Жил бүр хүүхдийн баяр болоход томчууд, улс төрчид бүгдээрээ л “Хүүхдийн төлөө за гэж хэлцгээе” гэцгээдэг.
Гэтэл үнэндээ тэд хүүхдийн баяраар хэлдэг “ЗА” гэдэг үгээ бусад өдрүүдэд яагаад хэлдэггүй бас түүний төлөө ажилладаггүй юм бол гэж гайхмаар...
Амлалт.мн сайт сүүлийн 8 жил тасралтгүй Засгийн эрх барьсан МАН-ын 2016, 2020 оны УИХ-ын сонгуульд орохдоо хүүхэдтэй холбоотойгоор дэвшүүлж байсан мөрийн хөтөлбөрөөс ОНЦЛОН танилцуулж байна.
Хэрэв эдгээр мөрийн хөтөлбөрүүд хэрэгжсэн бол хүүхэдэд ээлтэй орчин нийгэмд бүрдэх байлаа. Харамсалтай нь өнөөдөр ч гэсэн хүүхдүүд гурван ээлжээр хичээллэж, нэг ширээнд гурваараа багтаж ядан сууж, авто осолд өртөж, сургуулийнхаа цонхоор унаж, анги дүүргэлт 50 доошгүй хэвээр байна.
Эдгээр мөрийн хөтөлбөрүүд хэрхэн биелсэнийг иргэн та бүхэн өөрсдөө дүгнэн үзнэ бизээ.
Удахгүй УИХ-ыг ээлжит сонгууль болно. Эрх баригч МАН-ын 2024 оны УИХ-ын сонгуулийн мөрийн хөтөлбөрөөс хүүхэдтэй холбоотой хэсгийг шүүж үзвэл мөнөөх л заалтууд дахин орсон харагдах.
Харин 2016, 2020 оны мөрийн хөтөлбөрт тусгагдсан ЕБ-ийн сургуулиудыг 1-2 ээлжтэй болгох асуудлыг доор дурьдах 2024 оны УИХ-ын сонгуульд оролцох мөрийн хөтөлбөртөө МАН тусгаагүй байгаа нь нэг бол энэ асуудлыг “хэрэгжүүлж амжихгүй” гэж үзэж орхигдуулсан, нөгөө бол сургуулиуд 2-3 ээлжээр хичээллэхийг хэвийн үзэгдэл гэж үл тоосон байх.
2024 оны УИХ-ын сонгуульд “ШИНЭ СЭРГЭЛТИЙН БОДЛОГО, БҮСЧИЛСЭН ХӨГЖЛИЙН РЕФОРМ” уриатай оролцох МАН-ын мөрийн хөтөлбөр дэх хүүхэдтэй холбоотой тухай заалтуудаас ТАНИЛЦУУЛЬЯ.
1.3.1. Хүүхэд харах үйлчилгээний чанар, хүртээмжийг дээшлүүлж, 1-2 хүртэлх насны хүүхдийг яслийн үйлчилгээнд хамруулан ээжүүдийн хөдөлмөр эрхлэлтийг нэмэгдүүлнэ.
1.3.2. Хүн амын нягтаршил, өсөлт, газар зүйн онцлог, хүртээмжид үндэслэн гэрт хамгийн ойр “Бага сургуулийн цогцолбор” сургуулиудыг байгуулна. 1.3.3. Хүүхэд бүрийг сургуулийн өмнөх боловсролд хамруулж, бүлэг дүүргэлтийг стандартын түвшинд хүргэнэ.
1.3.13. Цэцэрлэг, сургуулийн орчныг бүрэн камержуулж, хүүхдийн аюулгүй, таатай суралцах орчныг бүрдүүлнэ.
1.3.14. Цэцэрлэгийн хоол болон ЕБС-ийн үдийн хоолны стандартыг шинэчилж, орц найрлагыг нэмэгдүүлж, шим тэжээл, амин дэмээр баялаг хоол, сүү сүүн бүтээгдэхүүнээр үйлчилнэ.
1.3.15. Нүхэн жорлонтой цэцэрлэг, сургууль, дотуур байрыг орчин үеийн ариун цэврийн байгууламжтай болгож, хүүхдэд ээлтэй орчин бүрдүүлнэ.
1.3.16. “Монгол хүн” бэлтгэх бодлогын хүрээнд уламжлалт боловсрол, зан чанарын төлөвшил хүмүүжил, өв соёл, сургаал, амьдрах ухааныг тогтвортой хөгжлийн боловсролын агуулгатай уялдуулан нийцүүлсэн албан бус боловсролын төвүүдийг байгуулна.
1.5.2. Хүүхдийн эрүүл мэнд, боловсрол, хамгааллын үйлчилгээг сайжруулж, сум, хороо бүрд гэр бүл, хүүхэд хөгжил хамгааллын нийгмийн ажилтантай болгоно.
1.5.16. Цэцэрлэгийн хүүхэд хүлээн авах, тарах цагийг уртасгаж эцэг, эхчүүд ажил хөдөлмөр эрхлэх боломжийг нэмэгдүүлнэ.
2024-2028 онд МАН парламентад олонхи болвол хүүхдийн төлөө АМЛАСАН эдгээр амлалтаа хэрэгжүүлэх ёстой болно.
Ц.Мөнх
Амлалт.мн
