Завшсан нь залуужиж, төлсөн нь зүдрэх төрийн тогтолцоо-

Төр буй дор татвар буй гэдэг. Монгол Улсад иргэн бүр, аж ахуйн нэгж болгон төрдөө татвар төлөх үүрэгтэй. Та бидний төлсөн татвар төрийн албан хаагчдын цалин, боловсрол, эрүүл мэнд, зам тээвэр, нийгмийн халамж зэрэг үндсэн үйлчилгээг санхүүжүүлэх гол эх үүсвэр болдог. Тиймээс татвар төлөгчдийн төлсөн мөнгө хэрхэн зарцуулагдаж байгааг хянах, мэдээлэл авах эрх нь иргэн бүрийн үүрэг төдийгүй эрх мөн.

Итгэлт баяны хэлдэгчлэн “Тамирын голыг долоох шахаж олсон хөрөнгө” мэт жаахан ашиг орлогоосоо иргэн, ААН-үүд татвараа төлдөг.

Гэтэл та бидний төлсөн татварыг “Төлгөн дарга нь төө хумсалж, хурган дарга нь хуруу хумсалж, хуцан дарга нар нь хуу хамдаг “жишиг” төрийн албанд тогтох нь байж болох энгийн үйл хэрэг үү гэдгийг асуух цаг нэгэнт болжээ.

Тодруулбал бидний төлсөн татварыг зарим нэг албан тушаалтан эрх мэдлээ ашиглан завшиж, өөрийн хувийн хэрэглээнд зарцуулж байгаа нь харамсалтай.

Тухайлбал, Багануур дүүргийн Татварын хэлтсийн дарга Т.Баярчимэг нь 2022-2023 онд орон нутгийн төсөвт төвлөрүүлэхэд “Авто тээврийн хэрэгслийн татвар буюу авто машины татвар”-ыг цуглуулахад зарцуулагдах ёстой байсан санхүүжилтийг өөрөө тушаал гарган зохион байгуулалттайгаар хувьдаа завшсан байх үндэслэлтэй үйлдлийг Авлигатай тэмцэх газраас шалгаж, 2024 оны 8 сард Нийслэлийн прокурорын газарт шилжүүлсэн байдаг.

Гэвч энэ хэрэг хуулийн байгууллагад шилжсэнээс хойш өдий болтол шийдгээгүй дарагдсан учир юунд байв. Яагаад эл хэргийг хянах үүрэгтэй прокурорын байгууллага ажлаа хийхгүй байна вэ, Хэн гэдэг прокурор энэ хэргийг хариуцаж, ямар үндэслэлээр хав дарж байгаа вэ?
Магадгүй үүний цаана прокурорын байгууллагын нэр бүхий зарим алба хаагчид “авлигачид”-ын талд “ажилладаг” юм биш биз гэсэн хардлага төрж байна.

Төсвөөс “завшсан” мөнгөөрөө гоо сайхны хагалгаанд орж дүр төрхөө өөрчилж, илүү залуу царайлаг болсон эрхэм Т.Баярчимэг даргад хууль үйлчлэхгүй байна уу?

Татварын байцаагчид нь татвар төлөгч бидний мөнгийг хураахдаа “данс хааж боож байгаад “хүчээр” авдаг, гэтэл ингэж хураасан мөнгийг нь Дүүргийн Татварын хэлтсийн дарга нь аваад, хувийнхаа гоо сайхны хагалгаанд зарцуулчихдаг байж таарах уу?

Төсвийн мөнгийг эрх мэдэл, албан тушаалаа урвуулан ашиглаж, хувьдаа “завшсан” Багануур дүүргийн татварын хэлтсийн дарга Т.Баярчимэгийн асуудалд хэрхэн хандсан, яаж шийдсэн тухай бид АТГ, НПГ-аас очиж тодруулга авч та бүхэндээ хүргэх болно.

Ц.Мөнх

Амлалт.мн