Гурав, дөрөв, тавдугаар Ерөнхийлөгчид сонин сонин л төлөв үзүүлцгээгээд байх. Тавдугаар Ерөнхийлөгч асан Х.Баттулгыг намын нь гишүүн Л.Ганхөлөг гэдэг хүн АН-ын гишүүнчлэлээс хасаад өгөөч гэж шаардлага хүргүүлснээ ярьж.
Тэр тусмаа саяхан Монголын бүх телевизүүдээр ярилцлага нь гарсан С.Зоригийн эхнэр Б.Булганд үг заасан байх магадлалтай гэсэн зүйл энэ ярилцлагадаа цохож.
Х.Баттулга бол харин таг чиг л байна. Сарын өмнө өөрийн хүрээллийнхэн гэдэг юм уу, МоАХ чигийн нөхдөө яг сонгуульд үдэж байгаа аятай баахан зургаа авхуулсан харагдсан. Ингэхдээ А.Адьяасүрэн, С.Ганбаатар хоёрыг хоёр талдаа зогсоож авхуулсан, нударгатай дээлтэй зургаас харвал Монголд хэн жаргалтай вэ гэвэл Х.Баттулга гэж хариулагдахаар гарсан байна билээ.
Өнөө хоёр нь хоёулаа шав шар, жинхэнэ алтан шар дээл өмсөөд мань тавдугаарын хоёр талд зогсоод бас их инээсэн харагдсан. Тэгтэл гуравдугаар саяхан бас нэг мэдэгдэл хийлээ. Намбарын Энхбаяр.
Ц.Элбэгдорж надаас уучлалт гуйсан, харин тэгэхдээ Ц.Нямдорж орж ирж өөрийг нь барихаас аргагүй боллоо гэж хэлдэг байсан гэж өгүүлсээн гээд хэлээд байх.
Ер нь бол Н.Энхбаярыг барьдаг тээр жил, 12 жилийн өмнө Нямка Хуулийн сайд байсан нь үнэн, Ерөнхий сайд нь Сү.Батболд байсан л даа. Ц.Элбэгдорж Н.Энхбаярын энэ үгэнд хариу эс өгөх. Тэгэхээр ортой юм байлгүй, Н.Энхбаярын яриад байгаа нь. Ц.Элбэгдорж гаднаас маш их мэдэгдэл хийж байна. Өөрийгөө буруугүй гэж.
Хууль шүүх нотлоод өгөх байх л даа. Ерөнхий сайд Л. Оюун-Эрдэнэ түүнийг “Тэр хүн алс газраас ард түмэндээ агсам тавьж байхын оронд, гутлаа тослоод, зангиагаа зүүгээд, төрөө хүндлээд Ч.Сайханбилэг, Д.Эрдэнэбилэг, П.Цагаан нараа хөтөлж ирээд шалгуулчих хэрэгтэй” гэжээ.
Б.ТУЛГА
Amlalt.mn
