Машин маниулдаж бяраа гайхуулах нэг хэрэг. Улс төрчид бол үнэндээ бодлого л маниулдмаар байгаа юм. Бодлогоо маниулдаж, хөдөлгүүрийг нь асаахгүй болохоор цаг уурын зудаас илүү улс төрийн зуд, хариуцлагагүйн зуд Монголд нүүрлээд удаж байгаа юм.

Эдийн засагч Ч.Хашчулуун малчдыг дулааны улиралд албадан өвлийн бэлтгэлийг нь хийлгүүлдэг байх тухай хөндөж ярьжээ. Аргаа барсан л хүний үг. Малчид ч дулаанд бэлдээгүйдээ яасан юм гээд л адарна л даа. Чухамхүү энэ адараа, албадан бэлтгүүлэх гэдэг хоёр зөрчилдөж байгаагаас л бодлогын маниулыг эргүүлж чаддаггүйн илэрхийлэл үзэгдэнэ.

Улс төрчид зудтай газраа ажиллаж байна аа, ажиллаж байна. Баалахын арга алга. Гэхдээ бөөнөөрөө, бүчин очиж өгөөд байгаа нь нэг шавилхан охиноо өөрийнхөө ичимдгийн бичлэгийг борлуулж олсон орлогоор Булганы Рашаантад тусалснаас илүү гарч чадахгүй байгааг цахимаар л нэг бичиж байна.

Цэр нь цээжинд, бөөр нь бөгсөнд гэж үг байдаг. Ёс зүй, ёс суртахууны асуудлыг таглаад л, тэрхүү охины үйлийг баатарлагаар, далайцтайгаар хөхиүлэн буй нийгмийг бид харж байна.

Улс төрчдийн зангарга, далайц, үнэлгээ ингэж дордсон байна. Капиталист нийгэмд мөнгө чухал. Эхний сонголт. Халамж үүний эсрэг. Малчид бол мөнгийг хуримтлуулах, мөнгийг бий болгох эдийн засаг бүхий мал аж ахуйг л илүү төгөлдөр байгуулах ёстойг энэ хавар ойлгож байна.

Баадантай хишиг барьсан улс төрчөөс бодитой мөнгөтэй хүн л тусламж үзүүлж чаддагийг Баярмаа хэмээх хүүхнээс ухамсарлаж байна.

Улсаа тонож, дөчин дөрвөн их наядаар нүүрсний хулгай цөлмөөг хийсэн улс төрчид, ганц бяцхан охиноос илүү хишиг тарааж чадахгүй байгаагаас, нийтийн баялаг, улсын сангаас тусламж хүргэж байгаагаа дээд буян мэтээр сурталчлан таниулж байгаагаас улс төрчдийг нийгэм бүрэн ойлгосоор байна.

Хоёр өдрийн настай хурганы арьсан малгай духдуулчхаад, хоттой хонь нь сайн уу гэж мэгшиж яваа улс төрчдийн ёс суртахуун, агуулгыг Монголчууд гүнээ мэдэрсээр.

Монголын малчид Монгол гэдэг капиталист орондоо иргэн бүрийнхээ адил л шалгарал дунд илүү төгөлдөржин хүчирхэгжих ёстой юм.

Нийгмийн даатгалаа улсаас төлүүлж, хэврэг бээрэг төдий харагдах ёсгүй, угаас уламжилсан том өв соёлоо тээж яваа улс.

Тэдний малаа өсгөсөн нь буруу бус. Гагц зөв тэнцвэртэй, ухаалаг, ашиг шим бүхий мал аж ахуйг нь бодлогоор дэмнээгүй нь аанай л төр баригсдын, бодлого тодорхойлогсдын л буруу.

Ингэж улс орноороо ухаангүй ноёнд урагшгүй албатын системийг үгдрүүлж болохгүй. Даамжруулж болохгүй. Зуд Монголоор нэг болж байна.

Гэхдээ чухам нийтэд, нийгэмд хортой зуд бол хариуцлагагүйн зуд, бэлтгэлгүйн зуд, бодлогогүйн зуд үнэмлэхүй нүүрлэснээс бид ингэж арчаагаа алдаж байгаа гэдгийг малчид, Монголын ард түмэн жинхэнэ ухамсарлавал энэ зудын зулаг тэр болно.

Ж.Батсуурь гэдэг гишүүн зуд болно, тун ажилламаар байна гэж их үглэсэн юм билээ. Сүхбаатараас сонгогдсон хүн. Сүхбаатар одоо үнэхээр хүнд байна. Сөрөг хүчний гишүүн гэж үзсэн юм уу, эс тоосон юм уу, эвэр хошууллаа гэсэн юм уу, түүнийг үнэндээ тоогоогүй шиг байна лээ.

Энэ бол аанай л бодлого, асуудлын мөн чанарыг ухдаггүйн л зудын үр дагавар болж харагдаж байгаа юм. Сахал хэмээгддэг Ж.Бат-Эрдэнэ гишүүн “УИХ дээрээ зөв бодлого гаргаад явсан бол өнөөдрийн таван боодол өвсний тусламжаас илүү дээр байх байсан” гээд зулагтай үг хэлж.

Монголын улс төрчид өө, зудаас зулагтай үлдье,бодлого маниулдах оюуны зулагтай үлдье!

Б.ГАРЬД

Amlalt.mn