МАН-ын Бага хурал өнгөрсөн амралтын өдрүүдэд сүр дуулиантай 2 хоног үргэлжлэх шиг боллоо. Намын дарга Н.Учрал шинэ залуу хүний хувьд авлига албан тушаалынх гэмт хэрэгтэй эвлэрэхгүй гэдгээ зарлалаа.

Тэр илтгэлдээ Ардын намыг авлига идэж байна гэсэн. Яг үнэндээ болбол Ардын намыг авлига идэх биш авлигын Ардын нам цэцэглүүлж байна гэж хэлж болох хэмжээнд хүрсэн. За тэр яах вэ, гол асуудалдаа орьё.

МАН-ынхан хоёр хоног хуралдах хугацаандаа баахан л төсөл, мөрөөдлийн хөтөлбөр ярьсан салбар хуралдаан, хэлэлцүүлэг хийх шиг боллоо. Тэд "тэгнэ ингэнэ, тэгж хөгжүүлнэ, ингэж сайжруулна, ийм асуудлыг тэгж шийднэ, ийм гарц байна" гээд баахан л ярьсан юм байх.

Гэвч үнэндээ МАН улс орноо хөгжүүлэх мөрийн хөтөлбөрөө 2024 оны УИХ-ын сонгуулиар ард иргэд, сонгогчиддоо танилцуулж, иргэд сонгогчид тэдний мөрийн хөтөлбөрийг нь дэмжсэн, сонгосон, МАН УИХ-д олонхи болсон.

Ардчилал хөгжсөн улс орнуудад улс төрийн намууд сонгуулиар мөрийн хөтөлбөрөө “уралдуулж”, иргэд мөрин хөтөлбөрийг нь дэмжиж саналаа өгч, парламентаа сонгуулиар бүрдүүлж, олонхий болсон улс төрийн хүчин Засгийн гайзраа байгуулан, сонгуулийн мөрийн хөтөлбөрөө Засгийн газрын баримтлах гол ажил болгон явдаг зарчимтай. Харин манайд бол үгүй.

Сонгууль өнгөрөөд хоёр жил болж байхад МАН-ын мөрийн хөтөлбөрийн тухай ярьж байгаа албан тушаалтан МАН дотор ч, УИХ дотор ч, Засгийн газарт алга...

Харин эсрэгээрээ бөөн шинэ төсөл, мөрөөдлийн гэмээр хөтөлбөрүүдийг ахийнэ хэрэгжүүлнэ хэмээн ам уралдан ярих.

Зүй нь бол:

• Мөрийн хөтөлбөрийн биелэлтийг хувь хэмжээгээр нь дүгнэх

• Хэрэгжиж эхэлсэн заалтуудын явцыг танилцуулах

• Хэрэгжээгүй болон хэрэгжих боломжгүй болсон заалтуудад тайлбар өгөх

• Цаашдын эрэмбэ, бодит шийдлийг тодорхойлох зэрэг асуудлуудыг хэлэлцэх ёстой байв.

Гэвч МАН-ынхан намын Бага хурлаар сонгуулийн мөрийн хөтөлбөрийнхөө тухай МАН-ын ЕНБД Я.Содбаатар илтгэл тавьсна гэх ч түүнд нь мөрийн хөтөлбөриын хэрэгжилт, гүйцэтгэл, биелэлтийн хувийн тухай тодорхой юу ч ярьсангүй. Худлаа гэвэл Мөрийн хөтөлбөрийн тухай ярьсан мэдээ нь ингэж гарчээ...

Учир нь тэдэнд сонгуулийн мөрийн хөтөлбөр “сонин” биш биз. Сонгууль дөхөөд ирэхлээр нь өмнөх мөрийн хөтөлбөрийг тагмартчихсан яваа ард иргэд, сонгогчидод ЦОО ШИНЭ мөрийн хөтөлбөр, САНАЛУУДЫГ гарган дэвшүүлж, “яг одоо л хийнэ, одоо хийх гэж байна, удахгүй улс орон хөгжинө, цаг сайхан болно” гэж мэтээр “толгой тархи”-ийг нь эргүүлээд дахин сайн сайхан юм амлаад дахиад сонгогдоно гэж ингэж тооцож байгаа биз...

Энэ бол МАН-ын үнэн төрх... Сонгуулийнхаа мөрийн хөтөлбөрийг хэрэгжүүлээгүй, хэрэгжүүлэхийн хүсэхгүй байгаа МАН-д иргэд та бид дахин дахин итгэж саналаа өгсөөр байх уу.

Дашрамд хэлэхэд амлалт.мн сайпын пэйж хуудсаар өглөө бүр МАН-ын мөрийн хөтөлбөрийг заалт нэг бүрээр нь САНУУЛЖ байгааг иргэд сонгогчиддоо уламжилья.

Ц.Мөнх

Amlalt.mn