Сэлэнгэ аймагт цагдаа нар хүүхэд хүчиндсэн нь тодорхой атал нэг хурандаа мөнөөх гэмт үйлдэл хийгсдийн талаар мэдээлэл өгөх боломжгүй гэлээ. ЦЕГ-ын хэргэм зэрэгтэй хурандаа ингэж хэлээд нийгмээс маш бангадуулж байна. Харин ч нэр усыг нь хэлээд, зургийг нь тавих хэрэгтэй гэж иргэд, олон нийт байр сууриа илэрхийлсээр. Тэр ч бүү хэл, Хууль зүйн сайд Б.Энхбаярыг огцор, уучлал гуй гэж байх юм. Сэлэнгэд нэр дэвших горилолтой Шилэн хэмээгдэх Цогоо Б.Энхбаяр сайдыг уучлал гуйгаад, үтэр түргэн огцрохтун гэсэн нь олон хүмүүсийн дэмжлэгийг авч байх шиг.

Б.Энхбаяраас илүү ёс зүйтэй хүн бол “Хариуцсан салбарт жигшүүрт хэрэг гарлаа. Гэгээрлийг олуулаагүй, салбараа бугшуулсанд өршөөгөөрэй” гээд ядаж уучлалт гуйх ёстой л байх л даа. Б.Энхбаярын найз Ж.Сүхбаатарыг ногоон автобусны хэргээр мөн л нийгмээс “яллаад” байгаа. Ж.Сүхбаатар шаварт унасан уу гэвэл унасан, унасан. Гэхдээ яг хэрэг дээрээ Ж.Сүхбаатарыг шаварт унагасан эзэн бол хотын намын дарга, хот хариуцсан захирагч асан Д.Сумъяабазар мөн үү гэвэл биш гэх хүн гарахгүй дээ.

Тийм учраас, Ж.Сүхбаатар хуулийн өмнө, шүүхийн өмнө өөрийн буруугүйг баримтаар нотолно гэж ам бардам хэлээд байгаа байх. Үнэндээ ч Ж.Сүхбаатар бас ч гэж ёс суртахуунтай, зарчим, хууль номыг ойлгодог, баримталдаг хүн. Харин яах гэж тэрхүү ногоон автобусны бантантай салбарыг гардаж авсан нь ойлгогддоггүй. Ж.Сүхбаатарын буруугүйгээ нотолно гэдгийн нөгөө талд хэн буруутай вэ гэдэг асуулт гарна. Тэр асуултын эзэн бол Д.Сумъяабазар л юм гэдэг хариуг нийгмийн индрээс олон олон хүн хэлж байна. Ногоон автобусны хэргээр Ж.Сүхбаатар өөрийн нь хэлээд байгаачлан буруугүй юм бол Д.Сумъяабазар даргаас өөр хэн буруутай гэж. Энэ хоёр хүнийг хоёуланг нь шүүхийн өмнө аваачиж дэнслэх нь шударга ёсонд нийцэх байх аа.

Б.ГАРЬД