад, дөмөг гишүүн Н.Учрал нь Сүхбаатар, Чингэлтэйн чигт одож, одоо Сонгино-Хайрханчуудыг Э.Батшугар нарын сулхан нөхөд УИХ-д төлөөлж байна.

Э.Батшугар бол эцгийнхээ Ардын намтай хийсэн наймааны л хүн. Ардын намын нэгэн өв нэр МАХН гэдгийн гавьяаг Н.Энхбаяр эдэлж, МАН-ыг сонгуульд удаа дараа хагаруулан цууруулж, саналыг хуваасны тул өдгөөгийн эрх баригчид арга буюу түүнд хадаг тавьсан. Тэгж хадаг тавихад Н.Энхбаяр хамгийн том тохироогоо хүүгээ гишүүн болгоход чигч зорилго болгон гар барьсаныг ард түмэн мэднэ.

Ингээд Д.Сумъяабазар хотын дарга болж одоод, нөхөн сонгуульд МАН Э.Батшугарыг дэвшүүлэн гишүүн болгосон билээ. Ингэж эвдрээгүй, гэнэн, төрийн дуулал явахад хоолой цахиртаж, нүд чийгтсэн хөвүүн Э.Батшугар эцгийнхээ улс төрийн хороор УИХ-д гишүүнээр бүтээгдсэн. За ингээд, гишүүн болдог юм байж. Тэр хамгийн гол нь гишүүн байсан гурван жилдээ сонгогчдодоо үгүйлэгдсэн, үнэ цэнтэй, хүчирхэг гишүүн байж чадсангүй.

Э.Батшугарын гэх ямар хууль санаачилж батлуулав. Нийгмийн ой санамжид юу ч үл алга, энэ талаар. Улс төрчийн харизм үзүүлж, манлайллыг үзүүлсэнгүй. Ёс зүй ярьсангүй, хулгай луйврыг хэлсэнгүй, шударга ёсоо оройлсонгүй. Жишээ нь, нүүрсний хулгайн асуудлаар Э.Батшугар яаж дуугарав, ямар зарчим хэлэв. Боловсролын зээлийн сангийн луйврын талаар, ЖДҮ-гийн талаар ямар байр суурь илэрхийлж, шударга ёсыг сахиулав.

Шатахуун түгээгүүрт ард түмэн дугаарлаж байхад ямар санаа, чигч бодол хэлэв. Цахилгааны хязгаарлалттай улсдаа ямар санаа оноо хэлж, хууль тогтоов. Хөрөнгө оруулалтын хуулийг дэмжиж, эсэргүүцэн жадлагсадтай хэрхэн үзэлцэв. Хөрөнгө оруулалт татах ямар гарц гаргалгааг хэлэв.

Дабль стандарт, боловсон хүчний хомсдолыг хэрхэн ярив. Нийт ажиллах залуусын 67 хувь гадаадад гарч ажиллах чинхүү хүсэлтэй болсон үе тэнгийнхэндээ ямар ээл, ивээлийг хайрлав. Хунтайж нар, үе дамжсан улс төрчдийн залгамж халааг хэрхэн шүүмжлэв. Ингээд, ингээд асуухаар маш олон асуултыг түүнээс асууж болох.

Ингэж үзвэл, Э.Батшугар жинхэнэ гишүүн байж чадаж уу. Хэн ч харсан тэнцэтгэл оноохооргүй байгаа биз дээ. Одоо тэгээд дахиад УИХ-д дэвших үү. Үе тэнгийн насны гишүүн Н. Учралын дайтай манлайлал эс үзүүлбэл, УИХ-д байх гээд байхын хэрэг байхгүй байх. Яагаад гэвэл Э.Батшугар бол энэ улсыг 70 хувь бүрдүүлж байгаа залуусын төлөөлөл. Залуус Э.Батшугарыг хууль тогтоолгоод зангарга ер харахгүй байна.

Т.ГАРЬД

Amlalt.mn