2024 оны УИХ-ын сонгуулиар 126 гишүүнтэй УИХ бүрэлдэж, МАН олонхи болсноор МАН-ын ЕНБД-аар ажиллаж байсан Д.Амарбаясгалан УИХ-ын даргаар сонгогдсон.
Д.Амарбаясгалан ажлаа авсны дараа УИХ-ын Ерөнхий нарийн бичгийн даргаар 2023 оноос одоог хүртэл Засгийн газрын Хэрэг эрхлэх газрын дэд дарга бөгөөд Засгийн газрын Хяналт хэрэгжүүлэх газрын даргаар ажилаж байсан Б.Баасандоржийг томилсон.
Б.Баасандоржийн хувьд өмнө нь 2018-2020 онд Улсын бүртгэлийн Ерөнхий газрын дарга, 2020-2022 онд Хууль зүй, дотоод хэргийн яамны Төрийн нарийн бичгийн дарга, 2022-2023 онд Мэргэжлийн хяналтын Ерөнхий газрын даргаар ажилаж байгаад МАН-ын ЕНБД Д.Амарбаясгалан Монгол Улсын сайд, Засгийн газрын хэрэг эрхлэх газрын дарга болоход нь 2023 оноос ЗГХЭГ-ын Дэд дарга бөгөөд Засгийн газрын Хяналт хэрэгжүүлэх газрын дарга болсон.
Харамсалтай нь Б.Баасандорж өнгөрсөн хугацаанд шинээр байгуулагдсан Засгийн газрын хяналт хэрэгжүүлэх газрыг ч дорвитой удирдаж “чадаагүй”.
Засгийн газар “5Ш” ажиллагааг зохион байгуулахаа нийтэд зарлаж, үүний ШҮҮР ажиллагааг нь ЗГХЭГ-ын дарга Д.Амарбаясгалан удирдаж, түүний дор ажлын хэсэгт Засгийн газрын Хяналт хэрэгжүүлэх газрын дарга Б.Баасандорж ажилласан ч харамсалтай нь олигтой үр дүнд хүрч чадаагүй.
Мөн дээр нь Б.Баасандорж Мэргэжлийн хяналтын Ерөнхий газрын даргаар ажиллаж байхдаа энэ салбарыг татан буулгах ажлыг “гардан” хэрэгжүүлсэн нэгэн. Үүний үр дүнд мэргэжлийн хяналтын үүргийг салбар яамд гүйцэтгэх болсон гэх ч үнэндээ улс орны хэмжээнд бүх шатны хяналтын үйл ажиллагаа бүрэн алдагдаж, Засаг төрийн хэмжээнд эргээд “Мэргэжлийн хяналтын газартай” дүйцэхүйц институци дахин байгуулах ажлыг яриад эхэлсэн нь нууц биш. /ЭНЭ талаар энд дарж уншина уу https://ergelt.mn/news/44/single/43724 /
Үүгээр зогсохгүй 21-р зуун буюу цахим эрэн зууны энэ цаг үед парламентын 126 гишүүн цахим хэрэгслээрээ саналаа өгч чадахгүй байдалд хүрч, саналыг нь гараар тоолох тухай ярьж олны элэг доог болсон.
УИХ-ын гишүүн Б.Энхбаяраас УИХ-ын ЕНБД Б.Баасандоржид хандан 2024 оны 11 сарын 11-ны өдөр гарган өгсөн УИХ-03/5362 тоот албан хүсэлтээр 2024 оны 11 сарын 08-ны өдрийн УИХ-ын чуулганы нэгдсэн хуралдаанаар хэлэлцсэн 2025 оны төсвийн тухай хуулийн төсөл дагалдуулан өргөн барьсан хуулиудын төслийн хэлэлуүүлэг, санал хураалтын дүрс, санал хураах үеийн танхимын дүрсийн цаасан тэмдэглэлийн хамт хуулбарлан ирүүлэхийг хүссэн байдаг.
Эл албан бичгийн хариу болгож 2024 оны 12 сарын 02-ны өдөр УИХ-ын Тамгын газраас УИХ-ын гишүүн Б.Энхбаярт хандан албан бус байдлаар буюу албан бичгээр бус гишүүний туслахад дамжуулах байдлаар УИХ-ын чуулган дэлгэрэнгүй тэмдэглэлийг гаргаж өгсөн байдаг. Уг тэмдэглэлд гишүүдийн ирцийн мэдээлэл, санал өгсөн байдал, дэмжсэн татгалзсан гишүүдийн жагсаалт байхгүй байсан учраас Б.Энхбаяр гишүүн түүнд хандан дахин ШААРДЛАГА хүргүүлсэн байдаг.
УИХ-ын ЕНБД гэдэг бол УИХ-ын даргын хамгийн ойрын зөвлөх, түүнд хурал даргалах үйл ажиллагаа явуулахад нь хууль эрх зүйн бүх талын дэмжлэг үзүүлэх үүрэгтэй албан тушаалтан. Гэтэл УИХ-ын дарга Д.Амарбаясгалангаар, чуулган таслалгүй хуралдаа суусан гишүүдийг “урдуур суулгаж шагнана” гэж хэлүүлж байдаг УИХ-ын ЕНБД гэж байж болох уу гэдгийг та анхаарна биз.
Бас дээр нь УИХ-ын гишүүн Б.Энхбаярын хэлсэнчлэн “УИХ-ын дарга бол УИХ-ын хуралдаан даргалагч болохоос УИХ-ын гишүүдийн дарга нь бол биш. УИХ-ын гишүүдийг ийм хууль бич, санаачил, ийм хуульд битгий оролц гэдэг этгээд бүр биш. УИХ дээр байгуулагдсан 60 гаруй Ажлын хэсэг нь УИХ-ын үйл ажиллагаа, зохион байгуулалтын үндсэн хэлбэр болох Байнгын хороодыг дотоодод нь хүчгүйдүүлэх, Засгийн газар ба парламентыг бодлогын зохиомол зөрчилд оруулах чиглэл рүү түлхэж байна. Надтай ярилгүй 7 ажлын хэсэгт оруулсан атлаа сүүлийн 8 жил ярьж, судалгаа хийж, хуулийн төслийг нь боловсруулсан Төрийн өмч, төрийн өмчийн компаний реформын ажлын хэсэгт оруулдаггүй. УИХ бол нэг даргын тушаал, дохио зангаагаар ажилладаг байгууллага биш. Ард түмэн гэдэг ганц даргатай төлөөллийн дээд байгууллага” гэж хэлсэн нь УИХ-ын Тамгын газар, түүнийг даргалж байгаа УИХ-ын ЕНБД Б.Баасандорж удаа дараа ажлаа хийж чадахгүй байгаагийн тод илэрхийлэл гэж харж болно.
Ингэж эрхэлсэн ажилдаа хариуцлагагүй ханддаг, ажилдаа ахиц дэвшил авчирдаггүй, асуудлыг аргацааж өнгөрүүлдэг, Монгол Улсын Үндсэн хуулиар заагдсан ард түмний төлөөлөл болсон УИХ-ын гишүүдийг үл хүндэтгэдэг байдал гаргаж буй УИХ-ын Ерөнхий нарийн бичгийн дарга Б.Баасандоржийг үүрэгт ажлаас нь чөлөөлөх нь эрхэм УИХ-ын дарга Д.Амарбаясгалан таны хурал даргалах үйл ажиллагаанд нэмэр болох төдийгүй Монгол Улсын парламентын засаглалын хөгжилд зохих дэмшил болно гэж үзэж байна.
Ц.Мөнх
Amlalt.mn
