Ерөнхий боловсролын сургуулийн төгсөлтийн Монгол хэл бичгийн ЭЕШ болж, энд орсон олон хүүхдүүд тэнцэхгүй байгаа, монгол хэл бичгийн шалгалтдаа онцгой доод түвшний үзүүлэлт гарч байгааг телевизээр халаглан ярьж байна.
Уран зохиолын хичээлийг дунд сургуулийн хөтөлбөрөөс хасчихсан, нийтээрээ эх хэлээ ад үзэж, англи зэрэг гадаад хэлийг хар багаас нь эрхэм чухал гээд итгүүлчихсэн, монгол бичгийг хуучны бичиг гээд ойлгуулчихсан ийм нөхцөл байдал дунд өсөж торниж буй сурагч хүүхдүүд Монгол хэлний шалгалтдаа олигтой дүн үзүүлэхээ байгаад уджээ.
Гэтэл Г.Амартүвшин, Ч.Ундрам нарын аугаа гишүүд бүр нэгдүгээр ангиас нь англи хэлийг “хөхүүлэх” хэрэгтэй гээд хуульчлахаар зүтгэж байгаа. Хоржоонтой шүү.
Чихэнүү чимэг болсон аялгуу сайхан монгол хэл гэсэн мөртэй сонгодог шүлгийг туурвисан Б.Ренчиний үр удмаараа бахархах Г.Амартүвшин, Ренчиний нутагт нэр дэвшихээр өдөр шөнөгүй зүтгэх, ёс зүйн асуудалт Ч.Ундрам нар ингээд байх нь бүр ч гачлантай.
Ерөнхий боловсролын сургуульд уран зохиолыг хавчиж, хөтөлбөрөөс хасаж, энэ чиглэлийн хичээлийг үгүйдүүлсний л харгай ингэж илэрч байгаа юм.
Эцэж ядарсан шувуу үүлэн дээр суугаад зуусан өвсөө цоор болгон үлээхүйд өвс болоод цэцэгсийн тухай аялгуу алга норгох нь анхны бороо аж хэмээн сэцэлсэн найрагч Л.Энх-Амгалан Боловсролын сайд хийж байгаа.
Одоо өөрөө монгол хэлийг эцэж ядарсан шувуу болгож байна. Гэтэл мөн яруу найрагч , УИХ-ын гишүүн, хатагтай Г.Мөнхцэцэг Боловсрол, шинжлэх ухааны байнгын хороог УИХ-д толгойлж байгаа.
Ийн үндэсний сэхээтэн байж болох улс нь гарцаагүй албан тушаалтай, эх монгол хэл, уран зохиолыг эрдэм болгож хүүхэд багачууддаа “хөхүүлэх” учиртай улс бодлого тодорхойлоход байсаар атал Монголын ирээдүй монгол хэлний шалгалтдаа унаад байгааг юу гэх вэ. Харамсал л гэхээс өөр үг эс олдоно. Монгол хэлтэй монгол хүн бэлдэж хайрлаач дээдэс минь, УИХ-ын гишүүд, сайд нар минь.
Б.ТУЛГАТ
