Хууль тогтоох, дээд байгууллагад олон сонгогдсон хүн гарцаагүй сайн өвийг л үлдээх учиртай. Монголын парламентад дөрвөөс дээш сонгогдсон бас ч гэж цөөнгүй хүн байна.

Эргээд харвал Д.Лүндээжэнцан, Д. Дэмбэрэл хоёроос өөр шилэх сайн өв үлдээсэн улс алга гэхэд болохоор байна. Аль ч агуулгаараа.

Бетонон ширэнгэ овоолсон, өөртөө үйлдвэр барьсан гишүүд л дөрөв тав сонгогдоод байхаас өөрөөр улсдаа, түмэндээ гийгүүлж байгаа юмаар тун маруухан байна, манай улс төрчид.

Нийслэл хот нь цахилгааны хязгаарлалттай өвөлжиж байгаагаас, үйлдвэрлэл явуулъя гэхнээ нь эрчим хүч үгүйгээс энэ бүхнийг эл ганцхан жишээгээр харж болно.

Хөрөнгө орлогын мэдүүлэг гэгчийг өгдөг, АТГ-т. Тэндээс үзэхээр Монголын улс төрчид улсаасаа баян байгаа. Хэн нь ч ганц станц барьчихаар л байгаа. Гэвч тэгдэггүй дээ.

Арван хувьт, аварга дархан попрогчууд л болцгоосон. Өөр шид үнэндээ үгүй. Дээр сууж, дээж идэхээс өөр хүсэлгүй. Ийм л нөхөд байгаа.

Шилдэг боловсролтой, өндөр сэхээтэн Сү.Батболд гэдэг хүн гэхэд УИХ-д тавантаа сууж, Ерөнхий сайд хүртэл хийв.

Өнөөдөр энэ хүн Малайзад мөнгө зувчуулсан асуудлаар мэдээлэгдэж, Нью-Иоркод хууль бус мөнгөөр байшин авсан гэж дэлхийд цуурайтаж байна. УИХ-ын тусгай хяналтын хороо, тагнуулыг хянах л ажлаас өөрөөр идэвхгүйг нэг ч хуулийн төсөл үл санаачилсан, ирцийн мэдээг нь ард түмэн хараад бухимддаг.

Сү.Батболд улс төрд хорин дөрвөн жил болохдоо, өнөөдөр мэдээлэгдэж байгаагаар бол хууль бус мөнгө зувчуулагч гэдгээр Монголын улс төрчдийн өв сургамжийг баялагжууллаа гэхээр байна гэж улс төрөөс ёс зүй нэхэгсэд өгүүлж байгаа юм.

Сү. Батболд уг нь Баялагийн санг л аль эрт байгуулчих ёстой, тийм өв үлдээж байх ёстой хүн юм.

Сүхбаатарын Батболд гишүүний гадаадад буй өмгөөлөгч түүнийг буруугүйг нотолно гэсэн утгатай үг хэлсэн нь хэвлэл мэдээлэлд гарсан.

Сү.Батболд харин ганхийхгүй байна. Энэ нь буруутайгаар илэрхийлэгдэж байгааг өөрөө мэдмээр. Өмгөөлөгчтэйгөө байр суурь нэг байгаа л бол ард түмэндээ хэлэх хэрэгтэй дээ.

Л.Оюун-Эрдэнэ, Д.Амарбаясгалан нар УИХ-ын сонгуульд МАН-аас нэр бохир хэнбугайг ч хамрыг нь үл цухуйлгана гэсэн дээ.Тиймээс буруутгагдаж буй асуудалд буруугүй бол түүнийгээ нотлох хэрэгтэй дээ Сү.Батболд гишүүнээ...

Т.БОЛД

Amlalt.mn