МАН-ын генсек бөгөөд Засгийн газрын хэрэг эрхлэх газрын дарга Д.Амарбаясгаланг МТАС түншлэл, түүний гэрээг цуцлахаар “Эрдэнэс Монгол”-д Засаг, УИХ-ын албажилгүй чиглэл өгсөн, мөнөөх түншлэлийн шугамаар хөрөнгө оруулалт хэмээгдэн 30 сая доллар бэлнээр орж ирсэн, төрийн өмчийн компаниас өчнөөн тэрбумаар яригдах мөнгө хэвлэлүүд рүү гарсан, тавин машин эзэмшдэг сэтгүүлчид бий зэргээр олон зүйлийг Хууль зүйн сайд Б.Энхбаяр ярьсан.

Эдгээрийг ярихдаа гагцхүү баримт түшин ярьж байгаагаа тэмдэглээд, Д.Амарбаясгалантай хүнийхээ хувьд ямар ч асуудалгүй, харин одоо харилцаа олиггүй байгаа, Төрийн нарийн бичгийн даргаа Хэрэг эрхлэхийн даргын чиглэл албажилгүйн улмаас томилуулж чадахгүй байгаа зэргийг мөнхүү ярьсан билээ.

МАН-ын залуу дарга, нам төрийг эрхшээсэн Д.Амарбаясгаланг тойрч ийнхүү Б.Энхбаяр ярьсан ч, нийгэм эдгээр асуудлуудын мөшгөлийн цаадыг, учир начрыг олохыг хүсэвч, асуудал намжмал байна.

Гэвч энэ унтрах зүйл биш байна лээ л дээ. Удахгүй илүү ноцох, ноцолдоцгоох биз. МАН-ын генсекийг тойрч ийм байтал, найман жил сөрөг хүчин байвч байж чадаагүй Ардчилсан намын генсекээр Э.Одбаяр гэгч хүн болоод удлаа. Нийгэмд энэ хүн Д.Амарбаясгалан шиг сэдэв ер болохгүй байна.

МАН-ынхны л дэмжлэгтэй, дэгээтэй генсек болсон гэдэг тодотгол дагалдсан. Нийгэмд төдийлөн ил болоогүй хүн байна лээ. Хувь хүнийхээ хувьд ч юугаараа, ямраараа хүчирхэг хүн нь эс мэдэгдэх.

С.Эрдэнийн дэмжлэгтэй улс төр, түүний гал тогоо руу өнгийсөн хүн шиг байдаг. Улс төрийн хор, хуйвалдааны чиглэлээр жаахан мэдлэгжсэнээр улс төрийн багцаа, амьсгаа мэдэх хүмүүс ярилцах юм билээ.

АН-ын генсек одоо бол жинхэнэ эр хүн шиг эрвэлзэж, эмээлт морь шиг дэрвэлзэж байдаг цаг л даа. АН сөрөг хүчин нь үнэн юм бол ИХ хурал дахь бүлэгтэйгээ Э.Одбаяр гэдэг хүн чухам дарцаглаж байх учиртай юм.

Зоогийн ширээний ард жишүү харж суугаад, яриа хэлцэл л их хийсэн дуулдах ч, нийгэм рүү гарч ирээд ганц олигтой мэдэгдэл, тодсол хийхгүй хүн юм. АН бол оддоос олон фракц бүлэгтэй нам. Энэ бүхнийг мөнхүү Э.Одбаяр эвсүүлэн зангидах, намын хоёрдугаар хүний хувиар Д.Амарбаясгалангийн дайны байх уу гэдэгт нийгэм ихээхэн анхааравч, сураг тавивч Э.Одбаяр бүхээгнээс үл үзэгдэх.

Д.Амарбаясгалангаас тод байж л Д.Амарбаясгалангийн намыг ялах зарчимтайг Э.Одбаяр мэдэх баймаар. Э.Одбаяр наанадаж “Д.Амарбаясгалан дарга аа, та хууль дээдлээд та намын ажлаа өг өө, Хэрэг эрхлэхээ баз аа” гээд шүүмжилж байх ёстой хүн бол Э.Одбаяр юм л даа.

Э.Одбаяр ингэх нь бүү хэл, нийгмийн индэрт цухуйлга ч алга. АН-ын генсек Э.Одбаяр аа, “амь” ороо!

Нийгэмд гарч ирээд, төгрөгийн ханш үнс боллоо гэж байсан МАН-ын генсек асан Ж.Мөнхбатын бичлэгийг үзээд, Ардын намаа амлалтаа биелүүл ээ, аль эсвэл засаглалаас холд оо гээд дуугар л даа. Нийгэмд харагд л даа. АН-ын генсек чинь ийм хүн байдаг юм байна гэгдээд үзэгд л дээ.

Б.ДОРНО

Amlalt.mn