Удахгүй 10 сард орон нутгийн сонгууль буюу аймаг, нийслэл, сум дүүргийн ИТХ-ын төлөөлөгч нарыг сонгох сонгууль болно. Энэ сонгуулийн үр дүнгээс хамаарч тухайн аймаг, нийслэл, сум, дүүргийн Засаг дарга томилогдон ажиллана.

Орон нутгийн эрх мэдлийг хэн барих вэ гэдгийг тухайн орон нутгийн иргэд өөрсдөө сонгодог энэ сонгуулийн бүх шатанд улс төрийн нам, эвсэл, хүчнүүд өөрсдийн төлөөний хүмүүсээ нэр дэвшүүлж байгаа.

Эрх баригч МАН нийслэлийн ИТХ-д нэр дэвшигчидээ тодруулснаа олон нийтэд зарлажээ. Өмнөх 2020 оны НИТх-ын сонгуулиар 45 суудлаас 34 суудал авч олонхи болж засаглалаа хэрэгжүүлсэн МАН энэ удаагийн орон нутгийн сонгуульд өмнөх 34 төлөөлөгчийн 18 төлөөлөгчийг дахин нэр дэвшүүлжээ. Тэдэн дунд УИХ-ын сонгуульд нэр дэвшээд “ялагдсан”, албан тушаалын хариуцлага алдаж үүрэгт ажлаасаа чөлөөлөгдөж байсан, 4 жил дүүргээ төлөөлж НИТХ-д суусан атлаа дүүрэг, нийслэлийн хэмжээнд олон нийтэд танигдахуйц ажил үүрэг гүйцэтгэсэн эсэх нь тодорхойгүй “амьгүй албат”-ууд цөөнгүй байх.

Мөн дээр нь шинэ залуусын нэр дэвшүүлсэн байна. Тэдэн дунд нь ногоон автобусны хулгайн “оролцогчид”-ын нэг ч явж байх шиг.

Энэ удаад бид өнгөрсөн УИХ-ын сонгуульд МАН-аас нэр дэвшсэн ч ялагдал хүлээсэн атлаа дахин НИТХ-д нэр дэвшиж байгаа Баянгол дүүргийн Засаг дарга Ө.Сумъяабаатарыг онцолж байна.

Ө.Сумъяабаатар нь өнгөрсөн жил Баянгол дүүргийн Засаг даргаар ажилласан боловч түүнийг дүүргийн ИТХ нь хоёр ч удаа огцруулах тогтоол гаргасан ч эхний удаад Хотын дарга асан Д.Сумъяабазар түүнийг нь батламжлалгүй түтгэлзүүлсэн, хоёрдох удаад ИТХ-ын ирц дутуу хуралдсан гэж Ө.Сумъяабаатар Захиргааны шүүхэд гомдол гаргаж заргаа "авч үлдсэн” удаатай.

Дараа нь өнгөрөгч УИХ-ын сонгуульд МАН-аас түүнд нэр дэвшүүлэх квот олгосон, тэр дагуу 4 жил Засаг даргаар ажилласан дүүргээсээ УИХ-д нэр дэвшсэн ч мөн л ялагдсан. Ийнхүү УИХ-ын сонгуульд нэр дэвшсэн ч иргэд сонгогчдын дэмжлэгийг авч чадаагүй тул зүй нь Ө.Сумъяабаатар Баянзүрх дүүргийн Засаг дарга Н.Баярмөнхийн нэг адил бол улс төрийн хариуцлага хүлээж, үүрэгт ажлаасаа чөлөөлөгдөх нь шударга ёсонд нийцнэ.

Гэвч мань эрийг дахин НИТХ-д нэрийг нь дэвшүүлснийг үзвэл тэр улс төр талаасаа нэлээд том “татаас”-тай гэж харахад хүргэж байна. Зарим эх сурвалжийн ярьж байгаагаар бол УИХ-ын гишүүн Ж.Ганбаатарын “гарын хүн” учраас түүнд УИХ-ын сонгуульд ялагдсан ч дахин НИТХ-д нэр дэвших боломж бүрдэж байгаа гэцгээх аж.

Ямартай НИТХ-ын төлөөлөгч гэдэг бол УИХ-ын сонгуульд ялагдсан нэгнийг “орогнуулж”, эрх мэдэл албан тушаалд хүргэдэг байгууллага биш гэдгийг эрхбиш Баянгол дүүргийн хэрсүү иргэд сонгогчид анзаарч, Ө.Сумъяабаатарыг сонгох эсэх дээ анхаарч сонголтоо зөв хийнэ гэдэгт итгэх л үлдлээ.

А.Галт

amlalt.mn