ГЕГ-ийн дарга, бригадын генерал Р.Отгонжаргал ubn.mn сайтад “Олон нийтэд худал мэдээлэл түгээж, гүтгэж байгааг төрийн байгууллагын үйл ажиллагаанд хөндлөнгөөс нөлөөлж, өөртөө давуу байдал үүсгэх үйлдэл гэж харж байна” гэх гарчиг бүхий ярилцлагадаа өөрийн төрсөн эгч Р.Бурмаа нь Замын-Үүдэд гаалийн итгэмжлэгдсэн төлөөлөгчөөр ажилладаг гэдгийг өөрийн “амаараа” хэлсэн байна.

Товчхондоо тэрбээр энэ үгээрээ ГЕГ-аас итгэмжлэл олгодог байгууллага, хувь хүн дунд түүний төрсөн эгч ажилладаг гэдгийг “батлав”.

Хэдийгээр ГЕГ-ийн даргын төрсөн эгч түүний шууд удирдлага дор ажиллаагүй боловч гаалийн байгууллагаас олгодог итгэмжлэгдсэн төлөөлөгчөөр ажиллаж байгаа нь ёсзүйн болон ашиг сонирхолын зөрчил үүсч байна гэж харж болно.

ГЕГ-ын даргын төрсөн эгч Гаалийн итгэмжлэгдсэн төлөөлөгчөөр ажиллаж байгаа тохиолдолд түүгээр үйлчлүүлэх сонирхолтой иргэд байгууллагын тоо нэмэгдэх төдийгүй Гаалийн ажилтнууд ч түүний “талд илт ажиллах” нь нууц биш.

ГЕГ-ын дарга Р.Отгонжаргал дээрх ярилцлагад хэлэхдээ “2024 онд 2000 гаруй итгэмжлэгдсэн төлөөлөгч Гаалийн байгууллагад бүртгэлтэй байгаа” гэжээ. Тэгвэл эдгээр итгэмжлэгдсэн төлөөлөгчид дунд түүний төрсөн эгч Р.Бурмаа ажиллаж байгаа аж.

Р.Отгонжаргал дарга “Р.Бурмаа нь миний төрсөн эгч мөн. Манайх ах, дүү олуулаа, бүгд л дор бүртээ ажил төрөлтэй, бие биенийхээ ажил төрөлд оролцоод байдаггүй улсууд л даа. Миний хувьд төрийн байгууллагад 30-аад жил ажиллаж байгаа төрийн жинхэнэ албан хаагч. Р.Бурмаа нь Замын-Үүдэд 20-иод жил хувиараа ажиллаж, амьдарч байгаа..., Би ГЕГ-ын дарга гээд Р.Бурмаагийн эрхэлж буй үйл ажиллагаанд ямар ч хамааралгүй гэдгээ албан ёсоор илэрхийлсэн” гэжээ.

Р.Отгонжаргал дарга төрсөн эгч Р.Бурмаагийн үйл хэрэгт оролцдоггүй нь үнэн боловч түүний нэр нөлөөгөөр эгч нь өөртөө давуу байдал бий болгож болзошгүй гэж хардаж болно.

Төрийн өндөр албан тушаалтан үйлдэл, эс үйлдэхүйгээрээ гаргасан зөрчлийг хууль зөрчсөнтэй адилтгаж үздэг тохиолдол бий. Энэ өнцгөөс харвал төрсөн эгч нь гаалийн итгэмжлэгдсэн төлөөлөгчөөр ажиллаж байгаа тохиолдолд хүссэн хүсээгүй ГЕГ-ын даргыг “эгчдээ давуу байдал үүсгэсэн” гэж иргэд, олон нийт хардах нь зүйн хэрэг.

Тиймээс ГЕГ-ын дарга Р.Отгонжаргал төрсөн эгчтэйгээ ойлголцож, ёс зүйн хувьд өөрийн нь удирдаж байгаа байгууллагатай холбоотой ажил хийхээс татгалзах саналыг тавьд шийдвэрлүүлэх нь зүйтэй болов уу.

Бид энэ удаад ГЕГ-ын дарга Р.Отгонжаргалын төрсөн эгч, Замын-Үүдийн гаалийн итгэмжлэгдсэн төлөөлөгч Р.Бурмаа төрсөн дүүгийнхээ нэрийг хэлж үйл ажиллагаагаа явуулдаг тухай, элдэв авир араншингийн тухай бидэнд ирсэн мэдээллийг ярьсангүй.

Ц.Мөнх

amlalt.mn