Цахим сүлжээнд “Бурханы хүү Баярбаатар” нэрээр олонд танигдаж, нийгэм, улс төрийн аливаа асуудалд шүүмжлэлтэй хандаж лайв, видео оруулдаг иргэн Б.Баярбаатарыг шүүхээс Зөрчлийн хуулийн 5 дэх хэсэгт дэх Танхайрах зөрчил буюу тодруулбал тус хуулийн 5.1.4 хэсэгт заасан “олон нийтийг үл хүндэтгэсэн” гэх шалтгаанаар 30 хоног баривчлах шийтгэл оногдуулсан байна.

Зөрчлийн энэ хуулийн зүйлчлэлийн тухайд 100 мянган төгрөгөөр торгох, эсхүл 7-30 хоног баривчлах шийтгэлтэй бол иргэн Б.Баярбаатарт хамгийн өндөр шийтгэл буюу 30 хоног баривчлахаар шийтгэжээ.

Иргэд, олон нийтийн зүгээс шүүхийн энэ шийдвэрийг буруутгаж, үг үзэл бодлоо илэрхийлсний нь төлөө Ерөнхий сайд шүүхэд “чиглэл өгч” иргэн Б.Баярбаатарыг баривчлуулчихсан юм биш биз, улс оронд коммунист дэглэм тогтлоо гэх мэтээр энэ асуудалд шүүмжлэлтэй хандаж байна.

Гэтэл үнэн хэрэгтээ шүүх эрх мэдлийг хэрэгжүүлэгч шүүхийн байгууллага, шүүгчид хэн нэгэн улс төрийн албан тушаалтнаас хараат бусаар ажиллаж, шийдвэрээ гаргадаг бөгөөд аливаа албан тушаалтан шүүхийн шийдвэрт нөлөөлөх боломжгүй нь хуульчлагдсан байдаг.

Монгол Улсын шүүх, шүүхийн байгууллага авлига албан тушаалтнуудад “ээлтэй” хандаж, шударга бус шийдвэр гаргаж, улс төрчид, авлигачдын талд “ажилладаг” тухай иргэд шүүмжлэлттэй ханддаг.

Ерөнхий сайд Л.Оюун-Эрдэнэ ч шүүхийн үйл ажиллагаанд нэг бус удаа сэтгэл дундуур байгаагаа илэрхийлж байсан.

Тийм атал өөрийн лайваараа Ерөнхий сайдыг шүүмжилсэн иргэн Б.Баярбаатарыг шүүхээс “Танхайрсан” хэмээн Зөрчлийн хуулиар зүйлчилж, 30 хоног баривчлах шийдвэр гаргаж байгаа нь шүүхээс, цаагуураа “Ерөнхий сайд Л.Оюун-Эрдэнийн нэр хүндийг “унагах”, олон нийтэд муухай харагдуулах гэсэн, өөрийг нь шүүмжилсэн иргэнд хатуурхан хандаж, баривчлуулж байгаа юм байна” гэсэн ойлголтыг олон нийтэд бий болгох гэсэн юм биш биз гэсэн хардлагыг төрүүлж байна.

Тийм биш бол үг, үзэл бодлоо илэрхийлсэн иргэн Б.Баяртбаатарт үгүй ядаж 30 хоног биш 7 хоног баривчлах шийтгэл оногдлуулж болох байсан биз.

А.Галт

Amlalt.mn