Монголчууд бид утаа, хоол хүнс, стресс, ажлын ачаалал гээд олон хүчин зүйлсээс болж, өвдөх хавдах нь жилээс жилд нэмэгдэж, Хорт хавдарын өвчлөлөөр дэлхийд тэргүүн эгнээнд шилжлээ.

Эрүүл мэндийн салбарт эмнэлэг дутагдаж, хүүхэд багчууд олноороо ханиад томуу тусаж, эмнэлэг бараадсан ч хэвтэх оргүй байгаагын зэрэгцээ Эрүүл мэндийн даатгалын сан нь мөнгөгүй болж, улсын эмнэлгүүд даатгалаар эмнэлгийн үзлэг оношлогоо, үйлчилгээгээ үзүүлж чадахгүйд хүрлээ.
Ийм хүнд цаг үед Эрүүл мэндийн салбарын сайдаар ажиллаж байгаа Тогтмолын Мөнхсайхан ажлаа хариуцлагатай хийж гүйцэтгэж чадахгүй нь тодорхой байна.

Т.Мөнхсайхан өмнө нь У.Хүрэлсүхийн Засгийн газрын үед мөн л Эрүүл мэндийн сайдаар ажиллах байхдаа дөнгөж төрсөн эхийг төрөх эмнэлгээс тавчиктай гаргасан, ковидын үед зах зээлийн ханшаас өндөр үнээр эм, эмнэлгийн хэрэгсэл, амны хаалт тендергүй худалдан авсан гэх зэрэг уда адараа хариуцлага алдасны улмаас Засгийн газар бүрэн бүрэлдэхүүнээрээ огцорч байсан удаатай.

Үүний дараа тэрбээр Ерөнхий сайд байгаад өдгөө Ерөнхийлөгч болсон У.Хүрэлсүхийн зөвлөх хийж байгаад түүний дэмжлэгтэйгээр Хан-Уул дүүрэгт МАН-аас нэр дэвшин УИХ-ын гишүүнээр сонгогдсон. Төд удалгүй Эрүүл мэндийн сайдаар дахин томилогдсон.

Ингэж эрхэлсэн салбартаа нэг бус удаа хариуцлага алдаж байсан үе мөчний эмч, “Хүчит Шонхор” худалдааны захын эзэн Тогтмолын хүү Мөнхсайханыг дахин Эрүүл мэндийн сайдаар томилсон.

Түүний давуу тал “мөнгөтэй”. Т.Мөнхсайхан төрсөн ах Т.Батмөнх, Улсын заан Ч.Батзоригийн хамтаар хэд хэдэн барилгын компани эзэмшиж, Богд уулын ам, Яармагт олон орон сууцны барилга, хотхон барьсан гэдэг. (Энд дарж энэ тухай уншина уу...)

Өдгөө Т.Мөнхсайхан “Хүчит шонхор” зах буюу “Хүчит шонхор” ХХК-ийг эгч Т.Сайнхүүтэйгээ хамтран эзэмшдэг.

Хоёрдох удаагаа Эрүүл мэндийн сайдаар ажиллаж байгаа Т.Мөнхсайхан ард иргэдийн итгэлийг алдаж эхэллээ.

Түүнийг Эрүүл мэндийн сайдаар ажиллаж байгаа энэ цаг үед Эрүүл мэндийн даатгалын тогтолцоо доголдож, даатгалын сан хоосорч, улсын эмнэлгүүдийн эмчилгээ үйлчилгээнд иргэдэд үзүүлэх хөнгөлөлт тасалдаж, өвдөж зовсон болон зайлшгүй хагалгаанд орох ёстой хүмүүс даатгалын сангаас хөнгөлөлт эдэлж чадахгүйд хүрлээ.

Томуу томуу төст өвчний улмаас хүүхэд багачууд олноороо өртөж, эмнэлгийн ор дутагдалтай байгаа бодит нөхцөл үүсээд байна.

Гэтэл ЭМ-ийнсайд Т.Мөнхсайхан хэвлэлд өгсөн ярилцлагадаа бид хүүхдийн 1300 ор гаргаж бэлдсэн, 1250 хүүхэд хэвтэн эмчлүүлж байна, ханиад томуу дэлгэрч байгаа байдалд иргэд өөрсдөө хариуцлагатай баймаар байна, Улаанбаатарын утаа хэдийгээр хүний биед сөргөөр нөлөөлж байгаа боловч, утаанаас үүдэлтэй ханиадны мутаци гарсан гэж нотлогдож, батлагдсан зүйл хаана ч байхгүй, Монгол Улсын иргэд эрүүл байх боломжтой нөхцөл нь 6 хувь (94 хувь нь эрүүл байх боломжгүй гэсэн үг үү?) байна гэсэн судалгаа байгаа гэж ярьжээ.

Үнэндээ судлаачид хорт утаанаас болж томуугийн вирус мутацлагдаж, эдгэхгүй байгаа талаар дотоод гадаадгүй маш олон судалгааг гаргасан байдаг юм билээ. Мутацилагдаж буй вирусын талаарх судалгааг ЭНД ДАРЖ УНШИНА УУ...

Тийм атал Монгол Улсын эрүүл мэндийн салбарыг тэргүүлж байгаа хүн ийм хариуцлагагүй үг хэлээд сууж байна гэдэг түүнийг мэдлэггүй, салбараа удирдах чадваргүй, ардл түмнийг басамжлан доромжилсноос өөрцгүй хэрэг гэж үзэхэд хүргэж байна.

Иймээс Эрүүл мэндийн сайд Т.Мөнхсайханыг нэн даруй огцруулахыг шаардсан “давалгааг” нийгмээрээ өрнүүлэх нь зүйтэй бизээ.

Дашрамд хэлэхэд сошиал орчинд зарим эмэгтэйчүүд ЭМ-ийн сайд Т.Мөнхсайханыг “өндөр, царайлаг, сайхан бие хаатай, жентельмен залуу” гэх мэтээр өргөмжилж, хаацайлах хандлагатай бололтой юм билээ.

Т.Мөнхсайханы ажлаа хийж чадахгүй байгаа байдлыг шүүмжилж буй нь түүний сайхан муухай царай зүс, бие хаатай нь огт хамаагүй болохыг энд зориуд хэлэх нь зөв бизээ. Төрийн хүн төрийн ажлаа цалгардуулахгүй явуулах ёстой, эс бөгөөс чаддаг нэгэнд нь өгөх учиртай.

А.Галт

Amlalt.mn