Улс төрийн намуудад иргэдийн 80 хувь итгэхгүй байгаа бодит үзүүлэлт гарчээ. Мөн өндөр хувь шүү. Яагаад итгэхгүй байна гэхээр ерөөсөө л амлалтаа биелүүлдэггүйгээс болж байгаа юм.
Чихэр өгнө гээд цаас өгөхөөр хэний итгэл лавшрах билээ дээ. Манай улс төрийн намууд бурам амлаад, бурмыг боосон цаас л ард түмэндээ өгч байгаа.
Энэ бол мөрийн хөтөлбөр. Сонгогдогсдын хүйсийн төлөөллөө хангахгүй, улс төрийн шударга ёсыг баримтлахгүй байгаа учраас энэ бүхэн болж байгаа юм. Ингэж ухраад байгаа юм.
Ардчилсан нам авлига гаарах тусам иргэдийн ухрах, дүрвэх гаарч байна гэж мэдэгдэж байна.
Гэтэл намууд, Ардчилсан нам маань өөрөө нэр дэвших эрхийн дэнчин болгож намын авдаг мөнгийг Улс төрийн намуудын тухай хуулиар хаасаар атал үүнд хамгийн өлөн байгаа бөгөөд, нэр дэвшигчдээсээ ил далд, шат шатандаа хамгийн их мөнгө нэхэж байгаа нь илтэд байна.
Ингээд л намууд, АН, МАН-гүй өөрөө авлигажих үртэй байхаар өөдлөх үндэс байна уу.
Сонгуулийг мөнгөнөөс ангид, төлөөллийг бүрэн хангаж нэр дэвшүүлж байж л шударга ёс тогтоно. Засаглал утгаараа бүрдэнэ.
Л.Оюун-Эрдэнэ, МАН үүнд оройлох төлөв харагдуулж байгаа. ХҮН нам тун дажгүй илэрхийлэлтэй байгаа. Төлөөллийг тавь тавин хувьтайгаар дэвшүүлнэ гэсэн байна лээ.
Монголын ардчилал, Монголын авлигын индекс ухарсаар байгаа, энэ бол хэрэг дээрээ улс төрийн намуудын л алдааны үр.
Хариуцлагагүйн зудаас үүдэлтэй зулаг. Тиймээс МАН, АН, ХҮН, Иргэний зориг нам, Ногоон эвслийн дарга нар болох Л.Оюун-Эрдэнэ, Л.Гантөмөр, Н.Номтойбаяр, Б.Батбаатар, Т.Доржханд нар сонгуулийг мөнгөний хамааралгүй явуулахыг зорих ёстой.
Сонгууль мөнгөний болох тусам, залуучууд, эмэгтэйчүүд, хөгжлийн бэрхшээлтэй иргэд сонгогдох боломж хаагддаг, ингэх тусмаа хуучин хулгарууд үүрлэсээр, хөгжил ухарсаар. Нийгэм дэлхийгээс орхигдсоор байгааг бид одоо бодох цаг болсон.
Б.БАЯР
Amlalt.mn
