Ерөнхий сайд Л.Оюун-Эрдэнэ "Улаанбаатараас ярьж байна" нэвтрүүлгийн үеэр Ерөнхийлөгч асан Ц.Элбэгдорж Х.Баттулгад тамга шилжүүлж байх үедээ “Зоригийн хэргийн асуудлыг л оролдуузай, сөхүүзэй. Бусад зүйл хамаагүй ээ” гэсэн агуулгатай хэлсэн юм билээ гэдэг мэдээллийг сэтгүүлч Б.Ганчимэгт ярив.
Б.Ганчимэг өөдөөс нь тэр үед бус, архи ууж байгаад болсон явдал гэж хэлэх шиг боллоо. Ярилцлага өгөгч, ярилцагч хоёул ийм яриа болсоныг нотолж байна. Тэгээд Ерөнхий сайд Х.Баттулгыг үүнийгээ ярих байх гэлээ.
Х.Баттулга ийм яриа болсон бол үнэхээр ярих хэрэгтэй болжээ. Үүнийг эс ярих нь булхай хуйвалдааныг нуусан, нуулцсан, “хуваалцсан” хэрэгт хамаарч байна.
Тэр тусмаа Монголын ардчиллын алтан хараацайг хөнөөсөн, 26 жил боловч эцсийн үнэн тодордоггүй энэ хэргийн талаар дөрөв, тавдугаар Ерөнхийлөгчид тамга солилцохдоо, эсвэл ууж сууж байгаад ч юм уу ярьсан нь үнэн л юм бол Х.Баттулга тэр хэлэлцээнээ ярих, нээх нь шударга ёсонд нийцнэ.
Тэгээд ч тэдний ярьсан яриагүйгээс үл хамаараад хуулийн байгуулага УИХ-ын сонгуулиас өмнө Ц.Элбэгдорж, Х.Баттулга нарыг шалгаж, энэ асуудлын үнэн мөнийг тогтоох учиртай.
Х.Баттулга Ц.Элбэгдорж хоёр нэгэн цагийн үй зайгүй найзууд. Үй зайгүй найзуудын агуулга улс төрийн аллагын хэрэг дээр үй зайгүй байж болохгүй байх аа.
М.ГАЛТ
Амлалт.мн
