Монголын улс төрд "хүн муутай" гэдэг үг хөнгөдөхөөр нэгэн үйл явдал өрнөж байна. ИЗНН-ын дарга гэгдэх Б.Батбаатар "жагсаалтын гишүүнийг эгүүлэн татах" хуулийн төсөл санаачилснаа зарласан нь ердөө л өөрийг нь парламентад хөтлөн оруулсан Нарантуяа (Нара) гишүүнийг "туг тахиж", өөрийнхөө сайдын суудлыг хамгаалж үлдэх гэсэн арчаагүй оролдлого юм.

2024 оны сонгуулиар ИЗНН-ыг парламентад суудалтай болгоход Нара гишүүн бүх боломжоороо ажилласан. Тэрээр телевизийн мэтгэлцээн бүрд орж, намынхаа сурталчилгааг ганцаараа шахуу нуруун дээрээ үүрч явахад, Б.Батбаатар хаана байв?

Сонгуулийн сурталчилгаанд олигтой оролцоогүй, ганц удаа ч мэтгэлцээнд ороогүй атлаа өнөөдөр өөрийг нь УИХ-ын босго алхуулсан гишүүнийхээ "алдаа" дээр дөрөөлөн, эгүүлэн татах хууль ярьж суугаа нь улс төрчийн ёс зүйгүй, "хүн муутай" байдлыг тод харууллаа.

Нарагийн өгсөн мөнгөөр онгоц хөлөглөн зугаалж, 10 хүрэхгүй хүн цуглуулж явсан тэрээр өнөөдөр УИХ-ын гишүүн, Төрийн сайд болчихоод “эрийн сайндаа ийм болсон” мэт дүрдээ итгэжээ.

Б.Батбаатар АН-аас гараад сураггүй байснаа ИЗНН-ын гишүүд дунд “хор” найруулснаар "итгэл эвдэн" гарч ирсэн гэх яриа байдаг. Өнөөдөр ИЗНН бол үзэл санааны нам биш, харин түүний ах дүү, үеэл хаяал нь шавсан, төрөөс тус намд олгосон санхүүжилтийг зориулалтын бус зарцуулсан "хувийн ТҮЦ" болж хувирчээ.

Намын удирдах зөвлөл нь дүрмийн дагуу бүрддэггүй, зөвхөн түүний хамаатан саднаар дүүрсэн.Тэрээр ИЗНН-ын нэр хүндийг заран байж сайд болонгуутаа яамандаа ах дүү, найз нөхдөө нягт шургуулж, бүхэл бүтэн төрийн яамыг хувийн компани шигээ удирдаж байна.

2025 онд төрөөс авсан 455 сая төгрөгийн санхүүжилт хаачсан нь тодорхойгүй, тайлан шаардсан залуусаа яаж ийгээд зайлуулж чаддаг "уран мэхтэй".

Б.Батбаатарын санаачилсан гэх энэ хууль нь эрх зүйн онолын хувьд Дундад зууны үеийн "императив мандат" буюу гишүүнийг намын даргын "гар хөл" болгох хоцрогдсон зарчим юм. Гишүүнийг намын даргын үзэмжээр эгүүлэн татах нь Үндсэн хуулийн "чөлөөт мандат"-ын зарчмыг шууд нурааж байна.

Самарын бизнес атгадаг өмнөд хөршийнхөнтэй тун ойр байдаг гэх хардлага, Оюун-Эрдэнийн зөвлөх асан Амундратай хүч хавсарсан үйлдлүүд нь түүнийг хэний хэтэвчинд хэвтэж, хэний зараалыг гүйцэтгэж буйг асуухад хүргэж байна.

Б.Батбаатар өөрөө жагсаалтаар хээв нэг орж ирчхээд, хамт зүтгэсэн гишүүнээ "туг тахиж" буй нь түүнийг хэзээ ч, хэнийг ч зарахад бэлэн "онгорхой цонх" болохыг гэрчилнэ. Сайдын суудалд шонд өлгөсөн мануухай лугаа сууж, эрх мэдлээ дэд сайддаа шилжүүлсэн атлаа, өөрийн арьсыг хамгаалахын тулд ийнхүү улайрч байна.

Парламент бол төлөөллийн байгууллага болохоос намын даргын хувийн өмч биш. Гэр бүлээрээ худалдагдахад бэлэн, цус ойртсон ийм нам, ийм дарга Монголын төрийн сул тал болоод байна. Сонгогчдыг популист амлалтаар хуурч санал авчхаад, дараа нь тэднийг хөөж явуулахаар улайрч буй Б.Батбаатар шиг хүмүүсээс Монгол төр, Монголын ардчилал нэн даруй цэвэрлэгдэх ёстой.

Т.Бат

Amlalt.mn